有冇試過好鍾意個工作環境，好鍾意班同事，但係為咗有更好嘅發展同「錢途」，最後都要尋求更好出路？
回想起初初入嚟呢間公司做，舊式工廠大廈係有少少唔開胃，個走廊硬係有浸味，類似嗰種牛仔褲洗水味，我估呢層樓應該有間牛仔褲加工廠之類啩，我都唔知呀，總之就唔好聞囉！
負責In我嘅人叫阿菲，粗聲粗氣嘅女人，不過佢唔係兇我，而係本身個格係咁，簡簡單單嘅interview之後，佢即埸問我可唔可以第二日返工，我答：「當然可以啦！」
講到環境麻麻又accept offer？有乜辦法啫，要食飯吖嘛，見過幾份都冇下文，留喺屋企搵工又要畀老竇煩，老人家好似覺得你有手有腳搵工就一定有人請咁，佢哋嗰代可能係嘅，而家唔同晒啦，你真係可以send 100份CV出去都冇人打畀你㗎，直情會懷疑個電話壞咗或者屋企收唔到訊號，Anyway，我take咗呢個offer，搵到更好先再轉囉！
呢間係細公司，當時連埋我得8個人，阿菲介紹同事都唔使30秒：「呢個阿Pat，嗰個Ronnie，呢個阿欣、Helen、仲有個Angel今日請假，嗰部影印機，呢部水機。」
好似好多女係咪？不過都冇用吖，6個裡面有5個結咗婚，未結婚嗰個大隻過我，生到吳彥祖咁嘅樣都係無用武之地。
「喂！你唔好搞桶水啦！擺低啦！」其中一個同事阿Pat突然大喝一聲。
「屌你，應該做嗰啲嘢又唔做，唔急嗰啲又屎忽痕走去搞！」Ronnie跟住和應。
「張生份quotation你睇咗未呀？覆人啦！」阿欣又屌埋一份。
阿菲向住我講：「唔使理呢個人㗎！Roger麻煩你推嗰幾桶水埋一邊吖。」
我：「好，冇問題。」差啲唔記得介紹，我自己叫Roger。
阿菲口中嘅「呢個人」，係一個大約40幾50歲嘅男人，佢個look好似老咗嘅大雄，四眼，髮型同大雄係完全一樣，我走埋去幫佢將嗰幾桶蒸餾水推埋一邊，呢位大雄仲好有禮貌咁同我講唔該。
仲有一位同事Helen，頭先佢講緊電話，啱啱收線，又對住大雄講：「噚日畀你嗰疊嘢睇咗未呀？屌你唔催就冇咗回事呀？」原來頭先Helen未得閒屌佢，大雄都幾慘，好似人人路過都要向佢屙篤尿咁。
大雄：「得得得，轉頭畀你，好快！」
阿菲：「轉頭轉頭，轉頭畀個美國總統你做好唔好？」
如是者，大雄就畀人呼呼喝喝咁度過一個朝頭早，我淨係幫手搬蒸餾水嗰陣同佢say咗個hi，其實好想正式問佢叫咩名，但係大雄坐最後，我坐最前，成朝都冇機會，直至放lunch。
Helen：「食飯食飯，Roger第一日返工，係咪飲茶？」
我：「冇所謂呀！」
阿菲：「咁行啦，搭正1點就多人㗎喇。」
結果我哋成班人浩浩蕩蕩咁出發。其實大雄都幾活潑㗎，雖然佢係年紀最大嗰個，但可能完全唔介意畀人寸畀人窒，所以大家都不斷同佢講嘢，我諗呢啲就係所謂嘅「下靶」，每個圈子都有呢類人，長期做一個被取笑嘅角色，因為抵得諗，某個層面嚟睇都叫做受歡迎。
埋單嘅時候我有作勢畀錢，有啲公司係舊人請食飯，有啲就係新人請食飯，我都唔知呀，係咁易都要拎個銀包出嚟嘅，或者佢哋興AA制呢！
阿菲：「收返埋個銀包啦Roger，第一日返工，梗係有大食大。」
呢個時候，大雄竟然畀咗張卡侍應埋單……
我：「喔，唔係咁好嘅。」
Helen：「唔咩咁好吖，梗係老細請啦！」
阿欣：「頭先冇一人一個灌湯餃都便宜咗你喇。」
大雄：「我話請㗎！你哋唔剔之嘛。」
Ronnie：「收嗲啦！費事你破產呀，一陣月尾冇糧出點算？」
等陣先，呢個人人路過都可以對住佢屙篤尿嘅大雄係老細？點解呢幾個女人可以成朝係咁輪流屌佢嘅？點解佢完全無火，從來都唔還口，仲要畀班員工點佢做呢樣做嗰樣嘅？
離開酒樓行返公司嘅時候，大雄終於正式同我講嘢：「Roger你之前做咩㗎？」
我：「我之前做Assistant Merchandiser，同呢度都幾唔同，多謝你哋畀機會我。」又話係老細？我份CV都未睇過？你唔使睇咗先決定請唔請我㗎咩？我初時仲以為阿菲先係最大粒嗰個。
大雄：「冇乜所謂啦，唔識可以學到識，邊有人一生出嚟就有相關經驗㗎！」
傾咗兩句，阿菲又開始鬧大雄：「你冇拎電話呀？你老婆打畀我嘅？」
大雄：「頭先趕得滯唔記得拎電話。」
Ronnie：「你次次都唔記得拎，丟撚咗個電話佢啦！」
阿欣：「腦裝屎㗎！」
死喇，本身我好可憐大雄，但係見人人都屌得咁過癮，有啲衝動想屌埋一份添，呢間公司究竟發生咩事？其實大雄…即係老細，佢份人幾好幾隨和㗎喎！
返咗一星期，除咗棟工廈之外，我覺得其他嘢係ok嘅，同事都好肯教我，然後有一日大雄老細叫我陪佢見客，阿菲聽到就話：「你同Roger兩個？唉唔好喇，我同埋你哋一齊去。」
睇嚟大家都對老細冇乜信心，當時我有個疑問，就係大雄好似廢廢地咁，佢點解可以做到老細呢？人人都可以屌老細，咁樣真係得㗎咩？
（未完待續）
====
⭐ 今日仲有另一段文講無良配對公司呃人，雖然你未必會參加Speed Dating，但係都可以了解下而家啲騙徒有咩古惑手法。
《Speed Dating公司負責人想呃女會員做SP》
https://hkofficedaily.com/?p=17499