HR：「可唔可以介紹下你自己？」
我：「可以，我叫Johnny，今年42歲，有超過10年駕駛經驗，之前喺一間貿易公司做老闆嘅私人司機，後來轉咗揸Uber半年。」
HR：「Uber好自由㗎喎，點解會唔揸，又再搵返私人司機工作？」
我：「冇錯，Uber係比較自由，但收入方面唔穩定。」
HR：「我之前聽過有人揸Uber月入5萬。」
我：「全盛時期我都聽過，唔知真定假，不過我做嗰陣已經愈嚟愈多人揸Uber，供過於求自然搵少咗，加埋疫情影響，限聚令冇晚市嗰排好靜，有時等半個鐘都冇一張單，我曾經以為係佢個嘢壞咗，所以比較想每個月嘅收入有保證。」
HR：「好，呢度除咗固定月薪$24,000之外，OT都有補水嘅，如果要OT仲額外有$100晚飯錢，不過你要預咗老闆應酬多，好難準時收工，呢方面你有冇問題？」
我：「冇，OT就當賺多啲錢，我好肯做，冇問題。」
HR：「未結婚？」
我：「我single，所以時間上比較好安排。」
HR：「好，其實我哋老闆楊生好nice，同埋要同你講聲先，朝早車老闆返嚟之後，其餘時間你都要睇下楊太有冇需要用車。」
我：「我之前嗰份私人司機都差唔多，仲要車埋老闆個賓妹去買餸，所以明白嘅，完全冇問題。」
HR：「咁樣樣……轉頭落樓下試埋車吖。」
我：「好呀，唔該晒你。」
咩都話好，咩都話冇問題，因為我好需要一份工作，之前幫貿易公司老闆做私人司機係真嘅，揸Uber都係真嘅，Single就梗係真啦，雖然當年我差少少就結埋婚……但我仲有一段隱藏嘅經歷，就係開過公司自己創業，可惜生意失敗，欠落一筆話多唔多，話少唔少嘅債，仲有幾十萬就還完喇，我相信努力做嘢一定得。
其實interview嘅時候唔講呢段經歷，唔係怕畀人知我欠債，只係唔想畀人知我做過老闆，好耐之前見過一份文職，對方HR就曾經質疑，話我做過老闆要走返出嚟打工，驚我會做唔慣。
Send出去見文職嘅CV石沉大海，人到中年，英文又唔好，搵萬零蚊嘅office工，人哋會質疑你，幾萬蚊嘅office工，又點會輪到我，高不成低不就，有一刻甚至覺得社會係唔需要我。
我都想自暴自棄，但債主臨門，連喘息嘅機會都冇，有個朋友係做私人司機，而佢當時要通波仔，手術後想唞一排，朋友知我等開工搵錢還債，又見我有車牌，友情搭夠之下介紹我畀佢老闆，做咗8個月左右，朋友嘅精神狀態同身體狀況都好咗好多，我唔忍心佢要再出去搵工，所以主動叫呢位朋友接手返私人司機工作。
聽落係咪好有義氣？其實我真係好唔鍾意揸車，自己揸都唔鍾意，何妨要揸車搵食。唔好以為每個男人都一定愛車，我就正正相反，一直以嚟都覺得揸車係好攰好嘥精神，總之就唔enjoy啦，不過……我要食飯。
讓返份工畀朋友之後，我都係唔信邪再搵咗陣文職，同樣係過百封CV音訊全無，結果就死死地氣走去揸Uber，屌！個天真係好鍾意玩人，愈唔鍾意，命運愈要安排你做，我仲要係向Uber租車去揸，撞正最初限聚令嘅影響，一到夜晚成條街靜晒，結果我拎住之前8個月嘅私人司機經驗，走去搵返同類型嘅工作，起碼每月收入有數得計吖嘛。
嚟見呢份工之前，我仲in過另一間公司嘅司機職位，個HR好嘢呀，劈頭就問：「點解你之前自己做老闆，而家肯轉行車老闆？」
我出於本能回答：「因為要食飯。」
HR黑面，我真係冇串佢嘅意圖，42歲嘅我已經被生活折磨到收晒火，如果你咁薄皮，一早就唔應該問啲咁低水準嘅問題啦！
愈講愈遠，返嚟先，好在今次見另一間公司嘅司機工作，個HR係正常人，interview過程順利，佢陪我喺樓下等咗一陣，老闆好快落埋嚟準備試車。
HR：「呢位係我哋老闆楊生。」
我：「楊生你好，我叫Johnny。」
老闆：「你好，Queenie你返上去得喇，我叫Johnny車我去食飯順便試車。」
沿途同呢位楊生有講有笑，過程輕鬆，頭先個HR Queenie冇水我，老闆份人係幾nice，而且目測後生過我都幾多，如無意外係32至35歲咁上下，屋企一定好有錢啦係咪？
