有日一位先生嚟到。
佢放低張紙喺登記位枱面，我拎咗張紙嚟睇睇。
我：「你係咪睇醫生呀？張紙寫住嘅係你嘅？有咁多地方唔舒服呀？」
佢：「唔係呀，你照啲病徵執藥俾我呀」
我：「你係咪想要平安藥呀？之前有冇喺度睇過呀？」
佢：「冇呀」
我：「要見咗醫生先喎，我同你登記咗先呀，你俾身分證我呀」
佢：「就咁執藥俾我唔得咩？」
我：「你未喺度睇過嘅一定要見一次醫生先呀，醫生都要問清楚你過往病歷先可以開藥俾你」
佢：「我唔制呀！」
唔好咁啦，大大個男人唔好扭計啦。
我：「如果你唔登記唔肯見醫生嘅，我哋呢度都俾唔到藥你呀」
佢：「明屈我錢啫」
又唔好咁難聽，你可以選擇咩都唔做行出門口㗎嘛，我哋診所門冇鎖冇落閘呀。
我：「一係你去返你有睇過嘅醫生度問啦」
佢：「我搬走咗啦，如果唔係我做咩嚟你呢度呀，你唔好蝦我新搬嚟呢頭先得呀，你唔好咁多麻煩嘢啦，我都未見過咁麻煩嘅人！直接照啲病徵執藥得啦」
好似你咁麻煩嘅人我都遇唔少，你未見過就應該自備一塊全身鏡啦。
我：「唔好意思呀先生，你唔登記睇醫生嘅話，我哋真係幫唔到你，你需要登記嘅再話我知呀，我哋今晚收八點」
佢：「你真係好麻煩喎！」
我冇出聲冇理佢。
佢再講：「做人唔好咁硬頸懶係有原則，我呢啲係大生意嚟㗎，唔駛你點做就有錢收，登記都唔駛你做啦」
我：「醫生請我返嚟就係負責登記，如果我連登記都唔駛做嘅我就可以走㗎啦」
佢：「嘖，真係好麻煩，都未見過咁麻煩嘅人」
佢離開咗診所，去買塊鏡啦。
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。