前男友以裸照影片勒索 威迫發生性行為兼借錢

有個女會員向我哋透露,之前只會玩交友app識朋友,而家畀錢嚟speed dating公司,原因受過一單極慘痛教訓,我問可唔可以寫出嚟畀多啲人引以為鑑,佢話ok,希望大家唔好學佢咁蠢。

兩年前,Penny喺交友app識咗個男仔,出過幾次街見幾穩重,加上出親嚟都係西裝骨骨,所以Penny覺得ok,結果兩個人就開始拍拖。初頭嘅甜蜜期一切正常,都係同普通情侶一樣,後來Penny發現個男仔仲有玩交友app(出街時見到個app彈msg出嚟),追問之下,男方坦承唔止佢一個女朋友,咁Penny亦自然提出分手。

過程冇咩特別,以上應該係唔少情侶嘅寫照,但問題係佢兩個如膠似漆嘅時候影咗好多私密照同親熱影片,就好似耐唔耐大家會見到嗰啲「流出」一樣,Penny要求個男仔delete,對方答應,點知原來有留底。

佢哋分手後兩個月,呢個男仔要求同Penny打友誼波,Penny本身已經冇理會,但係個男仔喺WhatsApp send咗條片同幾幅相過嚟,全部係當時情到濃時拍低嘅,Penny質問男方點解冇遵守承諾delete,男方話平時用嚟自己J,而家要求Penny做炮友,如果唔係就將啲片同相send出去。

Penny自認太蠢,竟然相信答應就範可以換返呢啲不雅照片同影片,但係個男仔得手咗一次,就不斷強迫Penny做第二次第三次……更甚嘅係,呢個男仔之後不單止騙色,仲騙埋財,多次向Penny借錢

(其實我聽返都唔算係借,會還錢先叫借,佢直情係勒索),每次三千五千。

Penny話有諗過報警,但好驚呢位恐怖前男友真係公開啲片同埋相,佢一諗起到時所有討論區同埋TG group嘅人都睇到自己全相,就會瞓唔著同打冷震。

最後點收科呢,個男仔苛索金錢愈嚟愈密,Penny話自己冇晒錢,個男仔仲迫佢去問財仔借,唔借錢又威脅要公開私密照,最終Penny選擇同個friend借錢,佢個friend問多兩問,Penny先將成件事和盤托出。

聽到呢度已經好嬲,我同Penny講,呢個係無底深潭,係咪將來你有新男朋友甚至一個家庭,都仍然要一世被人威脅呢?Penny話佢個friend又係咁講,仲分析得好長遠同仔細,結果個friend冇借錢畀佢,而係同佢一齊去報案,最後警察叫Penny假意約個男仔出嚟交收金錢,伺機埋伏再捉埋個男仔,事件先至告一段落。 

個人有少少總結,世界上所有關係都唔係永恆,朋友會變,同事會反目,甚至親人都會鬧不和,男女朋友嘅感情世界更加千變萬化,無分交友app定係speed dating認識。

我明白情到濃時真係會做好多肉麻嘢同埋露骨嘢,但喺呢個變化莫測嘅世界裡面,千祈唔好貪一時快感而有痛腳畀任何人揸喺手,就算唔係反面收場,跌咗個電話,或者拎部電腦出去整,分分鐘都會令呢啲咁私人嘅嘢流出,唔係只幫女性發聲,即使男仔都一樣,大家一定要保護自己呀!

error: