上文提要，我朋友嘅另一半因為頂唔順嗰啲不負責任嘅同事，諗住有兩個月通知就毅然裸辭，點知resign後先爆發第三波疫情，狂send 150份CV但係零回音，屋企兩老又唔會接受個女辭職嘅決定，結果我朋友就要逢星期一至五辦公時間內，畀女朋友嚟佢屋企打躉……呀，唔係，應該係開放個場地畀佢繼續搵工。（好似社區會堂咁）
以下用返佢投稿嘅第一身視覺。
＝＝＝＝＝＝
「BB…BB…食早餐喇。」
「嘩！」女朋友阿Jane喺床邊叫醒我，嚇死！
一時之間load唔到點解佢會殺上嚟，係喎！佢今日開始喺度「扮工」，而阿Jane亦一早有我屋企鎖匙。
由於我係一個Slash，基本上會瞓到十點幾十一點先自然醒，再慢慢開始手頭上嘅design工作都未遲，但係阿Jane因為要扮返工，佢一定要8點鐘左右就出門口，做到同以前一樣，我而家又同佢一樣住元朗，所以阿Jane 8點半已經大軍壓境，仲買埋早餐上嚟，其實都無所謂嘅，一直希望早啲起身預備工作，有女朋友親自叫醒我都唔錯吖！
我係咪好識得安慰自己？
坦白講，佢喺度嘅日子，我親眼睇住阿Jane好努力咁搵工，真係完全冇停過咁滯。我哋一齊喺廳工作，每次行開行埋都見到佢個mon係各大求職網，因為我知佢心底裡都唔好意思，而且好傍偟同焦急，一來瞞住父母去我度扮返工始終有罪疚感，二來再係咁落去會坐食山崩，三來係嗰種難以言喻嘅不安感覺，唔係見完工冇feedback嗰隻喎，係人哋收完CV連打嚟問兩句嘅電話都冇，好似全個世界，全個職場都靜晒。
點樣解構呢種心理狀態呢？即係你明明知道自己能力係ok，就當高估自己打個7折喇，都冇理由完全冇feedback吖，然後你會懷疑自己，再諗下落緊job ad嗰堆公司究竟係唔係路？唔想請人又點解要出post？難道市場上真係咁多勁人一齊搵緊工？定係疫情下公司拖慢咗recruitment進度？HR home office約唔到interview？
心裡面幾廿個疑問，每日send完CV都重複諗完再諗，好不安，又唔想承認後悔，如果時光倒流唔通選擇忍落去？但係長此下去又唔係辦法，究竟有冇做錯離職決定呢？係咪衝動咗呢？
我完全明白阿Jane諗咩，因為我都試過失業，有時覺得個世界好似唔需要我一樣。
阿Jane搵工搵到第二個星期左右，終於收到一千零一個call喇，我特登返入房做嘢，等佢可以對答得更自然，你知啦！見工嘅態度一定同平時相處時唔同，我唔想佢咁尷尬。
大約過咗20分鐘，阿Jane叩房門話已經phone interview完畢，我當然順勢問佢滿唔滿意？呢份係咩工？有冇再約幾時face to face interview？
Jane：「頭先嗰個係agency嚟咋，佢而家先彈我份CV畀個客，聽落都幾好嘅。」
「Agency？即係運桔啦！」
Jane：「又唔好咁講，你個friend聶瞳以前都係做agency㗎嘛！你即係話佢運桔啫！」
OkOk，我收返。如是者過多一個星期，個agency都係冇回音，阿Jane都唔明點解。
「都話啲agency運桔㗎啦！」
Jane：「係囉，九唔搭八。」
😂😂😂
工作還工作，感情還感情，多咗個人朝九晚六喺我屋企，多少都有影響我工作，佢唔會打擾我，但總之就冇以前咁自在，工作效率的確係大幅下滑。以前我忙起上嚟唔食lunch，或者3至4點先call個外賣，而家Jane喺度就點都要顧住佢，真係好準時1點鐘放飯。
我做Slash嘅時間亦比較自由，可能一星期有一兩次約下啲friend或者工作夥伴出去食tea放電，自從Jane空降我屋企之後就冇喇，唔想獨留女友在家中吖嘛。咁你知兩個人一齊冇理由唔講嘢吖，佢又唔係啞，女仔有時都多啲嘢講，撞正我份工又好需要寧靜嘅環境，多多少少都有影響。
嫌完佢煩，我又會心生憐憫，見到Jane搵工搵到冇晒信心，又迷失自我，實在唔可以置之不理，所以我都會化身輔導員開解下佢。
終於……
Jane：「收到個email，呢間公司想我聽日下晝4點用Zoom做interview呀！」
「都話我女朋友得㗎啦！咪住先，又係agency？」
Jane:「唔係呀，直接嗰間公司嘅HR呀！」
「正！咁你聽日畀心機喇！」
第二日Jane喺我屋企化晒妝，上身著住佢自己好formal嘅返工衫，下身係我條波褲，坐定定等待Zoom interview開始。老規矩，我入房自閉，唔阻佢發揮，點知今次佢極速in完叩我門，5分鐘，真係5分鐘。
「咁快呀？唔緊要啦！繼續搵囉！我支持你呀！」
Jane：「佢叫我下星期一返工。」
「唔係啩！你頭先in咗5分鐘咋喎，咁都請？會唔會兒戲咗啲呀！」
Jane：「我都覺得好求其，但真係叫我下星期一返工，offer都講埋。」
呢間公司都幾出名，好唔好做就唔知，但我決定聽日去佢哋門市幫襯，係咁易買返幾件嘢當答謝對我女友嘅知遇之恩，最緊要係咩呀？係呢間公司請咗阿Jane之後，我可以光復家園呀！
冇人比我更開心，我覺得阿Jane自己都冇我咁開心，但係你哋明唔明白，我唔可以畀佢發現我開心，我嘅喜悅一定要由外去返內再過濾完先出返外，要收一收，最佳效果係替佢搵到工而興奮，不過又有種唔捨得佢要返工嘅心情，好難好難拿揑。
之後一日，我帶Jane去食大餐，另外買咗份小禮物畀佢，我將自己嗰份喜悅化成實際獎勵，仲有幾日，過埋個weekend就望見家鄉喇！Yeah！
點知星期五嗰個晏晝，Jane收到電話：「喂，係呀，我係，哦，哦，好，知道。」
「邊個打嚟？唔係間公司反悔唔請你啩？」
Jane：「唔係呀！係之前Send CV去嘅另一間公司打嚟，佢想約我星期一上去interview，咁我應唔應該同之前嗰間講，想遲兩日先返工呀？直接話見多一份工先決定會唔會好衰？」
搵工呢啲嘢真係好邪，死搵爛搵冇回音， accept完offer就有另一間打嚟約你，瘦田冇人耕，耕開有人爭。
「好似唔係咁好喎，一早答應咗。」
Jane：「我都明，不過真係好想見埋先。」
另一間公司都係出名㗎，有門市，我轉頭就落去燒佢間舖！！！你係咪一定請我女朋友先？如果唔係，你唔好搞佢啦！佢本來開開心心等星期一返新工㗎喇！
===
我的失業女友
Ep1: http://hkofficedaily.com/?p=12452