朋友Angel投訴同居男友完全唔做家務，用微波爐叮完嘅香腸唔記得食，廚房啲垃圾又唔倒，乾咗幾日嘅衫唔收，成日掛住打機。
WhatsApp group裡面另一位已婚嘅女性朋友Sally聽到「打機」兩個字就觸發神經，原來佢平時放工都係會買餸煮飯，而老公呢個時候例牌喺客廳打機，打打下會入廚房慰問佢煮成點？又問辛唔辛苦？語氣好溫柔，每次佢都中計，以為個衰佬想幫手，點知終極目的係想知道夠唔夠時間打多鋪機。
容許我中途插一插嘴：「想問下你老公打咩game？」
「你哋真係冇人關心我煮飯㗎喎！PS出咗隻新嘅FIFA吖嘛！你啲friend呀！」
我：「問下啫，唔使咁勞氣既。」
暴躁嘅Sally繼續講：「有時咁啱切緊嘢，見到佢假仁假義問你煮成點？原來係想爭取時間打多鋪，真係有諗過順勢斬死佢，不過唔值得吖，我煮我嘅餸，你打你嘅機，唔搞亂檔已經係幫忙。點解我當年唔學Angel你咁樣，試咗同居先結婚呢？」
Angel：「咪係囉，話佢又費事鬧交，得你一個要返工呀？得你一個想relax咩？我份工都好辛苦㗎！」
Sally：「不過咁，我會平心靜氣叫老公幫我執枱同埋洗碗，其實我老公冇擺款或者發脾氣，聽完我指令就會跟住做，佢唔係唔願意做，而係唔知道有啲咩要做，唔知從何入手。我以前同你一樣，見佢咩都唔做走去打機就谷住道氣，成日想等佢主動開聲話幫手，想佢自動自覺。」
Angel：「下下要開聲好冇癮㗎嘛！」
Sally：「男人諗嘢同埋做嘢比較直接，我舉個例，頭先Eva咪喺facebook share咗個小飛俠拉花圖案咖啡嘅，我同你都有留言㗎，大家一齊喺度話好靚呀～～好得意呀～～～總之呢樣嗰樣一大輪，無非係想有人出聲先，約個時間去打卡啫。相反地，我老公同佢班麻甩friend就直接好多，佢哋Online打FIFA從來唔會搞咁多嘢，唔會又出post又耍套拳又拜四角，我老公打畀佢班friend都係得一句對白：『喂，打機打機』，連招呼都冇㗎，然後成班就好似小朋友咁齊齊online。」
Angel：「其實我嗰個係懶同埋慣性囉。」
Sally：「兩個人一齊，有話直說就得喇，有時可以講多一兩次，佢慢慢會明白你幾時需要佢，點樣需要佢，之後就會識得自動自覺，最緊要大家可以喺生活中互相學習，唔好要對方估你想點，都唔好收埋一套標準然後默默扣分，你唔畀佢合格，都要畀佢知道個計分制度係點吖嘛。」
我：「如果唔識自動自覺呢？」
Sally：「咁咪退貨囉！我結咗婚就話難啲啫，好在個老公未算冇得救，Angel你都要試下開心見誠同男朋友溝通，希望你唔使退貨啦！」
有時聽朋友分享呢啲生活故事，雖然冇大上大落嘅情節，冇咩意想不到嘅結局，所有嘢都係平平淡淡，不過當中總有啲細節可以啟發自己。