好多人以為嚟speed dating嘅男男女女一定係三尖八角，冇人要先會搵我哋呢類公司幫忙，其實唔係咁㗎！好多人搵唔到另一半，純粹係圈子同際遇問題，就好似我其中一個女會員Eva，職業係幼稚園老師，大眼靚女一名，但有乜辦法啫，全部同事都係女人，佢本身仲要係好文靜嘅宅女。
初初同Eva傾計，想了解佢嘅愛情觀同埋擇偶條件，佢提出嘅要求都係好簡單，結果亦好快幫Eva搵到另一半，兩個人喺埋一齊之後發展得好順利，拍咗一年半已經決定結婚，最大原因應該係佢兩個有共通點－－－宅，兩口子最鍾意留喺屋企打機煲劇睇書。
可能係對我間公司有信心，當時Eva介紹咗新客畀我－－－佢媽咪。
Eva：「我媽咪50幾歲，你哋係咪淨係浸小妹妹玩？」
「點會呀？我哋有分唔同年齡層㗎嘛！」
Eva讀小學三年級嘅時候，佢爸爸喺出面有外遇，典型嘅拋妻棄女情節，老土得嚟又真實，佢爸爸做生意，搵到啲錢，有層樓，但係離婚時乜嘢都冇留畀佢媽咪，全部畀晒個女人，包括層樓……
「下，咁贍養費都有啩。」
Eva：「真係唔好問點解，媽咪蠢，又心軟，有時上一代嘅女人好多嘢都冇得解，好多嘢都唔識為自己爭取，我大個懂事後都話過佢，當然係出於緊張啦，但之後都無謂窮追猛打喇，唔想提起啲令媽咪唔開心嘅事。」
根據Eva講，其實佢媽咪離婚後不乏追求者，因為auntie其實幾靚，老咗都靚，同Eva好似樣。
不過Eva媽咪一直都冇再拍拖或再婚，一來公公婆婆好早已經唔喺度，二來Eva爸爸又唔要個女：「媽咪一個女人湊住我，佢結婚之後成10年冇做嘢，為咗養我去咗酒樓做侍應從頭開始，我知佢其實好辛苦。」
Eva性格內向，做幼稚園教師之後一直識唔到男仔（莫講話男朋友，識個異性都難），曾經一度諗住唔結婚，同媽咪相依為命，不過媽咪反而鼓勵佢「相睇」。
「真係叫你相睇？」
Eva：「佢意思係speed dating之類，不過老人家唔識呢啲嘢，喺佢眼中即係相睇。」
後來Eva喺我哋公司識咗男朋友，可能覺得服務好啦，佢竟然畀錢請媽咪嚟speed dating，呀……即係相睇。
我介紹過3位都係50幾歲嘅男士畀Eva媽咪，大家年齡接近嘛，可惜auntie話唔適合，及後Eva同我講：「原來有個叔叔對媽咪好好，成日會約出街睇戲食飯，我最近終於見到真人，都唔錯呀，老老實實，我見媽咪之前喺你度match咗3個都唔啱，諗住加碼再叫你幫佢搵，跟住媽咪先頂唔順同我講有叔叔呢個人存在，佢又收得幾密。」
「即係原來auntie一直都有男朋友？」
Eva：「唔係男朋友，佢話手仔都冇拖，係好朋友，咪即係我哋後生仔所講嘅Soulmate。」
「有個伴都好吖，平時冇咁悶。」
Eva：「等我之前仲介紹佢嚟speed dating，真係枉作小人，搞到你唔好意思。」
「傻啦！我有錢收㗎！你蝕咗咋。」
之後各有各忙，Auntie嗰邊又唔使再follow，我都有一年冇contact Eva喇，直至近日佢打嚟報喜：「我媽咪結婚喇！」
「真係？恭喜晒，係咪Soulmate叔叔？」
Eva：「係呀，原來3年前Soulmate叔叔已經暗示過想同媽咪結婚，話想兩個人靜靜地過埋下半世，我再確認多次，當時佢哋係連手都冇拖，咁都求婚，真係上一代人先做得到。」
「你媽咪3年前拒絕咗人一次呀？」
Eva：「係呀，媽咪話當時我都未識而家個老公，仲係單身，佢話我已經冇公公婆婆，爸爸又唔理我，如果佢真係結婚，我就好似冇家一樣，佢唔想留低我一個。」
因為唔想個女冇家，Eva媽咪等到個女嫁咗，先至以55歲之齡再婚，再諗起當年佢媽咪闊別社會10年再做酒樓侍應養家，真係覺得母愛好偉大，希望Eva同佢媽咪永遠都幸福快樂。