發現新人份糧多過自己

兩個月前辭職,當時份糧係$21,000,遞完信之後公司同我講加$500,問我留唔留低,I say no,然後佢哋出招聘廣告請人頂我,唔夠兩個禮拜就有新同事返工。

呢段交接期同replace我嗰位新同事相處得唔錯,始終要教佢做嘢,交流比較多,連食lunch都會一齊。

可能新同事覺得工作內容繁複同埋瑣碎,有次食飯佢無意中呻咗幾句:「呢度啲procedure都幾麻煩,同埋好多嘢我以前間公司冇接觸過,好在有你帶住我,如果唔係都唔知點做,你仲有唔夠一個禮拜就走,希望喺你走之前學得識啦!」

我:「唔使擔心嘅,你之前係in house,我哋呢度就係agency咁,一定多下欄嘢,慢慢學啦!」

新同事:「開始覺得自己戇居,之前份工$25,000,而家平手過嚟又係$25,000,不過workload大咗好多,我好佩服你,office hour已經夠忙,放咗工仲要喺屋企覆email執手尾,我上一間公司唔係咁,收工就係收工。」

佢唔戇居,覺得戇居嘅應該係我先啱。

當新同事講完自己份糧係$25,000之後,我已經冇乜心機再聽佢呻落去,我$21,000,佢$25,000,有好多嘢佢真係唔識,甚至係未接觸過,但佢一起步嘅人工已經多我$4,000,嗰種心情同感受真係唔識形容。

最後幾日心理上好難平衡,由一個$21,000嘅人教一個$25,000嘅新同事做嘢,佢嚟緊嘅工作同我以前一樣,點解可以咁唔公平?不過我對新同事依然好好,傾囊相授,因為佢根本冇錯,問題只係我公司對待舊人嘅取態同埋做法。

對舊員工畀最低待遇,寧願付出更多請新人返嚟,任由舊人心灰意冷離開,相信唔止得我呢間公司係咁,我都有檢討過自己係咪唔值$25,000,仲記得被挽留時,公司只係話會加我$500……哈,其實都幾侮辱。

諗諗下,呢種文化亦不僅限於職場,你去join某個台睇波,咪又係新客戶抵啲,又送嘢又送多啲頻道,舊客戶?話之你啦,你都join咗咯;電話上台,咩新客戶帶number過檔又係咁,月費平過舊客戶,著數多過舊客戶,全部都係同一道理。

其實一間公司冇舊客,又點可以發展到今時今日招攬新客;而一間公司冇舊人開山劈石,又點可以發展到不斷擴充請新人呢?

當我走咗之後3個星期,舊公司突然搵返我,佢哋冇傾條件,只係問咗我一句:「你有新工未?Replace你嗰個人走咗」

我:「有喇,我返緊新工。」然後我就匆匆收線。

我份新工得$24,000,因為舊公司之前個價太低,導致我跳出去嗌唔到咁高,不過我相信自己好快就會有$25,000甚至更多,相反地如果留喺舊公司,幾肯定兩三年後都加唔到幾千,所以我唔後悔走,只後悔走得遲。


對2017年呢個舊故事有冇印象呀?當時我仲做緊headhunt,啱啱搵返出嚟upload上網站。

《莫道你在選擇人,人亦能選擇你》
https://hkofficedaily.com/?p=18615

error: