想問大家遇過最衰最仆街嘅上司係點？做reference check特登唱衰前下屬，搞到對方連新工都冇埋夠唔夠衰？
我前上司就係一個心理咁變態嘅女人，基本上離開咗嘅同事如果之後搵工要做reference check，佢一定會寫衰或者唱衰舊同事（視乎個reference check係用email做定係電話做），呢樣嘢已經得到證實，因為唔止一個舊同事見新工做完reference check就衰咗，新公司直接同返佢哋講係前上司comment好差。
然後一班離職舊同事折墮成點呢？Resume要skip咗曾經喺度做過，一係就周圍搵我哋班現職同事幫手做reference check嘅contact point，總之唔可以經前上司呢個癲女人，否則你搵新工就九死一生。
用心理變態形容呢個癲女人已經好斯文，因為佢做嘅嘢真係斷人衣食。
呢個前上司係會辱罵人，例如話同事係「人頭豬」，同事請假會話人哋係「病壞」，你做錯嘢佢會叫你：「唔識就問，唔好自把自為」，但你問嘅時候佢又會話：「唔好乜嘢都問，自己用下個腦」，我都畀佢鬧過，亦都同佢嘈過，最後迫到我內部轉去第二條team，以上只係節錄佢嘅惡行，因為重點唔係講佢點衰，而係想講有人整治到佢。
有一日，呢個變態女人突然捉晒我哋入房，佢話自己受到電話騷擾，對方打嚟用粗口鬧完佢就收線，頻率係每兩三日一次，由於用粗口問候佢嘅人係打直線，所以呢個癲女人冇得避。
我雖然聽唔到人哋喺電話點鬧佢，但就見過佢接完電話之後發晒脾氣咁話：「你再打嚟我就報警！」又或者話：「你係邊個呀？講夠粗口未呀？」因為變態女人茅頭直指已離職嘅同事，佢仲係咁問我哋知唔知邊個做，其實鬼知咩！呢間公司同佢有牙齒印嘅人，新舊加埋起碼有幾廿個，淨係計佢reference check唱衰嘅舊同事都唔少，同埋呢個女人個格衰成咁，出面肯定仲有其他仇家啦！
我估疲勞轟炸真係會迫到一個人發癲，大家都留意到變態女上司收到滋擾電話嘅次數愈嚟愈頻密，由於佢唔係坐房，每次佢收到電話之後都會好大力cut線，仲會自言自語喺度鬧空氣，間唔中又重複問我哋知唔知邊個做，所以大家好容易知佢幾時又收到呢啲電話，後期愈嚟愈密，幾乎一日一次，我哋仲留意到一樣嘢，呢啲粗口電話雖然不定時，但Happy Friday臨放工前例牌有幾個，應該係想癲女人weekend都過得唔開心。
佢透露過自己有報警，不過警察話做唔到啲乜，只可以備案，雖然可以check下係咩number打嚟，但對方如果用街邊嘅電話都冇符，呢個變態女魔頭好少會同我哋講得咁深入，所以你feel到佢真係好無助，同埋佢不嬲唔講粗口，突然有一次收到滋擾電話之後發咗癲大叫：「屌吖！屌吖！你屌咗大半年啦！係咪屌呀？除褲屌吖！」
嗰次直情驚動埋老細，因為癲女人發狂同粗口還擊嘅時候，公司係有客喺度，所以老細捉咗佢入房，至於係照肺定係安慰，咁就冇人知喇。
雖然女魔頭講嘢好mean好賤，但真係從來唔講粗口，見到佢發晒狂變咗另一個人，相信係情緒方面受到好大困擾，佢有次仲罕有地同我哋呻咗句：「報警又冇用，再咁落去精神崩潰！」
係慘嘅，但係公平啲講，佢都令到好多人精神崩潰，之前就有個離職同事因為reference check畀女魔頭唱衰，結果新工冇咗下文（嗰間新公司講明係因為reference check問題），及後失業咗4個月，人哋屋企有大有細，點解要咁樣害人呢？嗰個同事仲要係公認嘅好好先生嚟㗎！
女魔頭成為我嘅前上司唔係因為我轉咗team，亦唔係因為我轉咗工，反而係佢上年辭咗職冇做，聽返啲高層講，個癲女人話自己好攰，咁究竟好攰嘅意思係工作咁多年好攰，定係日日收粗口電話好攰呢？咁就不得而知喇，相信唔係長年累月畀人粗口問候所以辭職啩，係就係好困擾，應該未至於要犧牲份工去避嘅，不過佢走咗之後，全公司嘅人的確開心晒。
後來有個同事私下認咗滋擾電話關佢事，原來呢位同事成日返去同男朋友講工作唔開心，仲曾經發生過一件事令佢好憎女魔頭，咩事就唔方便喺投稿講，免得女魔頭有機會見到然後追究，總之呢位女同事嘅男友聽完好嬲，所以三日唔埋兩日就打嚟用粗口問候個癲女人，後期見得閒仲一日幾次，我哋圍內聽完就叫佢唔好同人講，呢啲嘢在心中算喇，雖然咁樣滋擾人又真係……不過係有少少心涼嘅，Sorry囉！
投稿讀者：真係唔開得名