我本身住村屋有養狗仔，有次公司班人嚟我度BBQ，其中一個死港女雖然未致於驚狗，但就肯定唔係鍾意動物嘅人，因為佢劈頭已經話養狗好煩，執屎好煩，沖涼好煩，睇醫生又貴，狗糧又貴，仲話屋企有狗仔會成陣味。
咁唔係人人都鍾意貓貓狗狗嘅，有呢啲疑問同睇法好正常，但係佢又要扮有愛心，扮晒enjoy咁同我隻狗合照，其餘時候眼尾都唔望下隻狗。同一晚呢條死港女已經將狗狗合照擺上IG，結果有好多like，隔日佢居然問可唔可以再去我屋企睇狗仔。
有人想同我隻狗玩其實無任歡迎，有更多人鍾意狗始終係好事，結果佢提早一個星期話去我度，咁咪由得佢囉，當日一嚟到我都打個突，化行晒妝，又短裙又緊身衫又𠝹波袋，機心勁重，仲要帶多兩套衫嚟換，明既明既，啲相要分幾日出吖嘛。
之後佢真係連續幾日喺IG出post，全部係同狗仔啲合照，仲有狗仔單獨嘅片同相，每個post輕輕鬆鬆呃二三百like，條死港女突然喺office問我：「可唔可以多啲入嚟同狗仔玩呀？」
我：「耐唔耐囉！我未必個個星期喺屋企㗎。」
死港女：「咁我可唔可以話自己係風風主人呀？因為有人留言問我呀！」風風係我隻狗嘅名。
我：「你都幾搞笑㗎喎，養狗都要扮？」
死港女：「唔係呀，風風真係好得意吖嘛，post風風啲相勁多like，有人留言問起又唔想解釋咁多，我咪求其答係自己養囉！」
我冇答應佢，因為已經好反感，但內心已經閂咗門，唔係介意佢同隻狗影相，而係冇必要幫佢講呢啲大話呃like，佢要點覆留言係佢嘅事，我唔會特登去篤爆，但我亦唔會配合。
去佢IG睇，條女真係扮主人，又話養咗幾年，又話平時當隻狗係命根，真係好虛偽。
由於死港女問過幾次再去我屋企，但我一一拒絕，佢竟然提出要向我「借狗」。
「借狗」喎，你聽過未？
佢話想借返屋企一晚影相，呢下我真係著L咗火，狗仔有生命㗎，唔係你呃like嘅工具，狗仔係我家人，你有仔女會唔會借畀人帶返屋企一晚影相？何況你根本唔係愛狗之人，我點知你會點樣對隻狗？
以上呢番說話我係直接鬧出口，有同事聽到都一齊話死港女冇腦，佢犀利呀，面皮成尺厚，仲問我有冇狗舖介紹，想自己去買返隻狗，我同另一位同事聽完仲火，買隻狗返嚟為咗打卡呃like？
其實好多呢啲人，養動物唔係出於愛心，而係為咗呃like，佢哋連基本嘅養寵物知識都冇，只係著眼於有寵物出現喺社交平台會好多人睇，有好多人讚，喺嗰啲like嘅背後，動物究竟吃咗幾多苦頭真係冇人知。
我覺得養寵物應該要考牌，呢個係一生一世嘅責任，你嘅世界係呃like，而佢嘅世界只有你咋！
投稿讀者：風風主人