我公司個年齡層相距好大，呢度大部分同事都做咗10年以上，20幾歲嘅得四個人，有兩個男Sales，仲有我同埋另一位女同事。
Sales好少留喺office，所以我同另一位女同事通常都係孖住食lunch，嗰日食完就順便買兩杯珍珠奶茶，諗住晏晝一路做嘢一路飲，好正常啫係咪？全香港唔會得我哋兩個女仔係咁啩？
點知返到office冇耐，老細叫咗我哋入房照肺，唔係工作上做錯嘢喎，原因係嗰杯珍珠奶茶，老細係咁講：「你哋咁樣咪唔識做人囉，應該買埋畀其他同事吖嘛。」
我：「點解呀？」
老細：「你兩個自己買自己飲，好似搞小圈子咁，有冇考慮過其他同事會有hard feeling 㗎？」
同我一齊被訓話嘅女同事答：「有咩hard feeling呀？佢哋都未必飲啦，又唔知佢哋飲乜？唔通喺街逐個同事打去問呀？」
老細：「你唔使問㗎，呢啲嘢自己識做啦，買咗返嚟大家自然會飲。」
我：「公司成廿幾人喎……」
老細：「我當你20蚊一杯，請晒啲同事飲都係400零蚊，而家你哋好似自成一格排斥其他人咁。」
我：「但點解要我哋請？」
老細：「冇點解㗎，咁咪就係唔識做人囉！」
痴線！小學雞呀？定你真係好想飲珍珠奶茶，冇買埋你嗰份所以躁咗呀？
最癲係出到嚟之後，有個Senior同事問我哋做乜畀老細捉入房，佢聽完竟然話老細講得啱，話做人處世就係要咁，仲叫我哋好好記住，當上咗一課袋錢入袋……
我哋兩個喺公司入面只係小妹妹，從來冇奢望老細同其他senior請我哋食tea飲嘢，但佢哋竟然覺得我去買杯珍珠奶茶返嚟就要請晒全公司飲，唔係孤寒嘅問題，而係呢個規矩同要求唔合理吖嘛！仲要叫我當金句咁樣記住？
好想引用近期好hit嘅一段文字：
四十年前，人們驚呼武俠小說會毀掉下一代；三十年前，人們驚呼流行音樂會毀掉下一代；二十年前，人們驚呼電視節目會毀掉下一代；十年前，人們驚呼互聯網會毀掉下一代；現在，人們驚呼遊戲會毀掉下一代；
人類發展的歷史一再證明，沒有任何力量能毀掉下一代，除了上一代！
投稿讀者：Becky