做好人要睇對象 否則你嘅慷慨就會變成應份

我的失業女友 EP 1《與我常在》

是咁的,小弟係Slash族,其實Slash唔係單單讀解為好多份freelance,應該係有多重職業先啱。我識影相、剪片、後期製作,亦會做一啲production方面嘅工作,幸運地每月嘅job都好穩定,因為比較多回頭客,so far生活唔使愁,平日大部分時間係home office。

由於近一兩年嘅工作已經好紮實,所以當時我決定自己搬出嚟住,喺元朗租咗個平平哋嘅單位,一來本身屋企好多人好嘈,我呢行成日要con-call好唔方便,二來我女友住元朗,方便平時同佢出街,甚至可以上嚟煮飯仔,既享受到二人世界,又可以慳返啲錢。

講起我女友,佢做普通文職,穩穩定定冇咩特別,平時都係間唔中呻幾句,同大部分打工仔一樣,見慣亦平常,發洩完就算㗎啦,當然耐唔耐亦會聽到佢話要辭職,嚟緊要搵過第二份工之類,大約兩個月loop一次,唔算呻得好密,我亦會飾演樹窿照聽,等佢心理有啲平衡,點知大約6月嗰陣,條友竟然嚟真!

介紹返,我女友叫Jane。

Jane:「如果我真係辭職,你支唔支持我?」

「支持,點解唔支持呀?你做咩我都咁撐你㗎啦!」其實佢問過好多次,我以為今次都係循例問下。

Jane:「咁我一陣同經理講。」

「點解今次咁認真既?」佢語氣絕對唔係講笑。

Jane:「我咪同你講過嘅,同team嗰個同事勁賴皮,超級唔負責任,認屎認屁自己挑起啲嘢之後就走咗去,跟住要我follow,早幾日有個project係佢負責,佢竟然請假,經理叫我跟埋,平時佢落樓食煙又成個鐘唔見人,我頂唔順喇!唔係一次半次,我忍咗足足一年喇!」

作為男朋友,聽到另一半畀人蝦,工作又咁委屈,個心點都會唔舒服,何況Jane所講呢種情況的確不斷重演,佢唔係特別偉大,只係做唔出闊佬懶理,同事可以由得啲嘢大爆炸都不聞不問,但係Jane唔得,有時殺到埋身,明明唔關自己事,佢都係忍唔住會出手。點解我會咁清楚?因為我同Jane就係之前工作認識,佢同事本身同我跟緊一個project,及後啲嘢甩晒,連我都唔知點收科,最後係Jane介入幫忙執手尾。

職場嘅定律係,你可以做好人,不過要睇下對象係邊個,否則你嘅慷慨就會變成應份,然後次次都老奉。冇人會關心你付出咗啲乜,人哋只會關心佢哋得到啲乜。

「btw,你公司resign好似要兩個月通知喎!」

Jane:「係呀,所以而家開始搵工應該都夠時間,係驚呢兩個月請唔到咁多假去見工啫,又擔心啲公司唔會等人兩個月咁耐呢。」

後來證實,我女友嘅擔心係多餘,因為佢裸辭之後大約一個星期就爆發第三波疫情,佢用咗足足兩個月時間去搵工,大約send咗150份CV出去,唔係見完之後人哋唔請,亦唔係佢見完覺得唔啱自己,而係所有send出去嘅CV都石沉大海,一份工都冇feedback,直情連電話打嚟問下資料都冇,女朋友甚至一度懷疑個gmail壞咗。

今年市道其實已經唔好,第三波疫情再爆發時,好多公司亦即刻轉做home office,其實你做老闆都真係唔敢請人,我好多客都採取自然流失嘅態度,即使係請,當時都唔知要幾耐先正常(其實而家都唔知),請完又唔知叫你幾時返工好。

Jane用咗兩個月仲未搵到工並唔出奇,150份CV連一個電話都收唔到先至最恐怖,去到佢last day當日,Jane煞有介事咁同我講:「可唔可以去你屋企扮返工?我應承你會努力搵工,一定好快搵到工㗎!」

點解Jane咁唔好意思?因為佢嘅爸爸媽媽係老派人,唔理你份工有咩問題,總之辭職就係你唔捱得,就係你錯,一個人冇工返就係廢人,佢家中兩老嘅觀念係咁。

女朋友好清楚我性格,佢要嚟扮返工,即係逢星期一至五嘅9-6都要嚟我屋企,而我嘅工作係好需要寧靜同埋空間,呢個正正係我搬出嚟住嘅初衷,加上我之前搬到咁近女朋友,換言之佢扮返工都係元朗去元朗,朝早8點幾就嚟到,夜晚又要扮到同以前一樣7點幾先返自己屋企,喺我度朝8晚8,好似保安員返「12碼」(12個鐘)一樣,所以,我屋企亦多咗個保安。

兩個人一齊就係要互相扶持,開心可以分享,低谷時亦結伴走過。

「冇問題,你聽日嚟我度『開工』啦!喺我屋企畀心機搵工。」

Jane:「BB,你係最好㗎!」

可唔可以點首歌,我想聽《與我常在》

在一起與你工作 在一起與你摸索
兩個人 同時佔有的快樂
每分鐘與你揮霍
沒有一秒沒我在旁
還攜手看著天空黑與光

EP2預告:星期一至五 9-6入侵我屋企之後,Jane再花咗大半個月,終於有一次interview機會。

error: