朋友希望出席男友爸爸喪禮，但因為撞正星期五，佢嗰間舊公司唔畀員工放Friday或者Monday，驚佢哋自製long weekend，所以部門主管當時以「男友爸爸唔係直系親屬」為理由而拒絕批假。
我朋友嬲到當場劈炮唔撈，賠一個月人工即走都在所不計，佢嘅憤怒絕對可以理解，只係要賠錢畀舊公司就好唔抵。
講開有合理原因去請假都唔批嘅case，喺我寫廣告做資料搜集嘅時候，仲有另一位朋友Sarah提供咗佢嘅故事。
Sarah形容佢個前上司係「冷血動物」，當年佢個女發燒，Sarah打電話返公司請假一日，因為要帶囡囡去睇醫生，佢前上司隔住個電話反問：「你冇老公㗎？小朋友發燒就要請假？咁要個老公嚟做咩呀？你帶個女去睇醫生會好得快啲㗎？叫你老公帶啦！」
老實講，成年人出嚟返工打拚都係為頭家，個女發燒想請日假帶佢去睇醫生啫，講嘢都要句句有骨？
小朋友唔舒服，Sarah當時心情已經好差，所以吞唔落呢啖氣，即刻就喺電話同佢上司開拖，本身想安置好個女就返公司遞信辭職，因為實在太嬲喇，但佢老公話唔使為呢啲人勞氣，照顧咗個女先，強調百份百支持老婆辭工，仲開定支票等Sarah用嚟畀嗰一個月嘅代通知金，唔想佢再對住冷血上司篤眼篤鼻。
同前上司搞到不歡而散嘅唔止佢一個，Sarah走咗之後冇幾耐，佢另一位同事因為要幫朋友做伴娘所以想請日假，嗰位上司話：「做咩伴娘吖，做得多嫁唔出㗎，求其夜晚去飲，封返份人情咪算囉，做伴娘緊要定係做公司嘢緊要呀？呢個原因好難批你喎！」
佢個同事仲激，因為當時唔係隔住電話，而係喺公司面對面，佢同事直接一句ban埋去：「咁唔使你批，我辭職就得喇！」
冷血上司不甘示弱：「咁巴閉呀？你即走定係一個月通知先？講清楚呀！如果係一個月通知，嗰日我一樣唔會批假，有本事就曠工。」
佢同事：「我賠錢都要即走呀！你係咪以為公司份糧係天文數字呀？一個月我賠得起，當畀乞兒。」
職場真係咩人都有，雖然我知Sarah同佢舊同事單嘢已經係陳年往事，但正常人聽完都會覺得好嬲。
我：「係咪男人唔明白女仔之間嘅感情呢，朋友結婚梗係想幫手啦，同埋姊妹叫到，有時真係好難推，你上司未結婚㗎？」
朋友話：「佢未結婚，單身，40幾歲，不過呢個上司係女人嚟㗎，唔係男人，佢好憎人拍拖，我哋有幾個同事已婚，間中喺office講起老公，佢一聽到就會黑面。有一年2月14情人節，其中一位同事嘅男朋友送花嚟office，佢見到之後就起勢咁講埋啲難聽說話，又話紮花好肉酸，又話好似喺街市檔口求其買，真係超級過份。」
……
其實員工有充分理由去請假，就算你唔批AL，人哋一樣可以當no pay leave咁放，處處為難同事，搞到神憎鬼厭咁又何苦呢？返工為生活，做嘢求開心，香港職場好細㗎咋，話唔定第日山水有相逢呢！