當晚收到Tina BCC嘅全公司職員薪酬excel表，我買咗薯片同啤酒返屋企一路睇一路食，刺激過睇英超。
第二日返到office，我開始出現幻覺，無論望住邊位同事都好，佢哋頭殼頂都會浮現一塊價錢牌，我試下形容，由一入門口同Reception姐姐講早晨開始，我已經見到佢頭頂show住HKD 14000，行返埋位期間望到嘅每位同事都有價錢牌，左手邊呢個HKD 15000，右手邊嗰個HKD 22500、HKD 18000、HKD 24000、HKD 27000，連茶水阿姐頭頂都有，HKD 11000，唔可以再咁樣落去喇，同事有名有姓㗎，茶水阿姐叫蓮姐，佢唔係叫HKD 11000呀！
Frank成朝冇做過嘢，係咁WhatsApp我講是非，原來佢都有相同嘅幻覺出現，但價錢牌唔係懸浮喺頭殼頂，而係刻住喺每個人嘅額頭，Frank仲話同我睇到嘅數字有出入。
我：「乜你同我收到嗰份salary excel表唔同㗎咩？」
Frank：「一樣，不過我幫佢哋計埋強積金，你見到Lawrence 5萬，個表係未扣MPF，所以我見到嘅係HKD 48500，我計得好準。」
使唔使扣埋MPF咁精密呀？
雖然小弟人工唔係最高，亦都冇房坐，但假假地都係一個department head，所以我個位係最後，然後我親眼目睹一個奇景～～～觸目所及，10個有8個同事係同一時間睇緊求職網站搵工，另外有兩個分別上緊Facebook同埋淘寶，絕對冇誇張，大家完全冇heart做嘢，今次到我msg阿Frank。
我：「前面左右4行同事幾乎全部睇緊求職網。」
Frank：「正常吖，我都睇緊。」
我：「其實我哋都唔知Tina係咪send晒畀全世界，你覺得所有人都收到？」
Frank：「我只可以肯定答你，有一個人收唔到。」
我：「Jerry？老細？」
Frank：「妖，佢兩個根本知道晒全公司同事人工㗎啦，今朝得一個人仲係好畀心機做嘢，得一個人仲有笑容㗎咋。」
我：「邊有呀？個個都嬲爆爆，再唔係就死老竇咁款，成個office仲有邊個做緊嘢呀？」
Frank：「茶水阿姐蓮姐呀！佢都冇email，我只可以肯定佢冇收過份excel。」
分析能力真係好強，佩服。
唔知係自己心中有鬼，定係一直冇發現office班人不嬲都係咁，總之我就覺得自從Tina投擲完咁大粒震撼彈之後，公司嘅氣氛從此變得不一樣，而成件事最玄嘅係，你永遠唔知邊個手上有呢份excel表。
由於我唔係HR，亦唔知啲法例問題，所以一直擔心Tina咁樣做會唔會有手尾跟，照計就好難冇，但似乎冇人會爆響口自己收到。
高薪低能嗰班仲好意思出聲咩，你唔知醜都匿埋一二邊收收皮啦；平時好勤力但人工原來好低嗰班，相信而家已經滿腔怒火，心理上或多或少仲會多謝Tina「提水」；至於其他同事會唔會報寸呢個問題，除非係同人事部主管Jerry好熟，但係除咗老細之外，Jerry平時係好大鼻，啲人唔憎佢都偷笑，仲向佢提供情報篤灰？有咩著數先？一陣Jerry捉你入老細房交代詳情，最後咪又係搞著自己，何況呢件廢物人工竟然有HKD 68000，你睇過份excel只會對Jerry更加反感，搵唔到任何原因要同佢搏friend。
唔排除同事之間私底下互傳互傾，就好似我同Frank一樣，但始終唔會公開去講，最起碼Frank就唔會同佢好憎嗰個Ophelia傾，佢應該想一刀桶死人㗎喇！而即使Ophelia知道，佢亦唔會同Frank討論。
震撼彈事件之後，公司個氣氛超級奇怪，以前都有人傾計同埋講工作，而家係靜到唔敢大聲講嘢，只見啲人密密篤手提電話，好似各自同自己最friend嘅同事互通msg，好不安……我同Frank都係咁。
呢件事再過多一個禮拜，聽講有5位同事遞信，個別有兩三位同我有工作上嘅接觸，親身向佢哋求證，果然係resign咗。遞信呢幾位同事都有啲共通點，就係平時做嘢好勤力，職位唔高，而人工都below standard（我有比對返個excel㗎），其實喺我哋呢間舊式公司裡面，有人辭職唔奇，但同一時間走5個就比較罕見，仲要5個都係勤力牛。
緊接落嚟嘅日子，公司雖未致於災難性爆發離職潮，但傻嘅都會發現斷斷續續有人resign，頻率比起之前密咗，特別係人工唔高但平時做到仆街嗰班，呢種同事只要每條team走一個，已經足夠癱瘓成個department。
係咪以為懶開嗰班高薪廢物，會因為知衰而變得積極工作呢？諗多咗喇，佢哋邊會有廉恥㗎，只會埋怨、發脾氣、黑口黑面，再互相推卸，所以office變得好唔和諧，部分呃飯食嘅人仲將茅頭指向人事部，因為搞到佢哋忙咗好多吖嘛！默默耕耘嘅人不發一言相繼離開，其實都幾可悲。
