以為同事死要面 實情原來好有錢

投稿讀者:Cliff Yeung(出埋我個姓氏please)

我哋公司出手不嬲都好低,特別係我條team,唔使問,新人入嚟一律公價11500,辭職要3個月通知,家偉年半前入嚟做嗰陣,曾經好驚訝咁問:「點解你哋知我幾錢人工嘅?」

我:「呢度個個都係11500入嚟,冇人例外,便利店同珍奶請店員都高人工過呢度,要轉行就趁早喇。」

有次出去食lunch,某同事話出咗bonus不如試試上樓嗰間日本嘢,我第一個開聲反對:「唔好啦!嗰間lunch set都400幾蚊起,家偉啱啱返工冇耐咋,佢冇雙糧㗎!」

點知家偉竟然爽快答應:「去吖!我都想食日本嘢呀!無所謂啦,開心吖嘛,唔好掃興。」

當時心諗,呢個小朋友真係好勝,得嗰萬一蚊人工,食個lunch用400幾,點夠撐到月尾呀?上到去日本餐廳,lunch set有5個,由400幾至1200蚊不等,大家都係叫400幾嗰個,另外有一兩個同事要600幾個set,家偉就order咗一個最貴嘅1200 set,後生仔真係愛逞強……

同事話家偉啲衫褲鞋襪同埋袋全部都係牌子嘢,由於我唔熟名牌,所以真係評論唔到,大家只係感嘆時下年青人唔識儲錢,賺幾多使幾多,難怪會買唔到樓同埋成為月光族。仲有一次,有位女同事上網睇中一隻咩bearbrick嘅figure,但係成萬蚊所以得個恨字,點知家偉行埋嚟睇又話自己都鍾意,其他同事就話邊有人會使5位數買呢啲嘢吖,說時遲哪時快,家偉已經即刻bid咗,仲要係食炒價。

好老實講,我哋當時覺得家偉喺女同事面前死要面,小朋友,咁樣係冇前途㗎~~~

另外有一次,成班同事放工落樓,見到家偉同埋Team Manager一齊上Uber,第日問佢哋去邊啦,佢兩個只係淡淡然答:「返屋企囉,冇去邊呀。」之後再斷斷續續又撞過佢哋幾次,大家就喺度諗喇,究竟家偉係Team Manager啲皇親國戚吖,係家偉做擦鞋仔馬住Manager吖,定係佢兩個玩斷背呢?

然後你知2020年疫情,好多地方冇得去啦,期間有個同事話再咁落去會鬱死,好想打麻雀,可惜冇地方,又唔敢好似平時咁去雀會叫小菜食飯打牌,家偉就提議上佢屋企打,咁就是但啦,臨去之前一日喺WhatsApp group問地址,邊度話?貝沙灣?喂點去呀?

當時啲同事已經喺個group度嘩嘩聲,連平時喺個group度唔出聲嘅女同事都好似翻生咁,唔打麻雀都話想去坐下,呢啲都算,因為貝沙灣係分幾part,當日去到先知家偉屋企唔係普通apartment嗰邊,係獨立屋嗰邊……

大家入屋之後,Team Manager問家偉:「咁你同屋企人平時住凱旋門𠴱邊?呢度丟空呀?」

家偉:「一時時啦,爹地媽咪唔係好鍾意呢邊,佢哋話附近酒樓唔ok,所以鍾意住凱旋門,招呼你哋就嚟貝沙灣囉,大啲吖嘛,又唔使畀佢兩個望住晒,我媽咪好煩㗎!」

又點樣樣凱旋門,又點樣貝沙灣呀?我住長沙灣咋!仲要係公屋咋!我出咗嚟做嘢10年喇,你哋唔好刺激我啦!

之後大家靜靜問Team Manager,原來佢係一早知道家偉有錢:「我點會唔知呀,佢見工要填地址㗎嘛!平時佢返凱旋門,我住渡船街嗰頭咪痴車坐囉!」

某同事問:「上幾次唔係你請佢搭Uber咩?」

Team Manager:「咩呀,架車係佢老豆,嗰個係佢哋司機嚟㗎!」

據了解,家偉屋企唔止有一部車,更加唔止得貝沙灣同埋凱旋門,另外仲有幾層樓,不過其他啲樓就租咗出去,同埋經過貝沙灣雀局呢次之後,公司有個別女同事日日都走嚟搵家偉傾計同食飯。

我問過家偉:「你老豆做咩㗎?」

家偉:「都係普通生意啫,冇咩特別。」(Ok,hea9me)

我:「其實你咁有錢點解仲要返我哋公司?份糧都唔夠你買貝沙灣間屋一格階磚位。」

家偉:「爹地話我要出去返下其他工,第日幫佢公司做嘢先有比較,咁咪求其搵份囉,反正我對佢公司都冇咩興趣,呢度識到你哋仲開心。」

唔知家偉會做到幾時,不過一直以嚟我都好錫後輩,佢有咩唔識就盡量教佢,如果有咩做唔切,我唔做自己嘢都會第一時間幫家偉。大家有冇諗過,新人出到職場難免會迷失,我哋點可以由得新人跌跌撞撞咁無助?間唔中我仲會買埋早餐畀家偉食,後生仔餓住個肚做嘢唔好嘛,咁樣唔健康,好易胃痛。

家偉有like呢個page,我只係想講一句,無論將來點都好啦,我都會當家偉係一世嘅朋友,love u bro!

error: