老細係英格蘭狂迷 捧歐國盃放假一天

我老細雖然係香港人,不過佢細細個就喺英國讀書,畢業後仲喺當地做咗幾年嘢先返嚟,輾轉間創業開公司,而家個老婆都係英國人。

由於老細見到單新聞關於英國Tesco星期日提早閂門,特登畀員工返屋企睇歐國盃決賽,所以佢有樣學樣,仲話星期一無論賽果如何,大家都可以11:00先返office,咁都唔錯吖,難得老細咁體諒。

佢向我哋作出承諾,只要英格蘭喺歐國盃決賽贏到意大利攞冠軍,全公司就可以放假一日,但係有啲唔睇波嘅女同事反對,佢哋話場波凌晨3點先踢,唔想起身先知道使唔使返工,結果老細就話英格蘭一旦捧盃,星期一會出錢叫到會齊齊食,然後星期二先至全公司休息一天。

其實老細唔係第一次有呢類獎勵㗎喇,之前歐聯決賽佢都講過只要曼城捧杯,就會請晒我哋去食buffet同埋放假一日(我哋公司唔大,暫時得12個人),可惜上次曼城輸咗比車路士,無緣享受呢個bonus。

老細話自己識基爾獲加、史東斯、史達寧……是但啦,我都識佢哋,不過佢哋唔識我之嘛!佢間房掛滿曼城同埋英格蘭波衫,用相架鑲住嗰隻,真係徹頭徹尾嘅足球狂迷,咁都幾過癮嘅,唔好下下講工作,有時真係要有其他娛樂調劑下,有啲女同事根本唔知歐國盃係咩事,但佢哋覺得有假放就Ok,所以變晒英格蘭球迷,仲問碧咸有冇份踢。

最癲都唔係呢啲,其實英格蘭贏又好,意大利贏又好,都係一場足球比賽啫,但我老細癲到因為今次歐國盃走咗去紋身,佢上星期畀我哋班同事睇,紋咗喺手臂,係英國旗再寫住Euro Winner 2020,仲話老婆係英國人都鬧到佢飛起,咁又真係冇彎轉嘅,冇年份都話啫,有年份真係下屆先贏都搞唔掂🤦🏻‍♂️如果意大利攞冠軍就好笑。

其實我自己係意大利球迷,仲要幾唔鍾意英格蘭,四強已經捧丹麥爆冷,可惜輸個12碼。我由迪比亞路嗰陣鍾意到而家,所以歐國盃決賽對我嚟講真係冇得輸,最好梗係意大利贏啦,就算英格蘭捧盃,星期一有得食到會,星期二又可以放假,正!我會買定啤酒花生薯片,到時印印腳睇波。

投稿讀者:音樂比利


睇波不賭波就最好,否則隨時會好似以下呢段投稿咁樣🙈

《同事因錢銀問題嘈交,上司愛莫能助》
https://hkofficedaily.com/?p=15321

error: