最近睇到有條片踢爆speed dating公司「冇貨扮有貨」，甚至叫職員假扮單身member，令顧客信以為真花錢買package，十分之無良。
我將條片send咗畀幾個會員睇，點知有一男一女會員覆返我，話條片已經係一年前，而佢哋竟然都有中伏經驗，過程大同小異，其中一個女會員話，自己剛剛好30歲，不過嗰間配對公司竟然連續介紹咗三個50到尾嘅男人比佢，頭兩個佢都唔肯見，直至第三個終於心軟出去食咗餐飯，自言感覺好唔自在，好似老竇同個女出街咁。
呢位女會員仲向我反映，嗰間配對公司嘅男負責人似乎想食女，成日WhatsApp佢講埋啲無謂嘢，其中一次仲疑似性騷擾，對方扮晒幫公司做問卷調查，WhatsApp問佢上次做愛係幾時？如果未搵到男朋友會唔會接受SP？
「好明顯佢係試緊我，佢用問卷調查做牌頭，肆無忌憚咁問好多露骨嘅問題，總結就係想知你會唔會接受有SP，我覺得隨時有其他女仔中咗招，個男負責人根本其身不正。」
仲有一個男會員同我分享，自己畀咗5位數嘅錢去join，但一直都冇幫佢約到異性出嚟，唯一貢獻係教佢點著衫同埋點樣同女仔講嘢，而其實呢啲所謂嘅service都係廢話，旨在拖延時間，扮到好有心幫人搵另一半。
期間嗰間配對公司介紹過一個女仔畀佢，雙方以WhatsApp溝通，個女仔永遠都唔肯出嚟，不過就keep住用說話氹佢，講到大家好有機會發展咁，睇完記者踢爆嗰條片之後，佢表示如夢初醒：「而家終於知道個女仔點解永遠唔出嚟，又keep住要令我覺得有機會，原來係搵女職員扮，其實我懷疑都未必係女職員扮，可能我一直同個男人傾WhatsApp都唔出奇。」
事實上，Speed Dating呢行一直都有害群之馬，就算係平價嘅配對活動例如10男10女嗰種都好，Speed Dating公司都不時會搵自己人做媒，一來湊夠數，二來想提高質素，因為佢哋控制唔到嚟參加嘅顧客係咪靚仔靚女，咁咪要搵啲外表唔錯嘅friend嚟玩囉！
另外有啲Speed Dating公司就亂咁介紹異性畀會員，例如個女仔要求40以下，整潔，順眼，五官端正，可以等足幾個月都未安排到一次見面食飯，之後就算有介紹，出到嚟就變咗50幾歲大肚腩阿叔，係同會員最初嘅要求完全相反。
我認為最過份始終係負責人藉詞做問卷調查，不斷旁敲側擊問女會員接唔接受SP，換言之呃完人哋join package嘅錢，仲要呃埋蝦條，呢樣真係十分之離譜。
＝＝＝＝
❤️ 做人一定要好好保護自己，每日都有好多騙財騙色嘅真實故事。
《前男友以裸照影片勒索，威迫發生性行為兼借錢》
https://hkofficedaily.com/?p=14109