老闆：「你手車都幾定，唔會chok下chok下，我老婆應該滿意既。」
我：「你唔嫌我慢就得喇，始終載住老闆，我會揸得謹慎啲。」
老闆又重頭問返頭先HR問過嘅嘢，而我亦好有耐心再答一次，畢竟佢冇參與個interview，重複提問都好正常。
話咁快就去到佢所講嘅餐廳門口。
老闆：「停喺紫色衫個女人前面得喇，我老婆。」
我：「收到。」
老闆：「你聽日返工有冇問題？Queenie同你傾咗人工啦嘛？」
我：「多謝你呀楊生，多謝晒，佢有提過下。」你永遠唔會知道一個欠緊幾十萬嘅人，搵到份工係有幾咁開心。
老闆：「你揸返架車返去公司，我會打電話同Queenie講定，聽日返工嘅細節你同佢傾啦！」
我：「知道知道，使唔使我喺度等你食埋飯先，可以車返你走喎。」
老闆：「唔使喇，你聽日先正式返工，我一陣自己搭的士。」
語畢，老闆落車同佢老婆步入餐廳，佢老婆仲向我點頭微笑，女嘅斯文大方，男嘅平易近人，好有夫妻相，將來車佢哋應該唔難服侍啩。
開始咗呢份新工作，楊生對我真係幾好，完全冇老闆架子，如果唔係約咗朋友或者客，佢仲會叫埋我一齊食lunch。記得有一日佢話我外型斯文，一啲都唔似司機，問我點解唔畀啲時間搵文職類嘅工作，咁唔通我話自己生意失敗周身債咩，唯有講另一個事實出嚟，就係英文唔好，咁我英文又真係好水皮嘅。
楊生：「唔好咪學囉，肯比心機冇嘢係唔得，我私人畀錢你學。」
我：「下，咁又唔得，而且平時工作都冇時間。」
楊生：「揀啲星期六日嘅課程啦！我叫秘書搵下，進修永遠唔會遲，一直唔開始先至係最遲。」
佢唔係講下就算，隔咗一個星期左右，老闆秘書真係call我，當時我喺公司樓下洗緊車，佢叫我上去睇課程資料，的確受寵若驚，唔係因為楊生畀晒錢嘅問題，而係佢會將一個司機嘅嘢擺上心。
返工後一段日子，我都車過楊生老婆幾次，用溫文爾雅去形容就最貼切，當然佢冇楊生咁多嘢講，但都係一個好人。
不過有錢人嘅世界又點會咁單調同乏味吖，有一日楊生叫我去一個地方接朋友，途中佢同我講咗啲嘢。
老闆：「Johnny，我老婆平時會唔會問你車我去邊，同埋車啲咩人？」
我：「冇喎。」真係冇㗎。
老闆：「如果我叫你車其他女人，你會唔會同我老婆講先。」佢係笑住問，意圖想令氣氛變得輕鬆。
我：「你出糧畀我㗎嘛，我唔會亂講嘢，總之上得車都係楊生嘅朋友或者客戶。」
老闆：「啱，我老婆問起，全部都話係客同朋友就得㗎喇，有時可以講下其他同事一齊喺車度，同埋唔好透露我去過邊，ok？」
我：「冇問題，知㗎喇。」
去到目的地接咗條女，我都唔知佢係乜水，不過真心正，大波長腿，一身名牌，一上車就對住楊生嗲聲嗲氣，挨身挨勢，楊生算好斯文，只係將隻手搭住個女人嘅雪白大髀，仲保持到冷靜。睇到呢度我唔敢再望倒後鏡，因為驚佢哋發現，我打份工㗎咋，工作就係揸車、揸車、揸車，其他嘢唔想知，唔想理，最緊要準時出糧。
車咗佢哋去港島區某間五星級酒店，老闆話我可以唞下先，一陣會打電話叫我過嚟接佢。
之前覺得楊生呢個老闆都幾完美，後生，有型，衣著有品味，親民，對住個個都笑容滿面，又有個靚老婆，而家發現佢原來都有缺點，就係鍾意玩女人，因為之後車過呢條女幾次，跟住就再冇見過喇，靜咗一排，我又車過第二條女，有時一個星期內會車兩個完全唔同嘅女仔，簡單形容楊生工作以外嘅生活－－－玩到癲。
唔知係我凝住定係錯覺，平時車楊生老婆係無事無幹，佢老婆間唔中會同我講笑傾兩句，但每次車完老闆玩女人再車楊太，氣氛就會完全唔一樣，佢老婆會默不作聲，有次我仲見到佢喊，不知所措嘅我問咗句：「楊太，你係咪唔舒服呀？使唔使車你睇醫生？」
楊太搖搖頭示意唔使。
第二日我要去老闆屋企車楊太去中環，佢一上車就畀咗盒點心我：「我哋個工人學整㗎，之前特登去油麻地買蒸籠，我留咗啲畀你試下。」
你兩公婆唔好對我咁好啦，定係上英文課程同點心都係籌碼嚟咋，之後係咪要我賣情報㗎……
（未完待續）
–
🚘2019年出過一個關於司機嘅故事
《良心HR請司機》
https://hkofficedaily.com/936/