同事Hazel投訴男朋友送禮物冇情趣，試過同一樣嘢重複買完再買，又試過開晒口問要乜，搞到毫無驚喜可言，上個月情人節「再進化」，直接畀錢佢，仲要入信封。
Hazel：「唔知以為佢做帛金，我話cash都算啦，可唔可以唔用信封呀？佢話喺街大嗱嗱畀成千蚊我，驚人哋見到以為我做雞。」
我：「死啦，我都鍾意直接問女友想要乜，係咪男仔通病？」
Hazel：「唔好啦，好似畀錢啲公公婆婆買嘢食咁，話晒都係情人節吖。」
另一位已婚同事Ellen突然激動搭訕：「喂，如果你唔要條仔，讓畀我吖，我即刻離婚，現金我啱呀！好過我老公。」
我：「有咩比起送現金更加冇情趣呢？」
Ellen：「經典無數，送過魚竿，仆你個街我唔釣魚嘅；送過音響，我唔玩呢味嘅；送過相機，我連快門光圈都唔識；送過曼聯波衫，我完全唔睇波，仲要係男裝L碼，然後同以前啲禮物一樣，搏我唔用擺喺度，跟住自己拎返晒嚟用，佢根本係買禮物畀自己。」
Hazel：「好衰呀佢！你老公情人節送咩畀你？」
Ellen：「PS5，我唔打機嘅。」
我：「你老公好絕喎！」
Ellen：「我仲絕，我叫朋友幫我賣Q咗，原來出面有價有市，自己套現幾千蚊，我老公嬲到癲咗，話係食炒價買返嚟喎，我理得你吖，送畀我就係我㗎啦！」
Hazel：「原來我男朋友都唔係太差。」
Ellen：「你男朋友封帛金有成1000蚊cash，直情係人中之龍啦，好好珍惜喇。」