3年前仲未搬入屯門，有次要去新墟附近做嘢，肚餓又趕時間就亂入一間雲吞麵舖，記得叫咗碗雲吞麵、油菜、炸魚皮、豆漿，埋單先發現冇cash，結果我叫老細等一等我去撳錢，點知佢話：「唔使啦，你下次嚟先畀錢囉。」
我當時唔係街坊，亦係第一次去呢間舖頭，對佢哋嚟講一定係生面口，邊個保證仲有下次？我話唔得，火速去撳錢找數，老細嗰份慷慨我記到而家。
搬入屯門之後，其實我去新墟嘅次數唔多，但每次經過都堅持要入去食嘢幫襯，啱啱呢次其實我已經一早食飽，不過都入去叫咗碗淨雲吞同豆漿，因為好唔好食已經係其次，我迷戀嘅係小店人情味。