坦白講，我真係好想奧運快啲完，唔係唔支持奧運，而係老細嘅行為實在太嘔心。
我受僱於一間餐廳，職位係擔任佢哋社交平台編輯，亦即係小編，老細唔識體育，亦唔鍾意體育，但為咗hit rate日日叫我哋出post講奧運，第一個post就係張家朗拎金牌，當日老細係咁講：「出個post話張振朗拎金牌吖，快！好多page都出咗，唔好執輸，tagline打啲香港驕傲呀嗰類。」
我：「老細，係張家朗，唔係張振朗。」
老細：「是但啦，你係咪仲要同我拗呀？快啦！」
我自己係一個體育迷，亦都好支持香港運動員，但係「支持」同埋「消費」係兩回事，支持可以擺喺心，可以喺電視機前面熱烈打氣，可以inbox運動員講鼓勵說話，最重要係除咗奧運呢類大賽，平時都要留意佢哋，而消費就係借助運動員去搵著數，仲有一樣嘢未同你講，何況我哋係一間餐廳，換言之個facebook page本來係講食物，同奧運風馬牛不相及。
奧運期間社交媒體資訊單一
做人當然唔可以咁死板，邊個話餐廳page唔可以講奧運？香港運動員咁犀利攞到好成績，連我阿媽呢啲師奶都參與討論啦！問題係我哋個餐廳page喺奧運期間完全冇講過任何本業嘅嘢，老細見張家朗個post多like、多engagement、多reach，跟住就日日叫我講奧運，一個關於餐廳同食物嘅post都冇出過，呀…都有嘅，當何詩蓓拎埋牌之後，老細指示我出post－－－只要你叫張家朗或者何詩蓓，埋單減20……
減20，不如唔好減啦！淨係識消費香港運動員。
其實奧運期間好多page都係脫離本業變咗「體育版」，香港人又真係全部like晒，呢段時間嘅資訊係非常單一同埋疲勞，你打開facebook可以連續十幾廿個post都係講同一樣嘢，人人都係爭like、爭engagement、爭reach，拎牌講恭喜係好合理，但點解要單一到咁呢？香港運動員唔係用嚟幫商業機構呃hit rate嘅工具呀！
李慧詩壓軸登場，老細指示要做定3幅圖，配以tagline奪金、奪銀、奪銅，加多個「雖敗猶榮」，佢話：「最緊要快，一過終點就要出，要爭頭啖湯！」我真係覺得呢種行為好虛偽，究竟利用香港運動員搵夠著數未？人哋辛辛苦苦訓練，苦候4年（5年）出戰奧運，唔係為咗幫你哋呢啲本身唔係講體育嘅商業page呃like刷存在感賺follower㗎！口講尊重，實際利用！
偷記者相嚴重侵犯版權
再講多一樣嘢，奧運有得去東京直擊嘅傳媒大家都知道係邊幾間，好多page根本冇記者喺當地，你猛出post上晒身做「體育戰報」，結果就要周圍偷相，啲人覺得copy and paste唔係偷，cut頭cut尾唔叫偷，其實偷就係偷，有版權㗎！而且好多相都係記者辛辛苦苦影返嚟，唔該都冇聲就拎咗去用嚟自己出post，咁肉酸就唔好學人講咩香港精神啦！
我唔肯偷相，老細問可唔可以cut其他傳媒嘅相，反正張張都一樣，我話唔得，然後佢問買相幾錢，我開咗getty image畀佢睇，老細見到一張相咁貴，又話直接影電視螢幕。（編按：Getty Image係照片庫，主要分為月費或逐張照片購買）
老細話可以正常時間睇愛回家
今次東京奧運，我哋個餐廳page多咗500幾個followers，但係老細星期日講咗句咁嘅說話：「正，終於可以睇返愛回家，呢兩個星期電視節目時間亂晒，悶到呢！好在出奧運post多人like咋，嚟緊係咪有殘奧呀？記得日日出post喎！」
我好支持香港運動員，但今次奧運見到有啲商業機構好醜陋，本身唔係講開體育，亦未見過佢哋講體育，點知一下子就全部變晒體育版，執口水尾偷相乜都齊，目的係點大家心中有數，最心痛係明眼人原來並唔多。
投稿讀者：餐廳小編