由於疫情關係，有啲朋友真係好耐冇見，趁近半年放寬咗咁多，終於都可以同幾個中學同學食飯，前前後後約咗成兩個月先夾到大家啲時間，呢餐飯可謂得來不易。
上次見佢哋已經係兩年幾前喇，所以當晚咩都傾，少不免梗會想當年，我哋四條仔之所以比較close，係因為以前一齊踢波，其實仲有其他人嘅，但有好多同學都結晒婚喇，有啲仲做埋爸爸，嗰班仲忙仲難約，唔緊要啦，幾個單身寡仔約咗先囉！
傾傾下大家講到而家份工同埋收入，Kenneth同Ray都係IT人，前者啱啱轉工，新公司月薪55,000，而Ray都有48,000，然後Bruce就話佢兩個人工好高，其實大家都出咗嚟做嘢10年有多，呢個價喺IT行業裏面雖然唔算低，但咁嘅年資再高啲人工真係大有人在，所以我聽到嘅時候並唔意外。
輪到Bruce，佢話自己月入50,000，做緊Project Manager，由於PM真係有好多範疇，我唔知道呢個價係咪market price，因為唔熟悉，只係我三個朋友而家都搵到食，問心係覺得好安慰，大家都長大喇！
Bruce：「Anson你呢？」
我：「冇你哋咁叻啦，我得2萬幾咋。」
Bruce：「認真呀？」
我：「我做Sales吖嘛，好浮動，點似得你哋班專業人士吖！」
其實我唔係想講大話，只係覺得……咁樣公開傾人工有啲奇怪，講真連親生老母都唔知我確實月入幾多，所以friend還friend，唔使乜嘢都揭開肚皮嘅。或者你會唔認同我做人咁保留，但真係冇辦法，安全感問題，唔想咁赤裸裸，而且呢度得四條麻甩佬，人工高又點啫，有女喺度就話要認屎認屁啫！
嗰晚餐飯食得幾開心，始終大家太耐冇見，但係過咗一個月左右，我收到Kenneth嘅電話，佢問：「Bruce有冇搵你借錢？」
我：「冇喎！無啦啦借咩錢？」
Kenneth：「Bruce話佢家姐間舖頭生意唔掂，想問我借錢周轉。」
我：「咁唐突？借幾多？」
Kenneth：「借五萬，不過我冇借，本身我覺得自己好衰，舊朋友借錢都唔幫，點講呢，即係話晒咁耐冇見，食完一餐飯就借錢，感覺唔係咁好，點知阿Ray過咗幾日又搵我，原來Bruce都有問佢借錢，佢同Ray講自己隻狗病咗，想借三萬蚊睇醫生。」
我：「冇聽過佢講家姐開舖頭喎，同埋Bruce有養狗㗎咩？」
Kenneth：「咪係囉，Bruce差唔多時間問我同埋Ray借錢，原因仲要唔同，有冇咁巧合呀？」
我：「算啦，真又好假又好，你冇借都唔使內疚喎，人人都有自己嘅生活同負擔。」
Kenneth：「冇呀，想睇下佢有冇問你借啫，點解淨係問我同阿Ray？」
我：「可能佢上次聽到我人工低啦，唔好意思開口啩！」
聽完之後對Bruce都幾失望，咁耐冇見，點解朋友之間嘅關係唔可以單純啲，而係要咁有目的呢？Friend唔係咁做㗎！
其實我喺公司嘅Title已經係Sales Manager，每個月二萬幾係真嘅，但二萬幾係講緊commission，我basic salary有 45,000，所以平均月入大約係6萬幾蚊，公司啲客同埋單量好穩定，只可以話比上不足，比下有餘，大把人出嚟做10年嘢有車有樓，叻過我多多聲，問題係賺多又好，賺少又好，唔係搵得多就要亂咁借畀人，搵錢好辛苦㗎！
不過Bruce最後都冇搵我借，可能佢已經諗到辦法啦！唔知點解呢，我覺得或多或少都同當晚人工報細數有關，佢哋個個都話自己搵緊五皮嘢左右，Bruce應該費事搵我呢個月入得二萬幾嘅死窮鬼😂我當係逃過一劫㗎喇，因為要拒絕借錢畀朋友，都真係幾尷尬幾難開口，處理得唔好仲隨時會反目，Bruce冇打我主意就最好喇。
投稿讀者：Anson