Sales知道張單改由Nikita跟之後已經知難而退，呢啲就係欺善怕惡。平時我幫呢個Sales搞過好多急單，只係今次個客特別霸道，未畀錢已經要優先處理，所以特別難搞。
幫襯最少嘅客，要求往住係最多，比起大客更煩，大客唔一定好，不過佢哋財大氣粗畀足錢你，出嚟做嘢都冇乜好投訴，反而細客同孤寒客先係最難服侍，畀得百二蚊，又要李嘉欣。
個Sales原本想我將啲責任孭上身，想我諗辦法叫Nikita或者大姐嗌工廠趕貨，再用我名義畀數期，公司係睇單出佣畀Sales，唔使收晒錢先出，我哋跟單冇佣收反而要負責追數。
由Nikita接手，隔咗一日就收到個客張票，而貨期都係冇得提前，全部跟足規矩，然後個Sales嬲咗我，嗰排直行直過都唔打招呼，見親佢都黑口黑面。
工作上知唔知咩人最煩？就係嗰啲畀過甜頭佢，同埋開過方便門畀佢嘅人。上次你平咗畀佢，今次、下次、下下次佢都會話：「點解貴咗嘅？大家咁熟，唔係咁呀？」其實佢完全冇考慮你之前係平咗，反而會覺得其他一直收得貴嘅人，先有資格繼續賣得貴。
上次你優先處理佢嘅嘢，今次、下次、下下次，你都要繼續優先；上次你迎合佢過份嘅要求，今次、下次、下下次，你都要無限次接受佢嘅麻煩。
不過我唔介意個Sales嬲我，更加唔介意呢個西客唔再落單（唔係因為我冇佣收），一間公司要成功，一個人想工作順利，其中一項要素就係淘汰西客，西客會蠶食你嘅精神同時間，仲會影響埋情緒，飛甩咗佢哋，可以疊埋心水去處理其他嘢，長遠嚟講始終利多於弊。
經歷完多事嘅一日，返到屋企輪到聽我阿媽發牢騷，原來佢買生果畀人呃。
「嗰個檔主，第一次買嗰陣，佢話超市壟斷，搞到生意少咗好多，就快頂唔順要執笠，我見佢講到咁可憐，咪日日去佢度買生果囉！有時自己食唔晒都會買多啲拎畀姑姐佢哋，其實佢啲生果係貴過人，但無所謂啦，可能人哋來貨貴呢，買多幾次之後，佢直情唔畀我揀，有時要4個橙、一梳蕉、4個蘋果，佢係要我買雙倍，話可以慢慢食，硬塞落嚟，仲要靜雞雞入啲爛嘅，我以為係一時手快啦，點知後來幾次都係咁。」
我：「唔怪得成個雪櫃都係爛生果啦，仲以為你貪平幫襯街邊啲阿毛。」
「梗係唔係啦，貴過超市呀！頭先佢夾硬迫我買車厘子，話十幾蚊磅好抵，仲執定幾磅畀我，你當我傻㗎咩，我有睇新聞㗎，嗰啲喺河北、江蘇嚟，驗到有武肺先至劈價，我話唔要，佢係咁迫我買，話香港仲多病毒，中國嚟仲安全喎！」（註：當時係1月，有內地車厘子驗出病毒嘅報道。）
我：「你唔會為咗怕唔好意思夾硬買咗吖嘛！」
「冇買，明明已經買咗兩大袋生果，根本食唔晒，最後我死都唔要，佢成塊面黑晒，臨尾仲頂我一句，話我咁怕死唔好食生果吖笨，我幾谷氣呀！買咁多嘢，淨係唔想要車厘子都唔得？後來同張師奶講，原來佢哋一早中過招，生果又貴又爛，態度又差，係我咁傻仲成日幫襯，最初佢話間舖頂唔順吖嘛，咁我哋反正要買生果，幫得咪幫囉，點知變咗老奉。」
對生果檔老闆嚟講，我阿媽出於好意嗰份善良，如果喺買唔夠生果嘅情況下，其實係一文不值，因為我阿媽嘅善良，同生果舖老闆要求嘅善良，係兩種完全唔同嘅概念，See，呢啲case喺生活中都無處不在。
經過西客事件之後，我都係學唔到Nikita咁鐵石心腸，始終每個人性格唔同，佢經歷比我多，所以先選擇用目前呢種方式做自己嘅第一道防線。
後來有一日，我哋team幾個同事出去飲茶，Nikita都有去，行去酒樓嘅途中，有個大約5、6歲左右嘅小妹妹企喺路中間唔郁，佢流緊眼淚，但又冇大叫大喊，只係一路流眼淚一路「扯蝦」，有途人望咗幾眼，不過一路望一路行，然後Nikita第一個標埋去。
Nikita：「妹妹你做咩喊呀？媽咪呢？」小妹妹冇答佢，只係兩隻手緊張地互扭，好似想人幫，但又好驚陌生人。
Nikita繼續氹佢：「係咪唔見咗媽咪呀？」小妹妹冇直望Nikita，只係流住眼淚點頭。結果我哋報警，再一齊喺度陪個妹妹等，好在最後終於搵返佢媽咪。
從未聽過Nikita講嘢嘅語氣係咁溫柔同埋緊張，忽然明白一個道理，原來我哋唔係要變得不再善良，而係要學識唔好對住任何人都善良。
（完）
=
Nikita 1 一個人由幾時開始決定唔再善良
https://hkofficedaily.com/?p=16561
Nikita 2 綿羊嘅善良被視為軟弱 獅子嘅善良先會被歌頌
https://hkofficedaily.com/?p=16577