投稿讀者：以珊
2013年嘅暑假，唔知大家做緊咩呢？當時我最好嘅朋友去咗旅行，父母去咗美國探親，可能你都趁住炎炎夏日同陽光玩遊戲，而我就被診斷出有卵巢癌，還好身邊仲有個男朋友。
醫生建議我切除卵巢，另外配合化療，我第一時間就諗會唔會冇得生BB，不過醫生話我兩個卵巢之中，有一個未受影響，會盡量保留子宮同埋輸卵管，所以手術後唔一定會喪失生育能力。
其實第一件令我困擾嘅事並非生育問題，因為當時同男朋友連結婚嘅計劃都未有，只係作為女性，面對切除卵巢呢四個字，好自然就會諗下將來仲可唔可以生兒育女，而擺喺我眼前最大嘅困擾，係甩頭髮，第一次化療之後，未見有電影劇情嗰種嚴重甩頭髮情況出現，我內心暗暗地講咗句：「做戲果然係呃人。」點知化療後大半個月，只係普通梳一梳頭，唔算用力，成執頭髮就跟住把梳拉出嚟，再細心睇下，原來嗰幾日我開始甩得好多頭髮，之後甚至唔使用梳，只係用手撥下，頭髮已經甩得好誇張。
由於甩頭髮嘅時候唔係每次都咁平均，所以有時會特別見到一忽接近光咗，可以見到頭皮，望落去更似有啲人俗稱嘅鬼剃頭，我覺得咁樣仲難接受，好在男朋友係做髮型師，唯有叫佢親手幫我剃晒，點知男朋友比我更唔忍心，反覆地問：「真係剃？」我話：「剃啦，冇頭髮好過一岩一忽咁，而家有啲位又特別稀疏，好似拍緊鬼片，咁樣仲嚇親人。」
嘴裡說得輕鬆，其實我好難過，我本身係一個好鍾意長頭髮嘅人，出嚟社會工作後都未剪短過，最盡係剪到膊頭，但如果我表現得好難過，男朋友落手剃嗰陣一定會更難受。
好喇，我終於變咗個光頭妹，當時照鏡嘅第一個感覺係好似一個荷李活女星，哈哈，有冇睇過當年套異形，女主角Sigourney Weaver薛歌妮韋花有個光頭look，都幾似吖，其實佢喺電影裡面光唔晒，而我就真係光晒。
下一件要做嘅事，係辭職，光頭嘅我已經會帶唔同嘅帽或者頭巾外出，但依然會吸引唔少奇異目光，可能喺香港真係冇乜女仔光頭啦，佢哋習慣唔到，就由我嚟習慣，我當街上面啲人係未見過一個咁靚嘅光頭女性，不過份工唔辭唔得，因為我平時係要見客，體力支持唔到，形象上自己都接受唔到。
老細好好笑，我話要辭職，佢話：「諗下先啦！」
我：「光頭點見客呀？」
老細：「又唔係冇得醫，遲下先算啦！」
我：「冇力返工喇。」
老細：「休養下先囉，唔使返工住，我再諗下先啦！」
唔畀人辭職老細，我真係未遇過，可惜我堅持要走，咁啱有個friend搵緊工，佢本身嘅工作性質都同我好相似，順水推舟介紹佢嚟做，個friend同老細都不約而同想以contract形式合作，佢兩個話要等我好返，我話唔使喇，就算醫得返，都要唞一段時間，你哋唔好咁婆媽啦！
我真係有諗過今次會死，仲同屋企人簡單交代咗身後事，火化比較好，最好將我啲骨灰灑落海，好怕清明重陽要大家去拜我，又多人又大煙，死咗唔想再麻煩人，咪有啲網上拜祭嘅，都唔錯吖，我估地府都會與時並進，冇極速寬頻都有56K啩。
心理準備就做好晒喇，但係暫時仲未有機會去地府一遊，化療做完，唔使再抽血，食好多好多藥嘅日子亦已經捱過，慶幸我尚在人間。每一個人都有機會患病，無論係咩病都好，你可以有最壞嘅打算，但唔好忘記保持樂觀嘅心態。接受化療同藥物治療嘅經歷係好痛好辛苦，我冇寫出嚟，係因為唔想記住，開心又過一日，唔開心又過一日，點解要記住啲痛苦嘅事呢？多啲諗下開心嘢，對心境同對健康都有益。
患癌期間令我印象最深刻除咗屋企人嘅照顧，同埋朋友嘅關心之外，永遠唔會忘記嘅一幕係老細同埋同事經常拉大隊去探我，大約兩星期一次，雖然我哋而家已經唔再一齊共事，不過呢份友誼仲保持到。我完全康復後搵到份新工，係當時我介紹畀老細個friend引薦，做人真係好得意，我喺佢最需要工作時做咗個順水人情，佢又喺我耗盡積蓄醫病後介紹返另一份工畀我，投桃報李，互相幫忙。
唯一可惜嘅係，當年陪我抗癌嘅男朋友，後來已經分咗手，佢冇嫌棄我嘅病，亦唔係因為第三者等等問題，我哋係因為其他原因分手，好感激佢當時同我走過呢段咁辛苦嘅路，分手不必記恨。
世界以痛吻我，要我報之以歌，希望大家喺最困難嘅時候，唔好咁輕易就放棄，你可以有最壞嘅打算，但同時要有樂觀心境，如果反正都要死，點解唔死得開心啲？而當你用好嘅心態面對，其實絕對有機會逃出生天，因為好心情可以左右你嘅決定同命運。
大家加油！
PS：圖片從photo agency取得，非投稿者真人。