愈嚟愈多人遷怒人事部，因為好多空缺都未請到人，再唔係就請得好慢，你試諗下，請完返嚟又要教，pick up唔係兩三日嘅事，最大鑊係新嘅HR姐姐似乎冇乜眼光，隔籬另一條team個manager就同我呻過。
「新嗰個HR係唔識定係求其呢？佢畀我睇嗰啲CV完全唔掂，我想是但請個人返嚟頂住先都揀唔落手。」
我：「真係咁差？如果等人用，會唔會見下先呀？」
「有呀，我嬲嬲地叫個HR同人first in先，覺得好先叫我second in，痴線都九唔搭八，頭先入房見咗個，連自我介紹都口窒窒，I is喎，有冇聽過I is？I is Ken喎！我之後咪同HR講返囉！喂你scan完，見完，比個正常人我啦，唔好嘥大家時間吖嘛，HR仲要閪我面，以前Tina從來唔會咁，揀CV好準，叫得上嚟見嘅人都有個譜㗎！」
我：「呀……不過我真心覺得新嘅HR姐姐態度變得好差，上次畀假紙佢都要閪我面。」
「係呀，你做得唔開心咪唔好做囉，你發我哋脾氣把鬼呀？我一陣就同Jerry投訴呢條女。」
呢位部門主管當日真係走去同Jerry講，須知道Jerry係一個超級要面嘅人，隨即走出房當眾開波鬧個HR，見到都尷尬。
其實HR姐姐之所以閪口閪面，應該唔關份salary excel表事，因為佢本身係知道晒所有人嘅人工，咁嘅態度應該真係做到好攰，啲空缺請極都請唔完，佢又唔知係冇經驗定係亂揀CV，加上各部門主管不斷咁Ban，大家累鬥累，唔好忘記呢間公司嘅人事部唔單止負責請人，仲有好多下欄嘢要做，正常人係承受唔到呢份workload，如果Jerry唔做嘢，佢下面唔請返兩個人就一定冧檔，所以Tina以前真係單天保至尊。
更戲劇性嘅係，畀Jerry鬧完嘅第二日，HR姐姐冇返工，咁你請病假或者事假好正常嘅，不過睇下睇下唔對路喎，連續三日冇返，十幾個空缺又未請到人，而家連CV都冇得睇，咁算點先？
原來HR姐姐已經劈炮，Receptionist同佢有兩句，我哋收到風返嚟，HR姐姐因為當眾畀Jerry鬧，嬲得滯賠錢即走，啲後生仔女真係特別夠薑，唔似我哋班老鬼咁多顧慮。
之前Tina辭職，佢自己幫自己請返個replacement，而家Jerry冇人用要親自落場，但係其他部門又有大量空缺，點收科？迫於無奈之下，Jerry親自做interview ，呢條HKD 68000好精呀，其他position全部hold住，首先請返個HR先，不過佢好似見嚟見去都唔啱心水，明明有一日見到另一位新HR返工，點知隔日又冇再返，我唔知係佢炒人吖，定係新人返一日之後頂唔順。
公司氣氛愈嚟愈差，而Jerry亦萬箭穿心，有dept head直接搵老細投訴，話自己部門勁耐都未請到人……店小二，畀多兩斤花生我，再要一壺上等女兒紅，我要睇戲呀！
又係一個OT嘅夜晚，枱頭電話響起，把聲好熟喎：「Davis，我係Tina，你好嘛？」
我：「Wow，衰妹吖，終於打返畀我喇咩？我仲差你一餐飯喎，上次話咗你走之前請你食飯㗎！」
我冇提及salary excel表事件，因為唔需要，更加唔想捲入其中，我知得多未必係好事，而Tina打嚟主要想講兩樣嘢，第一樣係Jerry打過畀佢，問會唔會考慮返嚟做，人工有得傾，另外可以請多個fresh grad畀Tina做assistant，等Tina可以專心做招聘方面嘅工作，其他嘢交畀個assistant。
我聽完有啲開心，一來Jerry自食其果要認低威，二來Jerry打得畀Tina，即係唔知道震撼彈事件，你睇下，個個同事收到份salary excel表之後都滿肚密圈，只會為自己打算，得鬼閒同你報寸咩！
我：「咁你有冇答應Jerry？」
Tina：「梗係冇啦，見到佢騰晒雞，我就安樂㗎喇，不過我仲有件更重要嘅事想搵你。」
我：「咩事？」
Tina：「我公司有個position好啱你，title一樣，人工多過你而家20%，福利都好好多，你會唔會考慮下？如果ok，我唔出job ad㗎喇，優先預留。」
我：「多20%？有興趣呀！不過喺邊區先？我觀塘返大圍有直接車，如果係港島區就真係要諗諗。」
Tina：「我新公司其實都喺觀塘，前幾條街咋，不如我畀份JD你睇咗先，如果真係有興趣，上我公司睇下環境囉，順便做個樣interview，你肯做就一定請。」
我而家慎重考慮緊，上去睇睇先囉，見一見又唔會少咗忽肉嘅，你話係唔係先？
（完）
⭐辦公室日報IG (@officedailyhk) 夜少少會有個後續彩蛋，如果唔介意，一陣可以稍移玉步過IG望望。