今日自己落手煮－－－－－上海粗炒
我對上海粗炒有情意結，因為細細個屋企樓下有大排檔，係最傳統嗰種大排檔，睇到廚師炒嘢、拋鑊、著晒火、講晒粗口忙到甩轆嗰隻，而家好多所謂大排檔已經唔係嗰回事，當然係基於安全考慮啦，但以前嗰種情懷已經不復再。
細細個唔識形容，食到大排檔嘅上海粗炒覺得好正，感覺上好似有陣煙味，我幻想到係廚師擔住口煙係咁炒係咁炒，再滲透埋鹽、生抽、老抽、糖、蠔油，跟住就變成好香好惹味，後來我先知道呢樣嘢叫做「鑊氣」。
傳統大排檔式微之後，我不斷尋找呢種有「鑊氣」嘅上海粗炒，好可惜真係搵唔到，五星級酒店又好，米芝蓮上海菜館又好，鼎泰豐又好，橫街窄巷嘅小店都好，佢哋嘅上海粗炒都唔係嗰種味道，或者呢啲叫先入為主，細個嘅回憶總是美好。
我自己煮嘅上海粗炒……就算啦，有冇人喺香港食過好好味，好有鑊氣嘅上海粗炒？如果有，介紹我去吖～～