Hello我叫Davis，想講下自己公司嘅情況，有位女同事因為同Manager鬧反，繼而投擲咗一枚殺傷力極大嘅震撼彈，office從此永無寧日。
我哋公司人事部得兩個人，Manager叫Jerry，另外仲有個女仔叫Tina，明眼人都睇得出所有嘢係Tina做晒，Jerry每日返嚟主要係social，除非要請啲好高級好重要嘅職位，否則Jerry連interview都唔會參與，不過公司得80幾人，試問有幾多個senior position吖，有都坐穩晒唔會走啦！何況呢度仲係老派傳統公司，連電腦system都out過人，所以有唔少old seafood疊埋心水喺度做過世。
冇乜大粒職位要勞煩Jerry一齊Interview，所以Tina基本上係負責晒所有請人嘅工作，訂水訂文具又係佢，員工同公司有糾紛都係佢處理，老細出張普通notice都關Tina事，如果唔係呢兩年取消咗Annual Dinner同Xmas Party等活動，Tina甚至要做埋格價同book場，真係千手觀音都唔掂。
Tina嘅工作永遠都做唔完，相反Jerry呢位Manager就好清閒，撩下receptionist傾計，入老細房擦鞋，仲有匿埋自己房同唔知邊個煲電話粥，每日如是，佢份工真係特別好做，其實唔使同Tina比較，就算同其他部門嘅同事比，Jerry都係最得閒嗰個。
我個department比較多OT，日日都見證Tina最少做到7點幾8點，所以間唔中都會同佢傾下閒計，近一年大家再熟絡咗，Tina甚至會同我呻做嘢辛苦，不下一次話Jerry好卸膊，咩都答應老細，但其實所有嘢都畀晒佢做，既冇爭取請多個人幫手，同時又唔肯加佢人工，原來Tina近3年只係加咗$500咁大把，Jerry話市道唔好，冇減人手已經偷笑喎……
Jerry係咪當Tina傻㗎，因為我哋公司仲係好舊式，冇嗰啲咩HRIS system，所以Tina都有份做計糧嘅其中一part，我條team有兩個同事上年分別加咗$1000同$1500，Tina點會唔知呀？
Tina心裡苦，但Tina不說，佢選擇用行動幫自己走出困局，有一日佢走埋嚟我個位講：「我終於的起心肝辭職喇。」
我：「辭咗？定打算辭？裸辭咁勇猛？」
Tina：「聽日遞信畀Jerry，我唔係裸辭呀，有headhunt幫我搵到份工，上星期請咗半日假去interview，頭先啱啱confirm offer。」
我：「恭喜晒呀！人工係咪高啲先？臨走畀我請你食個lunch。」
Tina：「多謝你，人工唔係高啲，係高好多呀！其實比起出面就唔算特別高，係呢度特別低啫，不過新公司想我早一個禮拜返工pick up，我而家有23日大假未清，諗緊扣晒佢定係扣一半折現。」
我：「我同你差唔多，我都有19日假未清，你有23日咁多，唞兩星期啦！剩低幾日咪要cash囉，之前Kimmy、Deon、Michael同埋Leo佢哋resign，咪又係咁樣扣假，工接工好辛苦㗎！」
Kimmy、Deon、Michael同埋Leo分別嚟自4個唔同嘅department，呢間公司大部分同事都有十幾日大假未清晒，可以話係最低消費，老細對於員工用嚟扣假或者折現都冇乜意見，偏偏Jerry就對Tina想扣假early leave好有意見。
Tina翌日遞信，喺房入面同Jerry傾咗好耐，出嚟嗰陣明顯眼濕濕，不過見Tina仲忙過之前，又沉默咗好多，我估計係辭職後好多手尾跟，Jerry又畀說話佢聽，所以我就冇打擾Tina，再隔三四日，有新嘅HR返工喎，相信係請到replacement啦！
又係一個OT嘅晚上，我見公司人少少，新嘅HR又放咗工，所以就主動行去同Tina傾兩句。
我：「有新人接你啦，決定早走幾多呀？幾時last day？」
Tina：「Jerry唔畀我扣假早走。」
我：「有得唔畀㗎咩？唔計之前啲先例，你要賠錢早走，佢都吹你唔漲㗎喎！」
Tina：「Jerry話如果我係要early leave，就唔會出reference letter畀我。」
我：「痴線！據理力爭囉！冇可能唔畀，你做HR熟過我啦！起碼要證明你做咗幾耐，title係乜，呢啲基本嘢嚟，同埋衰啲講句，你自己出reference letter畀自己，再吸埋公司印都仲得，使鬼求Jerry咩，最多之後要reference check就填我個名囉，我幫你做，不過你都confirm咗offer，應該唔使reference check而家呢份啦！」
