當年做記者如果唔係返東蘋太（東方蘋果太陽），基本上可以預咗待遇唔會高得去邊。我係由一間細報館起步，中途轉去一間大報館，月薪多咗幾千蚊，不過後尾又返去嗰間細報館，人工還原基本步。
點解咁傻？因為做得開心，啲人又啱key囉！
人工得14500，福利差到唔想再提，成班同事一路鬧公司一路做，就係咁樣先至開心吖嘛！嗰間報館傳執笠都大大話話傳咗幾年，耐唔耐又會拎出嚟炒作一次，雖然次次都唔成事，不過同事之間都心裡有數，公司係咪賺錢，管理層有幾咁冷酷無情，一早已經在心中。
有時真係會諗：「係就快，唔好等下個禮拜。」你成日話執笠、裁員、重組、減薪……真又好假又好啦，無限輪迴loop嚟loop去其實好折磨，作為打工仔甚至會諗：「係咪裁先？裁可以賠一個月，我梗係唔會自己走咁笨啦！」講到尾都係自己唔敢跳出comfort zone，亦都唔捨得班同事啫。
公司個環境熟悉到好似返屋企一樣，工作上又自動波，一埋位就感覺自在，同事之間亦有講有笑，老土啲講句好似兄弟姊妹。人人都明白遲早要走，唔走其實冇前途，但人始終有惰性同埋會怯，一方面不安於現狀，另一方面又害怕出走，有冇人明白呢種感受？
有一日我身在台灣收到同事WhatsApp：「真係執喇今次，突然宣布，而家執嘢，仲有其他記者行家喺門口等住影我哋相，你喺台灣返嚟自己call HR啦，HR嗰邊會留喺office十日八日搞埋啲手尾。」
呢種感覺好奇妙，乜我唔係一早知公司會執㗎咩？乜我唔係有晒心理準備㗎咩？係呀！全部喺心裡面預演過無限次，不過當呢一日真正來臨，個心一樣係咁難受，我唔係唔捨得份糧，14500，出去搵過份工相信唔難，我只係唔捨得啲人、事、環境，要告別一個充滿感情同埋回憶嘅地方，話放低就放低咩！
約朋友食飯唔齊人可以等下次，但係公司執笠或者裁員而導致大家各散東西，呢世都唔會再有機會一齊共事㗎喇。一諗起，就覺得好傷感。
更不安嘅係，我當時唔止諗住轉工咁簡單，我直情係想轉行，之後工作性質會有極大轉變，真係好驚自己唔適應。
呀，我好似跳咗一步，應該驚人哋唔畀機會我轉行先。
轉行之後嘅際遇並唔平坦，如果我話見工冇畀人質疑過，你都唔會信啦！好喇，終於搵到新工喇，適應方面又好吃力。舉個例，你明明知道係新公司係地獄，不過內心會同自己講：「唔通辭職呀？好難先搵到間公司唔嫌棄我冇相關經驗咋喎。」
內心嗰種煎熬真係呢……最後我都係辭職。
根據我嘅經驗，當你上一份工做得太耐，再轉新工嘅初期通常做唔長，因為你內心會將新公司同埋舊公司比較，新嚟唔熟悉環境，自然冇咁放肆同隨意，然後就覺得自由度大幅下降。同樣地，新同事唔會好似舊同事咁攬頭攬頸，跟住你又會覺得自己係多咗出嚟嘅人，有時仲要扮晒魚蝦蟹斯斯文文咁同人溝通，諗起都唔自在。
如果你轉工之後頭一兩份做唔長，聽我講，千祈唔好怪責自己，因為咁樣係好正常，轉多幾份你就會開始淆底，明白再咁樣落去會食屎，然後你自然會坐定定，好多人都會出現呢種情況。
曾經嚴重迷失方向，出盡奶力都唔知條路要點行，中間跌跌撞撞無數次，但係而家望返轉頭，其實都要慶幸個天迫我跳出comfort zone，否則我可能仲未離開嗰間報館，人工仲未突破2萬。
歲月從未待我哋溫柔，不過一直驅使我哋成長。
已經失業，或者準備失業嘅朋友，共勉之。
所謂無底深淵
下去
也是前程萬里