聶瞳，你啲行家點搞㗎？有個獵頭contact我，介紹咗個competitor公司嘅position，咁作為打工仔梗係睇錢做人啦，見offer可以嗌到多過而家份工25%，咁咪試下囉！
當日我特登攞AL去interview，其實過程尚算順利，見完HR，再見佢哋另一位高層，之後HR又入返房同我交代流程，問下我有冇咩問題之類，正頭正路啦！點知個HR送我出門口嗰陣，竟然見到我個下屬阿Ming，佢西裝骨骨咁坐咗喺reception對出張梳化，手上仲有一個file，明眼人都知道係嚟見工啦！
因為我都係成套西裝加個file入住啲cert同reference letter吖嘛！
就係嗰一秒，我同阿Ming四目交投，大家個樣都好錯愕，然後HR送到我去門口嗰陣仲講咗句：「唔該晒你呀Simon，我哋一有消息就會通知你。」個門口就對正reception張梳化唔夠10步，我唔該返你啦HR姐姐，出少句聲當幫忙好唔好？
Competitor間公司度門係玻璃，當我行出去之後，回頭望住我下屬阿Ming，佢似乎都未能平復，但隨即已經被HR叫佢起身入房，我睇住佢行入去，佢都睇住我睇住佢行入去。
喺走廊，電梯都未撳我就做一件事－－－－－打畀個獵頭想DKLM，呢啲係咩安排呀？你hunt完我又hunt我下屬都算喇，見工嘅時間仲要同一日疉住？我有咩得罪你呀？係咪想我冇得撈呀？我返去點面對個下屬呀？
獵頭喺電話度同我講：「唔關我事㗎！個客淨係叫我幫佢請manager level嘅position，你下屬應該唔係senior grade啦係咪？佢哋junior level係自己出招聘廣告㗎！我都唔知佢哋收到咩CV，更加唔知佢哋搵咗咩人嚟interview，我發誓經我手冇send你其他同事出去。」
「咁即係間公司玩嘢啦！」
獵頭：「不如我幫你問問個客先啦，你唔使咁嬲住，你嚟interview見到個下屬，即係個下屬又係嚟interview啫，咁咪打和囉！」
你都CLS！我係上司佢係下屬，點同呀？我好嬲，好嬲個獵頭，又好嬲個下屬，更加嬲個HR，最嬲都係自己。你一係請晒兩個，如果請咗我唔請阿Ming，一定會畀個衰仔唱通街，如果請阿Ming唔請我，我燒L咗你間公司呀！總之好嬲好嬲啦！
頭先嘅情景實在太震撼，久久未能平復，因為我知阿Ming見緊工，換言之獵頭呢一刻都唔會同HR傾到，究竟一陣邊個打返畀我先呢？
望一望阿Ming個WhatsApp，想check佢有冇msg我交代，突然醒起一件事……阿Ming朝早WhatsApp我請sick leave，係我話OK 㗎！！！佢聲稱自己胃痛又暈又嘔，原來係扮嘢嚟見工，我好嬲自己呀！但唔通唔畀佢sick leave咩！
諗諗下佢大罪啲，話晒我請AL，但阿Ming扮病喎，點都係我理直氣壯啲啦……我一直咁樣安慰自己。
相隔咗足足個半鐘，首先打嚟嘅唔係阿Ming，而係獵頭，佢已經問咗個客點解要咁樣安排，個HR話……
（未完待續）