有人辭官歸故里，有人漏夜趕科場，公司有舊人離開，同日有新人返工，基本上係職場每日發生嘅事，只係唔同公司有唔同嘅處理方法，有啲希望新舊交接，等上手員工臨走前可以教新人，亦有公司死都要等上手員工離開，先會叫新同事on board。
投稿讀者阿Sam之前返新工就有同上手同事重㽮~~~~~ 一日咁多，返到新公司所有嘢睇落正正常常，唯獨是同佢交接嗰位同事黑口黑面，而且感覺上好冇禮貌，態度極差。
同佢交接嘅同事叫Flora，公司請阿Sam返嚟就係代替Flora個位，一個first day，一個last day，Flora同Sam講解工作時其實冇咩特別，只係冇表情同埋講嘢冇尾音，畀人一種唔耐煩嘅感覺，所以Sam都唔敢問得太deep，有咩盡量記住先，之後唔明就打算再問其他同事。
Sam仲留意到一樣嘢，就係當其他同事傾計嗰陣，Flora係完全唔參與，感覺上極不合群。就嚟到Lunch time，Team Head話要請大家食飯，名目係歡迎阿Sam第一日返工，同時幫Flora farewell，不過Flora冷淡回應：「唔去！」然後起身行咗去，當時個氣氛就好似卡通片有隻烏鴉飛過一樣，同事亦都靜晒，冇人評論或者講啲乜嘢，幾秒鐘尷尬過後，Team Head打圓場表示：「唔緊要啦！我哋都要食飯，陣間飲茶啦好冇？」
作為新人，Sam雖然意識到氣氛怪怪，但都要去㗎啦。
食完飯，Team Head似乎唔介意Flora剛才嘅態度，仲特登走去買西餅，想當散水餅咁同Flora分享……乜散水餅唔係離職員工買㗎咩？點都好，Team Head最後都買咗，喺公司打開個盒叫Flora一齊食嘅時候，Flora又係非常冷淡兼決絕咁答：「唔食！」
Sam當時已經成頭問號，心諗呢條女咩料呀？究竟佢同公司有咩深仇大恨？定佢本身係一個冇禮貌嘅人？好多疑問，又唔好意思問，反正Flora都last day，過埋呢日先算啦！
第二日返工，Sam痴住兩個同事去食lunch，主要目的係想八下Flora咩事？究竟係間公司唔好吖？定係同Team Head有牙齒印？因為如果有咩問題，佢希望可以早啲有個底，好過試用期後辭職要一個月通知。
同阿Sam食lunch嗰兩位同事最初三緘其口，總之就扭扭擰擰，煞有介事咁。愈係吞吞吐吐，阿Sam就愈有興趣知，卒之其中一位同事講咗句：「Flora係慘嘅，不過你係男仔，影響唔到你。」
原來成件事係Flora早前畀隔離department個阿head性騷擾（為咗唔使將個名打咁長，以下以「咸濕朱生」代替），公司好多女同事都知咸濕朱生份人係點，周不時講賤嘢冇避忌，例如佢會望住女同事個胸講：「嘩，今日件衫咁突嘅，真係足三兩喎！」又試過眼甘甘望住一位著裙嘅女同事講：「你隻腳幾正喎！」
大家平時會當佢廢噏，不過有一次咸濕朱生走埋去Flora個位傾公事，將隻手放喺Flora膊頭，再掃落背脊，Flora即時發難大叫：「你做咩非禮我呀！」成個office啲人望晒過嚟。
一齊食飯嗰位同事講：「嗰單嘢搞到好大，Flora話要報警，老細走出嚟睇咩事，叫咗我哋Team Head，咸濕朱生，仲有Flora三個人入房，聽講咸濕朱生死口唔認，但Flora咬住唔放，老細話唔想報警搞大件事，傳出去對公司唔好，我哋Team Head就主張息事寧人，總之管理層就唔想煲大。」
Sam：「自己下屬被性騷擾同非禮都唔出頭，仲叫下屬啞忍，唔怪得Flora對Team Head態度咁差啦！」
「本身好似話唔想你返工日期同Flora重疊，但係HR計錯數，一早叫你噚日返工，所以勸過Flora扣假提早last day，Flora唔制，佢覺得自己冇錯，唔會扣假走，加上Team Head覺得你係男仔，就算Flora將件事講畀你聽，你都應該唔會嚇走，我估如果請返嚟嗰個係女仔，公司一定會叫你遲兩日先返工。」
另一位同事又搭嘴：「你個位上幾手都係女仔，可能係咁所以今次請男仔。」
知道咗來龍去脈之後，Sam當日放工就辭職，Team Head問佢點解返兩日就唔做？Sam答：「雖然你哋唔係性騷擾同非禮Flora嘅人，我亦係一個男仔，但係知道同事有啲咁嘅遭遇，竟然唔幫佢仲叫對方息事寧人，我唔認同呢種道德同價值觀。」
Sam表示，市道唔好，佢辭職後花咗兩個月先搵到另一份新工，不過並無後悔當日離開嗰間公司嘅決定。