好多人話「喺度食就唔好喺度屙」，但係返一份工每星期對住5日，每日最少都9至6，真係好容易日久生情，而日久生情亦都分兩種，一種係認真發展嘅感情，另一種係一夜情。
某年前嘅一晚，我哋幾個同事去食飯飲嘢，埋單嗰陣只係九點幾，但由於當中有兩個人係已婚，所以佢哋要返屋企交人，結果就留低咗同樣係住大西北嘅Emma同我等車。
Emma：「咁早唔想返屋企呀，不如轉場再飲嘢吖，過唔過蘭桂坊？」
我：「唔啦，我老喇，好耐冇落老蘭。」
Emma：「老咩呀？你大我5年，你35吖嘛，我記得！去啦，銅鑼灣去蘭桂坊好近之嘛！」
我：「唔係近定遠嘅問題，落老蘭同成班仔去溝女先好玩㗎，同個女仔去咪阻住我識其他女囉！」
Emma：「識我咪得囉！」
我：「識你有咩用呀，我哋做咗同事幾多年呀？好似3年？定4年？你連我幾多歲都知啦！」
Emma：「即係一定要識陌生女仔再去搞嘢先好玩？」
我：「唔係must，不過開心啲囉，邊有落老蘭傾計咁老土㗎，傾計返屋企傾啦！」
Emma：「咁返你屋企傾計搞嘢囉！」
我哋互相對望咗一眼，呢段半開玩笑嘅對話亦變咗真實嘅試探，其實我同Emma識咗接近4年，好肯定雙方只係同事關係，之前冇曖昧過，間中會幾個同事出嚟食飯，亦試過得我同佢兩個食飯，除咗公事，大家都會講下彼此嘅感情事，我同女友散咗冇幾耐，Emma係知道嘅，而Emma當時應該有男朋友。
現實比起嗰啲電影、電視、小說等等嘅劇情更直接，當晚喺銅鑼灣直接搭的士去我元朗屋企，嗰程車我哋冇再講「搞嘢」嘅話題，一如以往咁傾閑計講笑，好似默許咗去我屋企嘅目的就係搞嘢，但又唔使特登重複或者確認。
抵達咗我Yoho嘅住所之後，我哋嘅對話係咁。
Emma：「你一個男人住都幾企理喎！」
我：「梗係，有執屋㗎！」
Emma：「我想沖個涼先。」
我：「哦，拎條新毛巾畀你吖。」
Emma：「有冇橡筋畀我紮頭？」
我：「邊有橡筋呀？」
之後Emma去沖涼，我開咗電視希望有啲聲減輕尷尬氣氛，佢沖完只係圍住毛巾出嚟，我繼續故作鎮定話自己都想沖，到我沖完出嚟，依然圍住條毛巾嘅Emma已經喺我間房「參觀」，當時佢企喺我個窗口講咗句：「呢度幾方便，一落樓就係商場有嘢食，我屋企人都諗過買Yoho，但老豆話又細又貴。」
我：「Ok啦，住慣咗。」相信Emma都係特登講其他嘢令到氣氛自然啲，然後我直接拉咗佢上床，做大家「默許」咗嘅事。
成件事係冇預期，但係彼此又好配合，完事後仲瞓喺床傾咗陣，佢問我之前點解同女朋友散，我答：「因為佢想結婚，我唔想，我覺得自己未定性，你呢，你同你男朋友點呀？」
Emma：「散咗喇。」
我：「幾時嘅事？點解嘅？」
Emma：「兩個月前，但其實近一年都好少見，一個月一次？好似都冇。我想結婚，佢唔想。」
呢下氣氛仲尷尬過未搞嘢之前，我哋都由拍拖變single，我係因為唔想結婚，佢係因為想結婚。
Emma：「我覺得佢唔係唔想結婚，只係唔夠鍾意我。」
我：「點解咁講呢？佢有第二個？」
Emma：「唔知呢，不過佢超過一年冇搞我，你覺得一對情侶可以一年唔搞嘢咩？」
我：「咁你有冇問過佢點解唔搞你？」
Emma：「次次佢都話攰，然後我話拍拖都一年唔搞，以後結婚點算？佢話自己唔想結婚，所以冇諗得咁長遠，同你一樣呀！」
唔知點回應，我轉話題：「喺度瞓啦，都咁夜喇，聽日又星期六唔使返工。」
Emma：「唔啦，返去喇。」
後續係我送Emma落樓搭的士，再後續就係大家並冇拍拖，但keep住呢種情慾關係，喺公司唔會眉來眼去調情，就好似以前做同事一樣，偶爾會互相WhatsApp講下咸嘢，佢平均每星期會去我屋企一次搞嘢，有時兩星期一次，有時又會一星期兩次，冇既定時間規律，好隨心。
你話我哋係純SP咩，又好似唔係，我覺得自己鍾意Emma，因為我哋兩個有時會搞搞新意思，耐唔耐會特登book酒店搞，仲會喺酒店過夜（正式hotel唔係時鐘），有次去一間唔喺市區嘅酒店，搞完一次就落街食嘢，當時我問咗句：「可唔可以拖下手？」
Emma：「好呀。」
唔計床上面，嗰次係我哋第一次正式拖手，但又從來冇同佢拍拖，係咪好複雜？因為我真係唔想結婚，如果唔係以結婚為大前提，我唔想佢浪費時間喺我身上，Emma 30歲，同我之前個女朋友一樣歲數，我個EX同我講過，每個女仔去到呢個階段都會諗婚姻，就好似一條分界線，十零廿歲後生點玩都得，如果過咗三十仲玩，拍幾年又散，到時就更加難搵到對象組織家庭，因為呢個年紀嘅好男人應該畀人mark實晒，除非你去食小鮮肉，但問題係小鮮肉唔會吼你，更重要嘅係我個EX好鍾意小朋友，佢話唔想太遲結婚太遲生，會同啲仔女有代溝，更加唔想做高齡產婦。
