無意中搵到張舊相 搞到老竇老母差啲離婚

之前因為要搵返一張舊嘅成績表,結果搵勻全間屋,最後摷到去老竇老母間房嘅床下底,搵下搵下又發現個箱仔,打開之後唔見成績表,不過有幾張好舊好舊嘅相,我覺得好驚喜,拎住啲相衝出廳。

我:「問你哋有冇後生啲相睇下又成日話冇,結婚相又話冇,畀我搵到啦!阿媽你後生幾靚喎,完全睇唔出,後來中咗輻射呀?」

本來係一個合家歡嘅溫馨時刻,但隨住老竇面色變蒼白,同埋阿媽伸手過嚟搶走啲相,我開始覺得瀨咗嘢。

老母:「原來你仲留住呢個女人啲相呀!點樣呀你!」

老竇奮力抗辯但無補於事,都唔怪得佢嘅,突然畀個仔摷返呢啲相出嚟,冇心理準備好正常,所以佢講埋啲咩唔記得丟、唔知仲有留低、完全唔記得咗……根本就唔足以成為理由,都係我衰啦,點知啫!又未見過佢兩個後生啲相,以為真係走樣吖嘛。

佢兩個冷戰咗幾日,老竇嬲埋我,最後我要向老母收風,原來相片中條女當年曾經同佢爭老竇,總之就兩女爭一男,好多過節啦!

老竇後來都狠狠地鬧咗我一鑊,佢咁樣話我:「你有冇咁蠢呀?認唔到個樣都認到個胸啦!相入面嗰個大咁多,讀咁多年書都唔識分!」

關讀書咩事呀?又冇乳房學系!但係個禍係我闖出嚟,無謂再駁嘴喇!

老母癲到叫我幫佢搵律師搞離婚,轉達畀老竇聽,佢話好呀,約咗時間通知佢,一定會準時上律師樓。

呢種咁唔和諧嘅氣氛持續咗成個月,最後因為我個妹讀緊書但被發現有男朋友,老竇老母先再次企埋同一陣線鬧阿妹,成件事叫做轉移咗視線,慢慢被遺忘,或者係佢兩個都需要落台階唔再提起。

老竇問過我可唔可以複製張相,然後先至拎去丟,我話copy咪又係有底,copy嚟做咩啫,佢話唔要留底,要儲喺電腦,唔印出嚟喎。

我:「你意思係scan呀?」

老竇:「是但啦,總之唔好畀你老母發現。」

唔通大部分男人都係咁?抑或我係佢個仔有遺傳呢?我都會留低ex嘅相,但只限save喺電腦,唔會留任何hard copy,不過今次爭啲累到佢哋離婚,我真心唔好意思,老母應該曾經想嚟真,佢追問過幾次約咗律師未,又話再唔約就自己打去葉謝鄧。

=====
老竇畀老母見到舊相好啲相,又點及畀未婚妻見到SP啲相咁震撼呢

https://hkofficedaily.com/?p=9391

error: