同事早兩個月分手，最初成個落晒形冇晒心機，除咗安慰說話之外，我哋都唔敢講太多，好在頹足兩個月之後，呢位同事總算走出陰霾，變返以前咁開朗，仲識得講笑。
「我以前真係鬼黯眼。」
「算啦～都過咗去，畀你發現佢偷食咪好囉，一世唔知仲慘。」
「我意思係以前唔知點解覺得佢好靚仔，而家諗返真係……邊忽靚仔呀？」
「嗱，你講起我先講㗎咋，其實我哋成班都覺得佢唔靚仔。」
「真㗎？」
「係呀，記唔記得當初你話自己個男朋友似古天樂？」
「喂呀，唔好提啦！」
「你講咗好多次之後，我哋成班人都好有期望，直到Christmas Party你帶埋佢出嚟，嘩！真係嚇一跳。」
「咁你哋當日又話佢真係似古仔。」
「首先，一場同事兼朋友，點都要畀面你，其次，我哋唔係講嗰個古仔。」
「頂你吖，你哋講古巨基呀！」
「古巨基不知幾正，佢就想喇，我哋講嗰個古仔係古明華。」
「真係唔好再提，我錯喇！」
「其實古明華靚仔過佢十倍，我對古明華冇貶意，不過佢身型的確似足古明華，當時又係滿面鬍鬚同埋紮馬尾，古天樂古巨基？你幾多度近視啫？」
情人眼裡出西施，我仲聽過有人話自己條仔似宋仲基，點知真人成個「營養快線哥」咁（唔知邊位可以自行google下）。
講到尾，你所愛嘅人，其實只係一個普通人，係你嘅注視令到佢閃閃發光，所以識得愛同埋付出，比起受到溺愛更有福，因為有魔力嘅人係你先啱，當你唔再愛佢，呢個人身上就唔再有光芒。