我問過Emma：「係呢，你鍾唔鍾意小朋友？會唔會想生BB？」
Emma：「鍾意呀，我一定會生，不過生一個就夠，好辛苦。」
聽完之後，我更加唔敢改變大家嘅關係，呢個責任感太重，如果Emma只係當我SP，佢隨時都可以走。
我同Emma嘅情慾關係大約維持咗半年，好坦白講，就算係同我個EX，喺床上都冇我同Emma咁合拍，我哋更加進展到會買情趣內衣同玩具，好努力咁令對方更開心更舒服，不過離開咗張床，大家係唔會過問彼此嘅私生活。
某一日Emma突然同我講：「今晚我哋最後一次搞嘢喇。」
我以為佢講笑：「點解呀？」
Emma：「有個男仔追緊我，我諗我會同佢一齊，佢已經問咗一次。」
我：「個男仔點㗎？咩人嚟㗎？」
Emma：「老老實實囉，係悶啲，但好正經，冇咩特別。」
我：「你認真？」
Emma：「係呀！」
我：「定你想我哋繼續維持而家嘅關係？」
Emma：「之前我單身就ok，但如果我真係拍拖……我唔想呀，唔想對佢唔住。」
我：「好，知道。」
我冇勉強Emma，首先係大家嘅關係本身就唔過問對方私事，易地而處，如果有一日我搵到個女仔認真拍拖，我亦唔想Emma死纏爛打，己所不欲勿施於人，其次係，我覺得「搞嘢」係好講求合拍度，講真我唔相信Emma可以話唔再做就唔再做。
好記得我哋最後一次搞嘢嗰晚係冇完事，因為我個心一直喺喺度諗：最後一次、最後一次、最後一次，原來Emma話最後一次，會令我個心咁唔舒服，而我亦覺得Emma呢一次並唔enjoy，佢畀我嘅感覺係想快啲完，快啲結束呢段關係，可能係心理作祟，我覺得佢係咁諗。
男人同女人嘅結構同諗法真係好唔同，男人自命風流，其實好拖泥帶水，女人表面上好似好感性，但make咗decision之後就會好決絕。
點解咁講？因為我忘記唔到Emma，曾經幾次想同佢喺返埋一齊，但都被佢禮貌地拒絕，更加估唔到嘅係冇咗Emma之後，我先知道自己比想像中更鍾意佢，有一晚輾轉反側之下，我直接打畀Emma：「不如我哋正式拍拖吖，不如我哋正正經經一齊吖。」
Emma好冷靜咁回答：「唔啦，你都唔想結婚。」
聽到結婚呢兩個字即刻收皮，佢講得啱，我根本唔想結婚，Emma冇提出過正式拍拖，係因為佢知我唔想結婚，其實由大家發生關係嘅第一日開始，彼此都知道呢方面嘅諗法係背道而馳，只係當時兩個人都單身，就好似偷一刻歡愉，互相解決生理上嘅需要。
雖然好掛住Emma，雖然知道自己已經鍾意咗佢，但每次諗起佢嗰句：「唔啦，你都唔想結婚。」我就會將本來打到一半嘅msg刪除，既然人哋有個認真嘅結婚對象就唔好搞人，而家Emma唔係single喇。
工作上我同Emma依然友好合作，大家嘅關係同以前冇分別，只係完全冇肉體關係。
有日朝早，IT部同事Leo走埋嚟我個department：「我見到Emma拍拖。」當時我個心離咗一離，講緊我？應該唔係吖，已經好幾個月冇私下見Emma，咁你點解要特登走嚟同我講呀？你知我同Emma有關係？
我：「下……咁點呀？」
Leo指住我隔籬位個同事阿周：「阿周你個衰仔，同Emma拍拖都唔講，收收埋埋，你而家認唔認罪？」
唔係啩？「情敵」就係我隔籬個阿周？乖乖仔嚟㗎喎，而且佢好內向，阿周自己都講過朋友唔多，最friend已經係我哋圍內幾個同事，世界咁大你竟然當我哋幾個同事係最好嘅朋友，可以想像到阿周嘅圈子有幾窄。
話口未完Emma返到公司，Leo隨即轉移目標對住Emma講：「鬼馬呀你同阿周，撞到你哋啦！」
Emma露出燦爛嘅笑容：「咁都畀你個八公撞到。」Emma冇望過我一眼，神態自若，但我留意到阿周見到Emma笑之後，佢都好似舒咗口氣跟住一齊笑，似乎係未得Emma批准唔可以公開關係，而家Emma勇於承認，阿周亦唔需要再隱瞞我哋班同事。
Emma冇講大話，阿周真係一個老實人，佢哋拍拖我好放心（雖然已經唔關我事，唔輪到我放唔放心），就算佢哋結婚，我都好肯定阿周係一個顧家好老公，呢條友唯一嘅缺點就係－－－悶，不過佢係好人。
我冇諗過係因為阿周，Emma先同我變返普通同事關係，但最諗唔到嘅係，Emma同阿周嘅發展一日千里，我初時覺得佢兩個嘅性格根本唔夾。
唔夠半年，Emma傳出婚訊，原來佢兩個已經睇緊樓，會唔會快咗啲呀？我承認自己有少少呷醋，但絕對唔會搞小動作破壞人哋，點估到阿周搞返我轉頭：「唔好意思呀，我想搵你做我兄弟，你知我啦，朋友唔多。」我嘅心情複雜到難以形容。
（下集待續）
投稿讀者：織菊防基