朋友公司最近發生咗一件事，同事們都議論紛紛，事緣佢老闆要炒一位員工（原因我冇問詳細），畀佢即時走，條件係7折出代通知金，佢老闆叫HR出面拆掂，HR唔肯，話咁樣唔啱規矩，但老闆堅持，仲強調有行家都試過，未必冇得傾。
HR盡人事同嗰位員工deal，對方竟然答應，結果就7折出代通知金，諗住可以close file，點知相隔一個星期之後，該名員工反口，打返嚟追埋餘下嘅代通知金，老闆當然唔肯啦，結果呢單嘢就搞到去勞資審裁處，而家排緊期上庭，遲下雙方要對簿公堂。
朋友喺WhatsApp group問我哋幾個group友點睇？結果五十五十，有人話係老闆仆街在先，有咩可能代通知金都要員工接受discount，亦有人覺得個員工出爾反爾嘅行為有問題，口頭協議都係協議，如果覺得唔公平，最初就唔好接受。
由於我一直都係做recruitment，勞工法例方面唔係專家，所以真係畀唔到專業意見，我只係問咗兩個問題：「嗰位被炒員工份糧係幾錢？」
「48,000」
我：「7折差成萬幾蚊喎，咁點解淨係口頭協議呢？要人接受7折出代通知金又唔black and white？」
「好似係驚7折唔啱勞工法例，所以佢哋唔想有black and white。」
我：「唔熟勞工法例打去問吖嘛！」
「你真係有所不知，嗰排疫情，好多政府機構同埋乜處物處全部冇開，一係就線路繁忙，呢單嘢你有冇咩睇法？」
其實我嘅睇法係，佢公司應該要請返個熟悉勞工法例嘅HR，因為Recruitment同Compensation & Benefits真係兩件唔同嘅事；另外，佢老闆講到尾都係奸有奸輸，雖然唔知佢點解要炒呢位員工，就當係理由充分地解僱，最初唔諗7折出代通知金呢條縮數，咪唔會有咁多手尾跟囉！
由於呢單嘢仲未上庭，之後有結果再同大家分享，始終市道唔好，難保來年有其他人一樣遇到呢類情況。