你唔好意思推佢 又好意思推我?

早排見咗幾份工,其中一份嘅過程好smooth,我稱佢為A公司,見完一round之後隔兩日,佢哋已經打畀我confirm offer,講實幾月幾號返工,但做人同搵工永遠都係瘦田冇人耕,耕開有人爭,呢個時候,另一間B公司又打嚟畀offer我。

B公司係接近兩個月前去見,視像見咗第一次,再上佢office見咗兩次,Total 3 round,如果等佢offer開飯真係餓死咗,點知個HR喺電話同我講:「咁你都未返新工,點解唔揀我哋呢份啫。」

我:「應承咗嗰邊喇。」

B公司HR:「應承咗可以推㗎。」

我:「答應咗點好意思推?何況你哋隔咗好耐先打畀我。」

HR:「你唔好意思推佢,又好意思推我?」呢句都真係幾痴線。

我:「其實唔係先後問題。」

HR:「嗱,都係嗰句啦,你唔好意思推佢,點解又好意思推我先,我教你點樣reject嗰邊啦好冇?你話有個更好嘅offer,見咗好耐,不過啱啱先confirm,人哋HR會明白㗎喇,只要講得有禮貌啲就得,而且盡早同佢哋講聲,可以主動打去,等佢公司快快手再請人。」

我:「哦,咁我而家推你吖,份新工早兩日cofirm,人工同福利都好啲,而且地點上比較便利,所以希望你明白,我點都會揀嗰間,多謝你先,希望你哋快啲請到適合嘅人。」

咁樣啱喇啩!我係咪好有禮貌?

HR:「你唔可以淨係睇錢喎,你都要衡量邊間公司大啲,邊間有前途啲。」

我:「啱呀,另一間大啲㗎。」答得好厚道啦,打工仔唔睇錢咁睇咩?唔通睇下邊個HR靚啲咩。

HR:「咁你即係寧願推我都唔推人哋啦!」又repeat……

佢唔做sales嘥晒,究竟chur完未呀?而家都話係人工、福利、地區,仲有公司規模問題,你公司通通都比下去,唔係買件衫,我鍾意呢件,如果鬆動可以買多件,返工只可以揀一份㗎咋,我梗係揀份現階段對我嚟講比較好㗎啦!

我:「唔係寧願推你唔推佢,而係就算你哋同一時間出offer,我都覺得另一份比較適合我。」

結果佢繼續chur咗我10分鐘先收線。

由一間公司嘅HR教我推另一間公司嘅offer,人生真係第一次遇到,老土啲都要講句,莫道你在選擇人,人亦能選擇你,candidate點會淨係見你一份工呢?咁我有其他offer,好自然就會比較㗎啦,你估愛情呀?痴痴咁等足一世?

無可否認,如果兩個月前佢請咗我,我就冇機會去in A公司,但而家有比較,咁自然會有取捨。有時啲interview同埋揀人過程真係拖得太耐喇,明白每間公司都有內部程序,但唔好忘記你揀人嘅同時,求職者自己都有其他諗法或者會去過濾。

不過講時講,佢嗰句:「你唔好意思推佢,又好意思推我?」真係有少少嚇親我,唔講以為係女朋友發緊脾氣,希望呢位HR下次對住其他candidate唔好咁癲啦!

投稿讀者:瘦田


其實等兩個月先有feedback都未算好慘,之前有一段投稿,candidate上到去發現冇人識得in佢,結果要自問自答……

《未試過見工見到咁淒涼》
https://hkofficedaily.com/?p=9844

error: