件事要由三個月前講起，當時有個headhunt主動聯絡問有冇興趣轉工，撞啱我呢半年好積極搵緊機會，咁咪聽下囉。
Headhunt：「我個客請緊HR，package幾好㗎，18日大假，有bonus，上手同事生完BB之後決定唔做，你想唔想試下？」
「幾錢人工先？」
Headhunt：「25-28k，我會盡量幫你叫到28。」
「28k？我35k喎！」
Headhunt：「35k？」
「我而家大假都廿幾日，有雙糧有bonus，28k轉乜鬼呀？唔好玩啦！」
Headhunt：「唔好意思，因為睇你個Linkedin冇show人工。」
「咁又係，所以唔緊要啦，下次有適合嘅工再搵我囉，你睇Linkedin大約都知我background同埋做開啲乜。」
Headhunt：「知道呀，係呢，其實你而家份糧都好好喎，點解有興趣轉工，頭先咁快覆我嘅？」
我：「份糧係好，咁都要睇埋其他配套㗎嘛！」
Headhunt：「又啱，咁我先唔打攪你喇，或者你介唔介意畀最update嘅CV我？等我幫手留意下有冇啱你嘅job。」
冇問題，反正真係想轉工，咪畀最update嗰份CV佢囉，點知個Headhunt隔咗幾日就WhatsApp我，你估下佢send咩嚟？
Headhunt：「Happy Birthday Janice！」
「你點知我生日㗎？」
Headhunt：「你份CV有生日日期吖嘛，上次你send完過嚟，我一睇，咦，原來過兩日係你生日喎，咁咪記低囉！」
「哦，有心喇你，記得有好工就通知聲我喇，但少過我而家份糧就唔使介紹。」
Headhunt：「明白。」
好在佢係女仔，唔知以為想溝我，因為條女三日唔埋兩日就WhatsApp我，最初講下啲工同埋行情，後尾直情會傾閒計，咁我見大家都係女又冇咩蝕底嘅，不過都估到佢係想mark住啲candidate，仲諗緊而家啲Headhunt點解咁好服務，直至有一次佢又WhatsApp我。
Headhunt：「Hello Janice我見你公司出咗job ad請HR喎，可唔可以同你了解下？」
哦，原來吼住我公司R生意。
「係呀，但我哋公司不嬲唔用agency請人，老細冇批呢個budget㗎！」
Headhunt：「唔係呢個意思，我想apply份工呀……」
原來唔係吼住我公司R生意，係吼住我份工，唔怪得呢兩個月陰魂不散啦！
「原來你一直等我走，想入嚟做。」
Headhunt：「又唔好咁講，我真係當你朋友㗎，哈哈，不過之前聽到你想走吖嘛，咪留意下囉，今次呢個HR position係新開？」
「呢個位咪就係replace我囉，我搵到新工喇，做埋今個月。」
Headhunt：「真係？恭喜晒呀！咁我都唔兜圈喇，因為睇返你CV，同我而家份工都差唔多，主力請人，另外我都係讀HR，熟勞工例㗎，只係做Headhunt之後好少用得著。」
「咁你咪試下囉，支持你呀！」
Headhunt：「多謝你呀，咁我係咪可以send CV畀你？」
「你指介紹你入嚟？梗係唔好啦，你照正常send CV過嚟見工就得㗎喇。」
唔係唔幫你呀，我想轉工就係因為同阿姐唔啱，如果我直接引薦你，咁同推你去死係冇分別，為你好咋，不過呢句冇講出口，一陣如果請咗，佢再同我阿姐爆料，咁就唔係幾好啦！
Headhunt：「真係唔可以經你介紹呀？」
「介紹就唔好喇，我哋公司唔興呢套，我畀啲tips你，請唔請唔敢包，但應該一定有得interview先。」
Headhunt：「好呀，好呀，多謝你，同埋我想問呢……係咪可以直接request 35k？」
「咁都要睇你而家人工幾多嘅，唔通你本身18k又可以叫到35k咩！」
Headhunt：「我而家老底20k，連埋佣平均每個月28k至30k左右，呢個係平均數，你知我嗰行好浮動啦，同埋跑數好辛苦，你份工又係請人，我份工又係請人，我想穩定啲。」
「我哋公司嘅HR都好辛苦㗎，你估唔使跑KPI？」
Headhunt：「我明，不過而家份Headhunt跑得仲辛苦。」
原來佢上次聽到我份糧有35k同埋其他福利之後已經心郁郁，明白嘅，為人為到底，加上呢個Headhunt份人冇咩吖，所以我就教佢send嚟份CV要提啲乜同埋有咩keywords，到時阿姐見到自然會雙眼發光，引薦就唔好喇，對佢對我都唔係好事。
我公司出咗job ad之後一如所料收到好多CV，但係呢位Headhunt依然脫穎而出收到電話約見工，因為阿姐好希望新請返嚟呢個人對IT超熟悉，事關我哋公司要請好多外判IT，其實HR唔一定熟IT嘢，特別係Python Programming，我叫佢吹都吹到自己成日請呢類職位。
結局並唔圓滿，我順利走咗，但Headhunt上嚟見咗兩round最終冇請，因為佢有另一個對手仲強，冇辦法啦，我盡晒力過料畀個Headhunt㗎喇，始終決定權喺我阿姐手上，佢當然覺得好可惜，不過我太清楚自己個阿姐係咩人，其實入唔到嚟做未必係壞事嘅，唔好淨係睇份糧，呢度人事關係仲好複雜㗎！
呢個Headhunt算唔錯，就算見我個position衰咗，之後都keep住同我聯絡，唔係利用完我就走，希望佢之後會搵到一份適合自己，薪酬又滿意嘅工作啦，我聽得出佢份Headhunt真係好大壓力嘅。