聽朋友訴說老公失業半年搵唔到工作嘅故事，我並非刻意去安慰佢，純粹記返起做headhunt時遇過更worse嘅真人真事，一個40歲嘅candidate，同樣係被裁員，當時佢搵工已經超過一年半。
由於被裁後有賠足錢，我呢位從事採購業嘅candidate最初唔算太擔心，而且2017年嘅環境甚至比目前更好，所以佢稍事休息咗兩星期先開始搵工，點知一切比想像中更困難。數唔到寄出咗幾多份CV，只記得大約一個月後，終於有公司打嚟約佢interview，1st in順利，2nd in亦愉快，呢位candidate自言已經幻想緊喺新公司工作嘅情景，可惜最後唔知衰咩，始終等唔到confirm offer嘅電話。
然後開始有唔同嘅headhunter打畀佢，每個都話「有份工好適合」，然後傾完一大輪又冇回音，坐下坐下，三個月過去，真正去過人哋公司interview嘅工作得一份，不著邊際嘅headhunter phone call有幾十個。
再起步，有間大公司收到佢CV後約interview，第一round同HR好好傾，第二round同line manager都投契，未完，第三round要視像見佢哋新加坡個阿head，過埋，HR又send咗個test畀佢做，喺屋企完成就得，completed，佢又開始幻想喺呢間公司工作嘅情景，由於地區都幾近屋企，佢甚至諗埋返工放工可以行路當舒展，附近有咩lunch食……最後都係冇下文。
今次佢學精咗，拎住HR當日畀嘅卡片，直接打direct line問下招聘進度，對方答公司in咗另一個更適合，希望將來有機會再合作。
頹，想休息一排收拾心情，但諗起啲錢會坐食山崩，再望下老婆同埋個囡，幾唔開心都要重新出發，繼續搵工。
由於直接send CV去公司冇乜feedback，心理循環驅使下又再send去各大小獵頭公司，一如所料，跟住就收到好多headhunter電話，開場白都係嗰句：「我手頭上有份工好啱你。」最後都係有頭冇尾，最經典係有個headhunter兩個月前call佢，而家又介紹返同一份工，對方應該每日接觸太多candidate所以唔記得，佢開門見山問：「之前你搵過我一次㗎喇，聽落係同一份工，你當時話有消息call我，而家嗰份工係再請人定係到而家都未請到？」
對方有啲尷尬，但又好誠實：「係喎，有啲印象，唔好意思，我都唔知個客想要乜，畀咗超過30份CV都唔啱心水。」
佢話聽得出個headhunter好灰，不過佢仲灰。
如是者，跌跌撞撞又半年，日子過得真係好快。老婆見到出面有招聘會，喺商場裡面好多攤位嗰種，佢認為可以試下，肯降低要求同埋減薪照計會有優勢啩！點知呢個係自己一廂情願嘅諗法，首先中年轉行唔係好多人肯畀機會，招聘會當日已經有個負責interview嘅人講：「一路學一路做就難啲，老細希望一埋位就自動波。」
「明白。」禮貌道謝，轉身走。
願意減薪又係咪一定搵到工呢？都唔係必然。同樣係招聘會，有個in佢嘅妹妹仔問：「係咪騎牛搵馬㗎？你做兩個月唔做，到時我要再搵，老細實鬧㗎！」
顆粒無收，咁又差唔多一年，聽聞每年第四季都係特別難搵工，年尾冇人走，要走都等埋農曆新年出雙糧先走，明白嘅，結果佢走咗去考保安牌，心諗返工煲下劇，瞌下眼瞓，同人打下招呼應該搞得掂，頂住先囉。
最後發現，每一份工都有學問，每一份工都有難做嘅地方，就算係保安呢一行，同樣好似office咁有小圈子。有幾位同事好識得巴結阿頭，獲分配嘅巡邏路線會特別筍，佢冇成日送禮，放工又唔跟大隊去飲茶（當時返通宵更），同阿頭仲有其他同事嘅關係自然冇咁close，留啲豬頭骨路線同埋崗位畀佢係意料中事，只係冇諗過做得唔好仲要畀人用粗口問候：「DLLM，你唔做大把大學生等住做，好多後生仔都喺waiting list呀！你走咗即刻有人返工。」
以前返office人工高一倍，老闆同埋班大客都唔會鬧人鬧得咁粗鄙，最後過唔到自己嗰關，返咗兩個月之後辭職，夜晚瞓唔著偷偷地喊，佢話唔係因為冇錢先喊，而係嬲自己連一份保安都做唔掂，嗰段時間懷疑人生，經常失眠。
再跌入失業搵工嘅循環，不知不覺已經超過一年，中途又見過幾份工，有headhunter介紹嘅，有自己搵嘅，有人禮貌地叫佢返去等通知，亦經歷過狗眼看人低嘅interview態度，甜酸苦辣，點滴在心頭。
我哋之間嘅interview有好多互動交流，傾下傾下已經個幾鐘，幾次想stop都唔忍心，面前呢位男士一度眼泛淚光：「係咪阻住你？有時我比較多口水，可能想見耐啲先返屋企，雖然老婆知我失業，亦都冇催迫我，甚至陪我一齊睇求職網站，不過咁早返去始終有份無形嘅壓力。」
我話明，不過佢堅持要走。
第二日介紹佢去見一份司機嘅工作，到而家我都覺得係錯配，一個本身做採購嘅人，接近4萬蚊人工，而嗰份接載老闆嘅司機工作就係22000，過到試用期先再加1000，個客好易話為，有車牌，keep住揸開車，冇發生過嚴重交通事故，手車夠定夠穩，冇公司司機經驗都可以一試，最緊要醒目，有時要車埋賓妹接小朋友放學，有時就接埋老闆個老婆，千祈唔好亂講嘢。
「而家好多工廠移晒去cambodia、越南、孟加拉，細公司都執得七七八八，40歲轉行都好嘅，50歲再失業我都唔知可以點，人工少啲咪習慣下囉。」呢個係佢最後一次同我講嘅說話，係一個WhatsApp嘅voice msg，不過你問我，我依然覺得呢份工係錯配，相信佢當時一定適應咗好耐。
人到中年轉工轉行壓力好似山咁大，生活上多負擔，屋企有老有嫩，我希望朋友聽完呢個故事之後，可以同佢老公更多溝通，畀多啲支持，甚至陪佢一齊睇下招聘網站，有時唔一定見到筍工先可以交流，見到啲搵笨嘅工都可以一齊笑下，輕鬆下。我個candidate失業一年半都搵到，佢老公暫時失業半年，我相信一定得嘅。
執筆前想了解嗰位candidate係咪已經轉咗工？WhatsApp單刀直入就問：「關心下你，睇下仲係咪做緊當日介紹你嗰份司機工咋。」
佢隔咗半個鐘先覆我：「對唔住，頭先接老闆，仲做緊呀！我老婆反而幾鍾意喎，因為而家唔使OT，又唔使拎嘢返屋企做，放假就真係放假，賺少啲，咪慳啲使囉。」
「好吖！搵到食就好！」