我上星期去咗間纖體美容公司interview，佢約我9點半，準時去到，填完application form之後唔使點等就入得房，HR問嘅問題亦係意料之內，佢份人都幾nice，過程算愉快。
In In下，有人敲會議室個房門，然後有條女直接開門入嚟（我唔知佢係邊個），只見佢語氣急促得嚟又帶點慌張咁話：「喂，老細出咗嚟，快啲briefing 先，快！」
我對面嗰位HR又唔知點解慌張埋一份，淨係識同條女講：「好！好！而家出嚟！」
HR望一望我，雖然佢冇講，我亦唔識得讀心，不過佢眼神表達咗一句對白：「點好呢，留個candidate喺房好吖，定叫我出返去等呢？」
我見佢有啲為難，自己好識做咁話：「你係咪趕？我喺度等你啦！」
點知HR話唔好：「你跟埋我出去啦，好快㗎啫，兩三分鐘，行喇行喇！」
個埸面其實有啲似走火警。
一出會議室，已經見到好多同事企晒起身，然後有個男人喺最前，面向我哋全部人，佢大叫一聲：「今日一定要畀噚日更加努力好唔好？」
成班人和應大嗌：「好！」
男人演講：「我哋今個月條數on track嘅，而家先14號，營業額已經追平3月份成個月喇。」
成班人附和wowowow再一輪掌聲。
男人繼續發表：「換言之，嚟緊每一日都係刷新緊紀錄，不過絕對唔可以自滿，亦唔可以鬆懈，一定要不斷突破自己，知唔知道！」（真實中嘅對白再長啲，我記唔返咁多，呢度節錄咗）
成班人又撞邪大嗌：「知道！」
男人：「大聲啲！」
成班人繼續發癲：「知道！」
本身同我做緊interview嗰位HR望一望我，細細聲同我講：「一齊嗌啦！」佢唔係畀指令要我嗌，佢係慌張，希望我幫幫手一齊嗌。
男人又嚟：「唔夠精神，再大聲啲！」
成班人……再加埋我：「知道！」
男人：「勿忘初心！」
成班人：「勿忘初心！」
男人：「努力向前！」
成班人：「努力向前！」
哦，原來係口號，要跟住嗌係咪？
男人：「創建未來！」
成班人+我：「創建未來！」
男人：「目標清晰！」
成班人+我：「目標清晰！」
後面啲口號我唔再寫喇，太長，同埋我已經唔多記得，總之就好奇怪好尷尬，你會以為置身邪教當中，嗌完之後，HR就帶返我入房繼續interview。
HR話呢度每朝都要聽老細briefing ，每朝都要嗌口號，一般都係準時9點正（呢度office返8點半），所以約我上嚟見工已經特登約9點半，但老細當日有個con-call，所以briefing遲咗，我亦因為咁而有幸「參與」。
我口痕，見HR份人冇乜嘢，所以多口問咗句：「點解你頭先咁緊張既？其實有時行開行埋去咗廁所都會miss，唔briefing 應該冇乜事㗎呵？」
HR：「每個部門都有自己個阿頭點人數㗎，briefing見唔到你嘅話，如果唔係一早請假，之後有排解釋，好煩㗎！不過你唔使擔心，成個briefing其實幾分鐘㗎啫，好快過。」
雖然呢個HR幾隨和，但係間公司真係太似邪教喇，加上我之後有另一個offer，結果就冇揀呢間纖體美容公司，諗起當日好似走難咁衝出房，HR又叫我跟老細一齊嗌嗰個畫面，我真係覺得好惹笑，香港真係乜嘢人，乜嘢奇怪公司都有。
投稿讀者：L小姐
–
🤦🏻♂️返工要briefing 其實未算最慘，監生要員工拍片做KOL，幫手宣傳公司啲product仲慘。
https://hkofficedaily.com/?p=10278