每次有人上嚟join speed dating，不論男女，我哋都會了解下佢哋幾耐冇拍拖？因咩事而分手？知多啲，就可以減少錯配嘅機會。
今次眼前呢個女仔表示，佢係上年11月同男朋友去完新加坡之後分手。
「當時冇咩地方揀，又要清埋手頭上嗰幾日大假，佢上年年頭同屋企人去咗東京，我上年年中就同幾個女仔friend去完大阪，然後大家都唔想去日本，歐美又唔夠假期，韓國佢話好憎，輾轉之下就決定去新加坡。」
我：「你哋之前冇去過旅行？」
「冇呀，我哋嗰陣拍咗拖9個月，新加坡係第一次同佢結伴旅行，到埗第二日去咗環球影城，佢話周圍好長龍，加上好熱，所以發晒脾氣。」
我：「應該係嬲個天同埋嬲環球影城先合理喎！」
「我都覺得好無辜，決定去新加坡嘅人其實係佢，呢個地方冇冬天，一年365日都咁熱，應該冇人唔知啦！新加坡本身唔係多嘢玩，4日3夜再skip埋環球影城就同冇去過一樣。前一晚仲好地地，嗰朝去到見到多人就發晒脾氣，話啲機動遊戲買咗快證都要排，又熱又攰。講真買快證已經大大縮短咗排隊時間，有啲等入場嘅位仲要係室內，最好笑係佢竟然發工作人員脾氣，人哋指示邊個位係快證入口啫，佢大大聲咁『妖』，嚇親我又嚇親人。」
我：「咁咪玩得好唔開心囉？」
「係呀，朝早玩咗兩個機動遊戲，佢已經黑晒面冇再同我講嘢，其實我做錯咩呢？已經好識做陪佢行入餐廳坐，再主動走去買汽水，我只係問咗句『可樂啱唔啱』，佢就好晦氣咁答『唔知呀！是但啦！連買杯嘢飲都要排隊，唔柒飲呀！』都冇叫佢排，我去買之前confirm下佢想飲咩啫！」
我：「然後點收科？」
「我買完可樂返嚟遞畀佢，佢死都唔飲，話嚟環球影城浪費時間，佢要走先，叫我自己玩，我有一刻都懷疑聽錯，點知佢真係自己走，最慘係隔離枱又係一對情侶，劇情幾乎一模一樣，唯一唔同嘅係，黑面嗰個係女仔，千依百順嘅係個男仔，點都好啦，最後個女仔都笑返，我一個人對住兩杯可樂，再諗起自己男友走先，真係喊咗出嚟。」
我：「所以你之後都走咗？跟住兩日佢冇氹返你咩？」
「我冇走呀，下晝自己喺環球影城玩機動遊戲，夜晚食埋飯先返酒店，佢喺房裡面打緊機，手遊嗰啲，仲嬲我咁夜先返，之後兩日佢繼續畀面色我睇，日頭叫佢出去又唔出，話好熱，出去唔使預佢，嗰幾日好似一個世紀咁長，好辛苦先捱過。返到香港佢可能平伏咗，想氹返我，又認自己脾氣唔好，不過我怕咗喇，一世人流流長，點解要同個咁嘅人一齊？」
唔知大家有冇聽過一句說話，旅行係情侶之間最好嘅考驗，因為疲憊可以還原一個人最真實嘅一面。
如果攰起上嚟就黑口黑面，對身邊嘅人發晒脾氣，埋怨呢樣嗰樣，睇落去以為好小事，但係長遠嚟講，將來同居或者結婚，屋企有咁多繁瑣事項，呢個人一定會繼續畀面色你睇。
相反地，如果對方好攰仲識得顧及另一半嘅感受，唔去怨東怨西之餘，仲會照顧你或者氹你笑，咁就真係要珍惜呢個人喇。