有咩慘得過份工要面對好多西客？答案係客又西，自己同事又西，腹背受敵，簡直係比悲傷更悲傷嘅事。
我做跟單，除咗幾個職位差唔多嘅同事之外，仲有一個大姐，由於佢仲要兼顧另一個部門啲嘢，又要處理oversea嘅工作，所以香港呢邊有任何問題、有乜嘢要匯報、有乜嘢要請示，全部會搵department裡面嘅第二把交椅～～～Nikita，呢個女人長期西口西面，有嘢要同佢交接可以話係噩夢。
公事上，Nikita問嘢嗰陣係咁：
「船？」
佢係問批貨走船定走飛機，覆完之後佢又會問：
「期。」
即係問你批貨幾時走。
「錢？」
即係問緊你張單嘅detail.
好喇，輪到我哋公事上有嘢要問佢，你可以預期十次有九次佢會答你「唔知！」即係叫你自己搞掂，唔好問佢，有時佢連單字都懶得答你，就咁聳聳肩，冇表情繼續做自己嘢。
公事以外，Nikita一個星期頂多同我哋食一次lunch，有時禮貌地問佢一唔一齊食，佢嘅回應都係得一個字：「Now？」或者係：「出。」再唔係就：「唔。」
多一粒字都冇，我好有興趣知道Nikita平時點樣同屋企人或者朋友溝通，唔淨止覆單字呢個問題，佢係長期冇表情同埋好冷淡，同你講嘢永遠唔會望住你，去pantry個個同事打招呼傾計，佢一樣西口西面，唔知以為個個借咗佢幾百萬未還。
點解仲要問佢食唔食lunch？因為大姐係都要我哋問Nikita囉，你估我好想同呢個女人食咩！
公司啲Sales都好怕Nikita，有時走貨會出現唔同情況，突發同趕急起上嚟，我哋呢邊要協調工廠、貨倉、司機，大家拍硬擋一路夾一路走位，做嘢係咁㗎啦！不過每次啲Sales搵Nikita幫忙，佢都係擺出理得你死嘅態度，總之咩都唔得，你自己諗辦法啦！
Sales自己搞得掂其實唔想求Nikita，因為費事睇面色，如果你講規矩講制度，道理永遠喺Nikita嗰邊，不過工作就係要睇位執生，邊可以咁死呢。搞唔掂Nikita，有時啲Sales會直接搵大姐，甚至同老細講都試過，Sales覺得佢哋搵生意返嚟，跟單應該盡量配合，冇理由惡過營業部吖，冇生意又點會有糧出呀，啱唔啱先？偏偏Nikita唔受呢一套，次次都企得好硬，真係吹佢唔漲。
Nikita亦從來唔會參與同事之間嘅活動同話題，佢係office入面公認嘅黑面神，有個Sales曾經講笑咁話：「如果有同事喺公司樓下畀車撞親，我估Nikita見到都會掂行掂過，頂多眼尾望下，白車都唔會幫手call。」
有次大姐放假，有張單好urgent要改動，但係follow嗰位Sales又出咗去見客，我一開始所講嘅情況就出現喇～～～～～呢頭應付個西客，嗰頭要面對西口西面嘅同事Nikita。
西客張單一定要搵工廠嗰邊協調，趕唔切個期就要走飛機，走飛機貴好多倍，但我呢個level嘅職員係叫唔郁工廠嗰邊，結果我死死地氣求助Nikita，得到嘅回應係：「唔得。」
同一時間個西客狂催，Nikita又完全唔理，我急到就嚟喊，其他同事聽到我同個客講電話，意識到有麻煩嘢，我好想擺低乜都唔理，但個西客又不斷打我直線，最後仲兇我趕唔切貨的話，走飛機條數要我負責，佢唔會畀呢筆extra嘅錢。
可能畀個西客搞咗一個下晝，心情好差又好挫敗，我一時之間控制唔到情緒，喺電話覆個西客：「我打份工㗎咋，點賠飛機錢畀你呀？可唔可以等Sales覆你呀？我真係話唔到事㗎！你迫我同鬧我都冇用㗎喎！」
你以為講完呢句可以平息？太天真喇，叫得做西客，又點會有同理心呀？之後咪又繼續轟炸我，要求呢樣嗰樣，又恐嚇我要投訴之類。
突然間有把聲喺後面講：「畀我。」
係Nikita，佢依然係好冷漠嘅語氣，西口西面嘅樣，遞咗隻手過嚟叫我畀個電話佢。
Nikita拎起電話之後同個客講：「找數未？寄cheque？見錢先出貨，quotation第一行寫得好清楚。」
對方唔知講乜，Nikita停一停再繼續：「取消吖。」佢係完全冇激動，只係好冷淡。
再停一停，又再講：「唔好搞，取消，另外，畀錢到數開始計，14日出貨，你肯走船都趕唔到。」
我第一次聽到Nikita講咁大揪嘢，平時佢係單字單字咁吐出嚟，上次聽佢講完整嘅句子好似喺茶餐廳，佢同侍應講海南雞飯凍檸茶，連唔該都冇句。
直至放工之前，西客都冇再打嚟，其實我明少少，當你同人講道理，又或者扯晒火鬧交，件事總會沒完沒了，而家個西客係對住一個完全冇感情，講嘢冇尾音，冇喜怒哀樂，亦唔會幫手諗任何辦法嘅人，簡單啲講可以話係西鬥西，睇下邊個大鑊啲，Nikita畀得兩個option佢，一係畀錢守規矩，一係cancel張單，冇第三條路，你取消其實佢唔care，一來Nikita冇佣分，二來少一張單公司係唔會執笠。
呢件事上面，Nikita的確叫做幫咗我，後來我仲知道呢張單係大陷阱，慢慢再解釋。
隔咗兩日，我哋幾個同事同大姐食lunch，由於Nikita冇去，我將呢單嘢講返出嚟，大姐話：「Nikita以前唔係咁㗎，你哋平時唔好怪佢。」
一路食lunch一路聽大姐講Nikita嘅事，我諗起一句說話：「一個人由幾時開始決定唔再善良？大概應該係，人哋將你嘅善良當做理所當然之後。」
（未完待續）
==========
輕鬆返少少先，噚日仲有個好爆笑嘅故事，你哋睇咗未呀？
無意中搵到張舊相 搞到老竇老母差啲離婚
https://hkofficedaily.com/?p=16549