有日一位女士嚟到診所。
佢行埋嚟登記處問：「係咪男醫生嚟呀？」
我：「係呀」
佢：「有冇女醫生呀？」
我：「我哋得一個醫生咋」
佢：「嗰一個醫生都係男醫生呀？」
…應該係呀？我唔知我老細會唔會忽男忽女喎？
我：「係呀，得一個醫生，係男醫生嚟嘅」
佢：「我想睇女人嘢喎」
我：「我哋醫生都睇嘅」
佢：「唔係男醫生嚟咩？有女醫生呀你哋？」
唔好loop啦。
我：「男醫生都可以睇婦科方面嘅問題嘅，例如尿道炎」
佢：「係呀，我就係嚟睇呢樣呀，真係女人先知女人咩事」
我：「可以呀，你未喺度睇過係咪？你俾身分證我幫你登記先呀」
佢：「我問多少少嘢，男醫生可以點睇我呀？用眼睇呀？」
唔係呀，用耳聽呀。
我：「你可以講你有咩唔舒服俾醫生知嘅，咁醫生了解咗就再開藥俾你」
佢：「睇都唔駛睇？咁求其㗎咩？」
我：「醫生會唔會要你做啲咩檢查我係唔知嘅，我都係初步答你啫，要你入到房同醫生講咗你有咩唔舒服先，先知下一步會點做。如果有需要檢查，醫生都會同你講」
佢：「如果佢要睇可唔可以唔好哄咁埋嚟睇呀？」
吓？
佢：「我唔想佢哄埋嚟俾我feel到佢啲鼻息呀」
…你係咪睇太多愛情動作片呀？你最多都係feel到下面涼一涼～都係因為冷氣大啫。
我：「你放心啦，你係咪要登記呀？你俾身分證我呀」
佢停一停諗一諗：「我搵吓有冇女醫生先呀，諗吓都係唔係咁想feel到醫生啲鼻息」
佢轉身離開診所。
女醫生唔駛唞氣㗎咩？個個醫生都戴住口罩，你點會feel到呀？
－
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。