兄弟《下集》若要人不知 搵食行遠啲

喺未知道Emma嘅另一半係阿周之前,我斷斷續續都有要求過「復合」,後來見佢態度堅決,我就冇再提感情事,純粹作出一啲關心問候,說穿了都係想知道Emma同新男朋友發展成點,伺機乘虛而入。

得悉真命天子係阿周之後,我已經變得好收斂,無謂啦,一陣send msg畀Emma嘅時候,如果阿周喺佢旁邊就麻煩。

估唔到佢兩個只係拍拖短短半年已經談婚論嫁,聽阿周講,父母見過Emma之後都好鍾意,仲承諾如果結婚會出首期,供樓就要佢哋自己負責:「Emma好識做呀,每星期梗會抽一日見我阿爸阿媽,有時係放工後一齊返去食飯,有時就星期日朝早飲茶。」

我:「好羨慕有屋企人畀首期呀!」

阿周:「最近已經睇定樓喇,主要睇啲三四百呎,就返佢住屯門,係喎!我當你做兄弟冇問題㗎喇!你都知我朋友唔多,另外搵咗Neo, Jacky, Anthony, Henry,全部都係同事,你哋到時咪冇咁悶囉!伴郎搵咗我細佬。」

唔係唔想幫,係我怕尷尬,唔肯定Emma知唔知我有份做兄弟,還是阿周自把自為,不過點都好,最後我都係答:「好呀,冇問題。」

我自己係男人都咁話,男人真係好賤格,失去咗先覺得可惜,諗返之前同Emma嘅點點滴滴,其實要搵到個床事咁合拍嘅人絕對唔容易,而且我同Emma係傾到計嗰隻。

其實有一個位好難接受,Emma同我講「最後一次」之前嘅一個禮拜,我哋仲喺網上性商店揀玩具,訂埋㗎喇,點知箱嘢未到,Emma已經接受咗阿周,而且下定決心頭也不回,而家嗰箱性玩具仲喺我屋企,丟又唔係,留又唔係,兩個字---糾結。

距離Emma同阿周嘅婚期愈嚟愈近,姐妹同兄弟都出埋嚟食飯,算啦,唔好諗咁多喇,當係為Emma送上最後嘅祝福,講到尾我都希望佢嫁個好男人,唔好再喺情路上迷失。

就喺兄弟姐妹出嚟見面當晚,Neo食完飯拉住我唔肯走,結果兩條麻甩佬再去附近飲嘢,佢竟然同我講想縮沙唔做兄弟:「你估我而家先講會唔會好衰仔吖嗱?」

我:「點止衰仔,直情係仆街仔,咩事大日子之前先嚟扭屎忽花呀?」

Neo:「同你講一件事,好嚴重好嚴重,唔可以爆返出嚟,因為我知你口密先講,我個心好唔舒服。」

我:「咩事?」

Neo:「我同Emma其實有一齊過。」

我:「下?幾時嘅事?」我真心嚇親。

Neo:「其實都唔算一齊過,即係……SP關係囉,都大半年前喇,我接受唔到呀!」

「我接受唔到」呢句對白應該係我講啦!

我:「唔得,我好亂,不如你講多啲先。」

Neo:「真係唔好爆出去呀!嗰陣Emma仲同以前條仔一齊,有次佢話想買嘢畀條仔,叫我放工陪佢去揀,揀完禮物就順便食飯飲嘢,佢係咁呻條仔成年唔掂佢,問我係咪覺得佢冇吸引力,咁我氹下佢,大家又飲咗啲酒,最後就去咗開房,之後keep住有搞嘢。」

可能我識得嘅詞彙唔多,請問除咗晴天霹靂之外,仲有冇其他成語可以更貼切地形容我嘅心情?

我個腦function唔到呀!首先發現Emma唔止我一個,其次係好想知Neo同我嘅時間有冇重疊?

我:「咁……你哋最後一次係幾時,Emma同阿周一齊之後仲有冇發生關係?」

Neo:「就係去到阿周之前stop咗,嗰陣Emma話唔想對唔住新男朋友,但我初時唔知道佢條新仔就係阿周。」

唉,真係DLLM,我竟然同Neo同期,唔係同期嘅藝員訓練班,係同期嘅SP……首先我要冷靜。

我:「其實你當時有冇諗過同Emma認真發展?」

Neo:「最初冇,因為佢好似三句唔埋兩句就講結婚,後來我認真咗,但同時發現一樣嘢?」

我:「發現乜嘢呀?」唔係發現咗我嘅存在啩!我心血少受唔到呢啲刺激喎!