Tina：「佢話就算出畀我，份reference letter都會寫衰我，叫我求神拜佛第日唔好再轉工，否則將來有其他工要再做reference check，佢會同人講我喺工作上不負責任。」
我：「有冇打算直接同老細講。」
Tina：「我有，老細話Jerry嘅決定就係最後決定，叫我有咩事同Jerry傾。」
又係嘅，你估Jerry平時唔做嘢，花大部分時間去擦鞋，老細會因為Tina呢個小職員而走去教訓Jerry咩。
其實Tina辭職後依舊晚晚OT，仲比之前更忙，似乎係想臨走前做好晒啲嘢，加上咁快手請咗個replacement，好心Jerry就唔好為難下屬啦！
Tina同我講，佢整咗成疊資料畀新嗰位HR參考，仲講明唔介意有事直接call佢，即使佢返咗新工都樂意解答，不過Jerry堅持要Tina做足一個月，明顯係老羞成怒，做埋啲損人不利己嘅嘢，Tina咁多年嚟冇功都有勞，點解唔畀個下屬走得安安樂樂呢？
因為呢件事嘅折騰，我見Tina落晒形，呢段日子未見過佢有笑容。
某一晚準備執嘢放工，Tina行埋嚟同我講：「Davis，我走喇，今日last day，保重。」
我：「Jerry最終畀你early leave呀？」
Tina：「佢唔畀呀，係我堅持要走，冇reference letter都要走，我份新工offer好好，唔想同新老細講遲啲先返工。」
我：「啱，支持你，何況你真係有20幾日大假未清，最多係程序上先賠畀公司，之後佢哋都要出返畀你。」
Tina：「我知，我都唔擔心，我係唔忿氣啫，Jerry除咗reference letter同reference check恐嚇我之外，仲當住replace我個新人面前話我做嘢甩漏，話我做嘢懶散，叫個新人唔好學我咁冇責任感，呢啖氣我啃唔落，所以佢不仁，我不義，你話我小器都好啦，我唔會就咁算，仲有老細，人人可以扣假，得我唔可以，仲冷言冷語，我好失望。」
我：「唔會就咁算？你想去勞工處告佢哋？」
Tina：「去勞工處有咩用吖，晏啲你就知㗎喇，保重啦！」
我：「好啦，總之唔好諗埋一邊，反正轉新工，最緊要工作順利，Jerry唔知你去邊間新公司吖嘛？」
Tina：「佢唔知，冇必要同佢講。」
互相道別之後，我繼續執嘢走人，行到去apm創紀之城5期個巴士站等車期間，電話有提示聲響起，係Tina send出嚟嘅email，不過內容係畀新嚟嗰位HR同事，交代下工作上嘅手尾，另外話附件有份全公司職員salary excel表……我冇睇錯吖嘛？
Tina表面上send email畀新同事，但就用BCC形式send畀我，的確有份excel嘅attachment，我打開嚟睇，Oh my god！由老細到倉工人，全部職員嘅人工都清清楚楚list晒出嚟。
我第一時間睇老細，原來佢自己喺公司每月出13萬，我估都係想有穩定支薪紀錄啫，老細真正落袋點止13萬吖，當我又八卦、又疑惑、又有啲罪惡感之際，手提電話響起，今次唔係email提示聲，係隔籬team另一位dept head阿Frank打畀我：「Davis，你收唔收到呀？全公司同事個人工Excel表呀！」
我：「原來你都收到。」
Frank：「Tina係BCC畀我，所以我唔肯定係send錯，定係BCC畀晒全世界。」
我：「你估仲有邊個收到吖嗱？」
Frank：「唔講呢啲住，仆你個街吖，Jerry條廢柴$68000一個月？條撚樣唔做嘢㗎喎！$6800都畀多佢，你見唔見Ophelia都有5萬幾？我鑊鑊都幫呢條女執手尾㗎！原來佢人工仲多過我，咁以後唔柒幫佢執屎喇，你幾多呀？睇下先，哦，同我差唔多啫，咁都冇咁嬲。」
Frank掛住睇個excel表冇理我，當佢知道Jerry同Ophelia嘅人工不成正比之後已經發晒癲，我真係唔敢想像其他人見到會點，究竟Tina仲有BCC畀邊個呀？淨係各dept head？定係所有同事？
呢粒震撼彈嘅傷殺力太大喇，Tina咁樣做又會唔會有手尾跟㗎？
第二日返到公司，成個office簡直變晒天。（未完待續）
–
《那夜，Tina投放一枚震撼彈》下集
https://hkofficedaily.com/?p=16701
人工呢樣嘢，莫講話同事，就連屋企人知都可能有麻煩🤣🙈
https://hkofficedaily.com/?p=10349