想分享一件做reference check嘅趣事，之前interview見咗個男仔好滿意，line manager見完都話OK，然後就循例做reference check畀offer.
我知好多人都憎reference check，我雖然係HR，不過自己都唔鍾意，因為要搵candidate啲前僱主、前上司、前公司嘅人事部，真係好Q麻煩，拖慢晒整個招聘流程同速度，無奈呢啲係公司規矩，唯有照做啦！
嗰個男仔畀咗佢前上司嘅contact，仲話佢前上司prefer用電話做reference check多過email，咁好啦，嗱嗱聲問兩句諗住收工，點知打去之後都唔知好嬲定好笑。
我：「喂，麻煩你Chris Wong.」
對方：「我係，呀Marcus有提過喇，你做reference check係咪？」
我都未講自己係邊個，你點知我打嚟做reference check？唔畀係銀行sales打嚟問你借錢㗎？先生，你呢個電話淨係要嚟等我call？
我：「係呀……我叫Fiona，你好，既然你知道我幫Marcus Tsang做reference check，咁我唔阻你太多時間，直接問幾條問題吖。」
對方：「好好，你等等，你等等，你等等……你等等呀……唔好意思，等等，得，而家講得。」
由於我係打Chris Wong手提電話，好明顯佢頭先唔方便聽，要行到好遠，確保冇人先夠膽繼續講落去。
我：「介唔介意形容下Marcus嘅性格同工作表現呀？」
對方：「係，可以，Marcus呢，好勤力，好抵得諗，上司交代嘅工作會用心與及有耐性地處理，同埋佢好肯幫同事，如果同事需要幫忙，Marcus會二話不說提供協助，而且他性格樂觀，係公司的開心果。」
先生，第一，我聽到揭紙嘅聲，第二，讀稿冇問題呀，可唔可以將佢口語化再講出嚟？咩叫「係公司的開心果」？你平時讀「波羅的海」定係「波羅嘅海」？
我：「好，咁請問佢有冇向你提過點解要辭職？」
對方：「有！Marcus希望事業有更大發揮……發展，係，有更大發展空間，唔好意思，我有啲忙，請問仲有冇其他問題？」
我：「冇喇，唔該晒你，阻咗你時間唔好意思。」
對方：「哦，咁你記得請Marcus，佢做嘢好好，好聰明，又盡責，記得請佢。」
得喇，快啲出去攞飯盒啦！
最後我有冇請Marcus？有呀！明知你個reference check係搵救兵，但其實呢個只係我公司招聘過程啫，以我face to face interview嘅經驗，個人認為Marcus其實唔差嘅，佢搵到人捱義氣讀稿，都證明人緣唔錯啦！信人把口，不如信我自己對眼同感覺，而最重要係，我仲有好多position要請人呀，唔想再in嚟in去喇。
後來Marcus嚟咗我公司做，表現的確唔錯，證明我眼光冇問題，呢條友仲係口花花嗰種人，連HR都撩，做咗大半年同事之後混熟咗，有次佢遞假紙畀我嗰陣呃計傾，我就當笑話咁講返呢件事。
Marcus：「哈哈，係呀，當時其實同前上司唔啱，reference check搵佢實死梗，我同阿Chris呢個舊同事好friend，咪搵佢幫手囉！」
我：「咁我當時問你email做reference check定係用電話，好心你就揀email啦，明明已經有佢公司email address.」
Marcus：「我知，雖然Chris可以用公司email覆你，但係佢冇公司印呀，做完個reference check吸唔到印畀你，同埋個死仔都驚，佢怕black and white會有事，所以係佢提議用電話做，點知佢講嘢口窒窒，好在你都肯請我咋，一陣請你食飯啦！」
我：「死開啦！」
唔係間間公司或者個個HR都咁易話為，有啲真係好重視個reference check，雖然我知好多人會請槍，但希望各位candidate搵救兵都搵個醒目嘅幫手，呢啲「波羅嘅海」隨時累死你，到時有offer變冇offer，你都唔知鬧唔鬧個friend好。
投稿讀者：波羅嘅海