Neo:「我發現佢同Henry有啲嘢,因為有次同Emma去九龍塘漫春天,佢沖涼嗰陣有WhatsApp,部機自己著咗,我見到係Henry搵佢,個msg係講聽晚屋企冇人,想唔想上嚟一齊睇AV?」

DLLMCH咩!有冇白花油呀?我見暈呀!

我:「你指我哋同事Henry?你點肯定係佢?周街都係Henry啦!」

Neo:「佢個名show住Henry@我地公司名,咁你話呢?而家阿周仲要搵我同埋Henry做兄弟,唔得呀,我真係唔得呀,咸濕還咸濕,我未去到咁開放,接受唔到曾經搞過嘅女同事原來同另一個男同事有關係,我哋仲要一齊做兄弟,本身已經係襟兄弟啦!你明唔明我講咩呀?我都唔知自己講咩呀!你真係唔好爆出去喎!」

唔好咁啦!其實最需要安慰嘅人係我,幫幫手call白車先啦!同埋Neo全晚講咗廿幾三十次「你真係唔好爆出去」,好L煩呀!

我:「雖然好刺激,不過阿周係無辜,同埋你而家先話唔做兄弟咪仲奇怪。」

Neo:「你知唔知我驚咩呀?我有諗過會唔會阿周一早知道真相,擺酒播成長片段嘅時候出現我同Emma啪啪啪嘅畫面,又或者係Emma同Henry啪啪啪嘅畫面,會唔會係新郎哥報復㗎?阿周平時咁內向咁靜,呢種性格嘅人一癲起上嚟好狼㗎!」

唔好再講喇,我幻想都好驚呀!不過唔係喎,唔make sense:「定啲嚟先!你同Emma搞嘢,除非Emma偷拍啫,否則阿周點會有你哋啪啪啪啲片呀?唔合邏輯吖!而且你都識講啦,佢同阿周一齊之後,你哋都冇再搞過啦,應該唔會有呢啲咁荒唐嘅事出現嘅,定啲嚟!」

表面係安撫Neo,其實我係自己分析緊有冇機會發生。

最後勸服咗Neo繼續做兄弟,因為我希望大婚當日如果真係出事,有多個人陪我一齊頂。

相信世界上唔會有一個婚禮係兄弟緊張過新郎,終於等到Emma同阿周嘅大日子喇,嗰日阿周無論有咩需要,我同Neo都會出盡力幫忙,阿周好感激,Neo就覺得我好有義氣,至於另一位疑似同Emma有關係嘅Henry,唔知搞咩由朝早接新娘開始已經係咁煲煙,睇得出好唔開心又好緊張,佢平時喺公司都唔會咁樣煙駁煙。

壓軸環節成長片段嗰陣,Henry唔知死咗去邊,條友仔成日都心事重重唔出聲,睇嚟佢對Emma係最認真,而我因為驚得滯唔覺意捉實Neo隻手。

Neo:「嘩,你隻手都出L晒汗喎,唔使擔心我,今日研究過阿周,唔似有異樣,呢一關一定過到!」唔係擔心你呀,我擔心自己咋!

成長片段播完,乜事都冇,我同Neo鬆咗一口氣,Henry又失驚無神出現返,敬酒嗰陣仲係咁幫阿周頂酒,喂你自然啲啦!唔好咁Over得唔得呀Henry!

Neo:「你睇下Henry,借酒消愁咁喎,真係估唔到,Emma試晒我同Henry條周,最後揀咗個阿周。」

我:「畀支咪你上台講好冇呀?靜啲啦!」

Neo:「Sorry!」

我:「以後喺度食就唔好喺度屙喇知唔知呀!」

Neo:「收到,我以後會好乖!」

其實呢句我係同自己講,不過Neo又錯唔晒,Emma試晒幾個同事條周,最後揀咗個阿周,陰差陽錯幾個襟兄弟仲要做埋兄弟,原來四海之內皆兄弟係咁解,另外仲學識咗一個道理,就係「若要人不知」嘅下一句並非「唔好咁低B」,應該係「搵食行遠啲」先啱。

投稿讀者:織菊防基


兄弟《上集》
https://hkofficedaily.com/?p=18749

error: