總公司四大規條 WhatsApp女同事都唔得

事緣我間公司上年發生咗一件好變態嘅事,有女同事發現自己喺office畀人偷拍,啲相仲放咗上去一個Telegram嘅J圖群組。

問題嚟喇,個女同事點知呢?聽聞係佢男友話返畀佢聽,我嘗試代入~~~男人入J圖group睇睇下發現自己女朋友啲相,心大心細好唔好講出嚟,講咗又驚畀女友問長問短,唔講又過唔到自己嗰關,女友畀人放上TG喎,就算捱鬧都要照講啦!

又有另一個問題嚟喇,嗰啲相點影㗎?邊個影㗎?呢單嘢又真係好快「破案」喎,因為根據嗰幾張J圖嘅角度,全部都係來自個女同事斜對面嗰位男同事,雖然冇走光,但全部影人隻腳就夠晒變態啦,返工畀人偷拍隻腳擺上網喎!痴線㗎?

其實單嘢係冇得抵賴,除非有人特登走去坐嗰個位,否則就角度而言,就只有嗰位男同事可以偷拍到呢輯「沙龍」,件事搞到報警收場,個男嘅即時炒咗,受害女同事之後做多三個月亦都辭職,因為同佢唔熟,公司又落咗「聖旨」唔畀同事再討論,所以佢係因為搵到新工先走吖,定係自己有心理陰影吖,甚至係公司畀壓力佢吖,咁就真係唔知喇。

講人哋嘅事始終隔重山,重點我係想講,偷拍事件發生之後,總公司出咗4條policy要員工遵守,個人認為係矯枉過正:

1)男女同事唔可以開過份嘅玩笑,特別係涉及性嘅話題,喺office要保持適當距離,唔好打打鬧鬧或者有不必要身體接觸;

2)Office範圍唔准影相,以免又有同事嘅相外洩;

3)有車嘅同事,唔好以順路或任何理由接載異性同事;

4)男同事唔可以私下WhatsApp女同事,傾公事要用3人以上嘅WhatsApp group,確保有事嘅時候,有第三者或更多人可以作證;

大大張紙貼喺員工告示版,仲要每組都叫各自team leader再brief一次。講真第2)同第3)項嘅影響唔大,平時真係冇乜幾何會喺公司影相,而呢間office裡面有車嘅同事亦唔多,有車嘅人亦未必會揸返工。

不過第1)項就有少少惡搞,咩叫做「過份嘅玩笑」呢?冇一個明確指示的話,真係會出現好多灰色地帶,隨時瀨咗嘢都唔知。

仲有,唔好有「不必要身體接觸」呢一點令男同事好大壓力,事關公司個影印機就擺喺一個窄巷位,平時等print嘢大家都會吹吓水打發時間,家陣唔少男同事見到有女同事print緊嘢,一個二個都調頭走,唔知以為班女同事有肺炎。

同埋咁樣搞法,同事之間嘅關係好似變得愈嚟愈奇怪,有次pantry見到個女同事斟緊水,我本身想入去都下意識退後,等對方斟完再卸身讓佢行出嚟避免掂到,好似古代啲男女授受不親咁樣!

自從頒布咗呢四大規條之後,唔少同事都有微言,我唔知公司究竟有幾多對情侶,不過一間office裡面冇地下情都幾難令人相信,除非全部都係豬扒加毒L啦!

我明白偷拍事件係好變態,不過公司都唔需要極端到咁嘅地步,好多嘢係講自律同埋睇人㗎啫,我又唔信個男同事WhatsApp完個女同事,總公司會知道囉,你set呢啲框架真係多嚿魚!

知唔知最正係咩呀?最正係我老婆就係我同事呀!有咩過癮得過兜口兜面當個老婆透明呀?我而家見到佢就運路走,應該好快就離婚㗎喇!

投稿人:名就無謂提喇

error: