投稿讀者：Fan Fan
喺馬會做電話投注，其實公司會提供training畀員工，仲教得好清楚同詳細，甚至連球隊啲花名同暱稱都有一個表。
你可以話唔夠熟係我嘅責任，呢一點我唔否認，但係對於一個完全唔識足球嘅女仔嚟講，一次過要將咁多資料塞入個腦真係好難，曼聯叫紅魔鬼我知，車路士叫車仔我知，阿仙奴叫兵工廠我都知，但係諾域治叫金絲雀，仲有隊維拉利爾叫黃色潛艇，邊記得晒咁多呀？有時啲客仲會幫球隊嘅花名再short form，維拉利爾＝黃色潛艇＝黃潛，冇足球底子嘅人其實唔易記。
我唔知大家有冇食煙，喺便利店見到有人買煙，如果個店員本身唔食，要記晒啲煙名亦唔容易，佢哋好少會講隻煙嘅全名，只會話：「黑冰5」，冇食開鬼知咩，呢啲都係靠做得多聽得多去累積經驗。便利店仲好啲，店員唔識嗰陣會直接叫個客指～～～左邊左邊，係係係，隔離，唔係呢隻，呢隻黑冰1，隔離嗰包有個5字先係黑冰5。
做電話投注見唔到對方，如果客人講到好快或者講花名，的確會幾頭痕㗎！賽馬投注好啲，買馬嘅人通常真係講3場7號，我哋一撳就係，佢哋好少會話：「第三場隻忠誠勇毅，搭第四場隻元朗鄉黑」，好少會講畜生名，一般都係講number，而足球投注就相反，啲客好少講場次，通常講球隊名，但有班人又好鍾意講花名，有時真係load唔切㗎大佬！
仲有人會自己幫啲球隊改埋名，懶係風趣幽默咁，有次個阿叔買日本職業聯賽：「名古屋八婆Win吖。」
我：「名古屋八婆？」
阿叔：「即係名古屋八鯨呀！」
我：「我哋得名古屋鯨魚咋喎。」（好似去餐廳食飯，吞拿魚冇晒，同佢講得返三文魚）
「妹妹仔你識唔識㗎？名古屋八鯨咪即係名古屋鯨魚嘅前身囉！」
……叻喇叻喇！足球博士喇！正正經經叫返名古屋鯨魚啦好唔好呀？又名古屋八婆又名古屋八鯨，冇人想知呢啲歷史呀！
坦白講句，後生嗰班一般都用晒網上投注㗎喇，用得電話投注普遍嚟講係班阿叔（唔係全部嘅，偏多阿叔囉），啲阿叔好多時都粗聲粗氣又冇耐性，成日話快啲快啲，想快啲你就講清楚啲啦！有好多仲帶鄉音，聽得辛苦都算，仲要催命符咁，輸唔切咩！
早排先有個阿叔狗眼看人低，買波期間已經講到1999，然後又鬧人動作慢。喂！場波夜晚先踢，當時係中午，你趕咩啫？我估佢可能前一晚輸咗好多啩，語氣差到呢！臨收線仲要講句：「落幾場波都搞唔掂，DLLM，抵你一世做接線生。」
接咩線生呀？你咩年代㗎阿叔？嬲嬲地咪抄低佢買邊隊囉，準備全日咒死佢。到而家仲記得佢買熱刺讓球主客和嘅主勝，我夜晚有跟進㗎，上網見到熱刺半場領先3:0，心諗呢個世界真係唔公平，點知第二日睇新聞發現熱刺畀韋斯咸追返3:3完場，主勝開唔到，我全日心情即刻好返晒。
你賭波賭馬係搵食，我哋打份工都係搵食，唔使睇唔起人哋嘅，就算我做死一世「接線生」，都係靠自己雙手，尊重下人哋嘅職業啦！
大家如果想投稿亦可以去以下條link，刊登咗會有稿費$500㗎！
http://hkofficedaily.com/mailbox/