《不能說的秘密》下集 差唔多每日一齊去廁所

獵頭再三強調,我下屬阿Ming去見工並唔係經佢引薦,所以事前毫不知情。

「對方HR話,你個下屬本身係約晏晝interview,但係當日朝頭早,呢個男仔主動打嚟改時間,雖然係咁,你哋兩個人其實相差兩個半鐘,只係你in得耐咗,而你下屬又早到咗40分鐘,結果就撞到正。」

我:「早咗40分鐘?佢平時返工最少遲30分鐘㗎喎,去見工早咁多?」

「咁就唔清楚喇,唔係我約你下屬㗎,我點會咁戇居倒自己米呀!」

獵頭打得嚟,即係阿Ming已經見完工,不過等咗成日個衰仔都冇打嚟或者msg我,正所謂敵不動我不動,如果我自己搵阿Ming成何體統,一齊心思思瞓唔著囉!

第二日返工阿Ming一反常態,條友仔竟然早過我坐喺度,冇睇錯吖嘛,當時係9點正咋喎!佢仲要主動同我講:「早晨!」

我:「早晨!」

成個朝早我都留意住阿Ming,條衰仔知㗎,因為佢幾次擰過嚟都同我嘅眼神正面接觸,然後佢又匆匆擰返過去,係呀!就係要畀阿Ming知道~~~I am watching you!

大約朝早10:30,阿Ming終於離開自己個位去廁所,我即刻使出一招如影隨形,緊隨佢步伐行去男廁,當阿Ming發現嘅時候,我嘅下體幾乎已經貼住佢pat pat,睇得出佢有少少驚。

我:「入去先吖。」

阿Ming:「……哦。」

入到廁所嗰陣因為有另一個同事喺度,所以我哋冇交談,不過我就嘜實阿Ming,「引領」佢行去尿兜同我排排企小解,當嗰個唔關事嘅同事出咗去,我就一路屙一路同阿Ming講:「聽講你噚日interview改時間喎,仲早咗好多上去,平時返工唔見咁準時嘅?胃痛冇事啦嘛?」

阿Ming:「Sorry,我噚日其實係見工先請sick leave,有另一份約我下晝見,咁我咪同佢哋改朝早囉,早啲上去係想快手見完……不過我今日都準時返工㗎喇。」

我:「又唔使sorry,我咪又係見工。」大家一路講,一路再三確認廁所冇其他人,最緊要啲廁格係吉嘅,唔會好似電視劇咁老土畀人聽到。

阿Ming:「Sorry係因為我吹水話自己胃痛。」

我:「明㗎喇,大家打工仔,請sick leave見工好正常啫,係喎,見成點?有冇feedback?」

阿Ming:「冇呀,佢叫我返去等消息,你呢?」

我:「我都冇呀,你話噚日下晝仲要見另一份工,真係咁想走咩?」

阿Ming:「又唔係話好想走,不過呢度都做咗3年啦,想睇下有咩突破吖嘛,你呢?」

我:「我?同你一樣囉!喂,即係咁呀Ming,呢個係秘密,邊個都唔好講,ok?」

阿Ming:「梗係啦!梗係啦!」

我:「你會唔會已經同人講咗?」

阿Ming:「冇冇冇,絕對冇,我自己都係詐病見工。」

我:「Deal!最緊要有共識,呢個係不能說的秘密,邊個爆出去死全家!」

阿Ming:「咁嚴重?Ok!冇問題!」

結果我同阿Ming嘅關係密切咗好多,大家差唔多每日都會一齊去廁所或者互send msg,我相信彼此都係出於兩個原因:1)確保對方冇爆件事出嚟;2)想知個Competitor有冇請我哋其中一個。

呢個狀況持續咗一個月左右,隔咗咁耐大家仲生勾勾坐喺同一個Office,好明顯份工冇回音啦!不過我又好衰,問心有啲想阿Ming走,始終佢知道我見工嘅秘密,而家就好似有個計時炸彈喺公司,有時好想同佢講:「點解你同日見兩份工都冇回音㗎?快啲走啦!最多我寫一封全世界最靚嘅reference letter畀你啦好冇?」

心諗啫,我冇咁同佢講。

搞搞下兩個月,搞搞下又三個月,睇嚟阿Ming同我都一樣轉工無望㗎喇,與其繼續猜疑,不如對佢好啲。

我條team有個比較senior嘅同事因為移居英國而辭職,換言之要請返個人,我決定唔搵相同資歷嘅candidate,改為請個junior返嚟,然後內部提升阿Ming做senior個position。

當日我叫阿Ming入conference room,親手畀升職信佢,再親口同佢講:「嗱,人工加咗$2,500,Title就加返個Senior喺前面,我會叫Admin同你印新卡片㗎喇!」

阿Ming:「多謝你,我會畀心機。」

我:「Good!我睇好你!」

得㗎喇!只要你唔好咁口疏,有我一日,你喺呢間公司都大把世界,潛規則嘅嘢唔使講出口啦!

我同阿Ming之間冇再提起嗰次見工嘅事,就好似當日冇撞過冇發生過一樣,估唔到兩條麻甩佬之間竟然有一個共同秘密,諗起都打冷震。

話時話,個人認為去competitor見工嗰次,自己嘅表現係好好,否則都唔會in到過晒鐘,所以冇回音可能係同我叫獵頭質問個HR有關,或者對方都唔想搞到件事太複雜啩!點都好啦,新工冇著落唯有繼續喺度做,阿Ming著數啲,升職又加薪,幾時輪到老細加我人工呀?


《不能說的秘密》上集
https://hkofficedaily.com/?p=18724

error: