投稿讀者：偉雄
我學歷唔高，得中五，加上個性比較內向，所以搵嘢做方面有啲障礙，由於朋友亦唔多，經常鼓勵我嘅人反而係老豆，佢成日話學歷唔高唔緊要，可以搵啲寫字樓助理嗰類工作，然後再慢慢進修，希望我份工係舒舒服服之餘，亦都識到多啲有文化嘅斯文人，千祈唔好似佢班朋友咁，個個都係老粗。
斷斷續續搵工都冇乜回音，老豆開始日哦夜哦，谷鬼氣就狂send一堆CV出去，終於有間公司請我做初級文員，人工雖然低，不過都好啦，當學下嘢，識啲新嘅朋友仔。
最初的確好唔慣，無論係氣氛、人事、工作方式，仲有朝朝早要9點返到公司，之前我瞓到11點先起身㗎嘛，呢方面都適應咗一段時間，但好在遲到又冇我份，因為老豆好緊張，佢一定會叫醒我。
返咗工一排，有個男同事特別好傾，可能年紀同興趣接近，其實佢咪又係句句說話都有粗口，著裇衫打呔只係外表嚟啫。漸漸地習慣咗份工，文職又好，老粗工作又好啦，養得起自己咪得囉！
有一次經理打返嚟公司，話漏低咗張支票，叫人幫手拎去入票，張票係畀supplier，一定要當日5點前入數，否則hold起咗啲貨，遲一日入就要隔個weekend（當日係星期五）。問題係呢位經理平時食lunch、放工、放假，仲有出去做嘢嘅時候都習慣鎖房門，同事話佢要處理好多同錢有關嘅工作，聽佢哋講，當中又牽涉埋啲咩來價同折扣，我唔知具體係咩，總之眼前最大嘅難題就係5點前要拎張票去入，而張票就喺一間鎖咗門嘅經理房入面。
我記得自己問咗句：「開過張票咪得囉，點解大家咁緊張？」
有個同事答我：「今日入唔切就當星期一數，呢度hold幾日，梗係緊張啦！張票老細簽咗名，老細今日又唔喺度，想開過張都唔得。」
大家喺度商議點做，有人問有冇後備匙？但真係冇。又有人話不如試下撞門，有個阿姐叫佢唔好癲。
結果我決定出手，搵一張硬身嘅卡片就得㗎喇，我用咗10秒唔使就搞掂，一開門已經見到張支票擺正喺經理枱面。
有個女同事仲話我好勁，我有生之年除咗自己老母之外，好似真係冇女性讚過我。
我：「好簡單㗎咋，得度門，又冇鐵閘，有張硬少少嘅卡片，喺一邊拗彎少少，然後用有弧度嗰part順住門鎖同門框中間嘅罅隙攝入去……總之easy啦！」
女同事：「雖然唔知你講乜，不過真心勁，幾下散手搞掂。」
呢位女同事嘅讚美，亦係我喺呢間公司最後一次聽人讚我，因為今次事件之後，大家好似驚咗我一樣，經理話佢間房要換一個密碼鎖；有同事行開咗無端端跑返埋位，望一望我之後，將枱面個銀包放入褲袋先再行開；最傷心係，當日讚我嗰位女同事有次話唔見咗條手鍊，佢第一個就行埋嚟問我：「你有冇攞到我條手鍊？」
我：「幾時有攞你嘢呀？」
「我意思係有冇見過我條手鍊啫，唔使咁緊張。」
後來聽講佢自己搵返。
本來我都覺得係自己諗多咗，直至有一次，同我玩得比較埋嗰位男同事話：「佢哋傳緊你以前可能犯過事，話你手法好純熟，又話你之前大半年冇返工，可能係犯事衰咗，而家好緊張啲財物。」
我相信呢位男同事真係想話返畀我知咩事，不過聽完難免好嬲同唔開心，心理上開始好討厭呢度啲人同埋環境，然後我做咗件好傻嘅事，就係辭職，瞳叔你唔好鬧我呀，當時個心真係好唔舒服。
其實我識開鎖，係因為我老豆係開鎖佬，佢嘅工作就係維修水電同開鎖，我之前冇嘢做日日跟住佢返工，佢啲伙計的確係老粗，個個食煙飲酒講粗口，所以佢好想我返寫字樓工，可惜我真係唔鍾意。
而家跟老豆出去做水電，另外兩父子仲拍住上接啲24小時開鎖工作，我覺得生活得幾開心。