失業扮返工被男友威脅

讀者投稿：Samantha

因為疫情關係，我失業喇。

對上一次失業已經超過10年前，當時我好細個，剛剛出嚟社會做第一份工，點知間公司唔夠兩年就執咗。

唔敢同父母講，唯有每日去圖書館或者快餐店打躉，期間一直有搵工，冇停過send CV，可惜見咗幾份工都見唔成，做人就係愈窮愈見鬼。

嗰陣個男朋友知道我失業，但我哋當時感情已經好差，長期處於離離合合嘅狀態，主要原因係佢成日賭錢，波、馬、過大海，樣樣佢都賭，次次佢都輸，我已經借過錢畀佢無數次。

熱戀緊或者無風無浪嘅時候，佢每次問我借一千幾百我都可以唔計較，但係失業嗰兩個月，呢個爛賭男朋友依然冇變過，問題係我自己都好傍偟，細細個根本唔多積蓄，已經冇咗份工，又唔敢同屋企人講，我仲可以借幾多次呀？我壓力都好大㗎！

爛賭男朋友提議我去借財仔，我話失業點借？佢話唔係UA邦民嗰啲大財務公司，係其他細財仔，我死都唔肯，佢竟然賤格到威脅我，話要同我媽咪爆我失業，終日喺街外流連扮返工，嗰陣自己太細個，雖然好嬲，但同樣好驚，好在都冇畀佢迫到去借財仔，但係佢每日都畀說話我聽，有時威脅，有時氹，有時鬧，有時扮慘，最終說服我透支信用卡去幫佢。

我好記得第一次係透支咗$32000，而佢不嬲知道我有兩張信用卡，後來又繼續用爆料畀媽咪聽嚟威脅我，要我再透支埋另一張卡。

日子好漫長好無助，因為我一開始已經選擇咗講大話，冇同屋企人坦白承認失業，我驚佢哋會鬧我，會覺得我冇用，每日呃媽咪話返工，其實係出咗去捱時間，如果冇行錯呢步，我就唔使一個大話冚一個大話，連續兩個月日日扮返工，即係日日都講緊大話。

唔知點算好，工又搵唔到，積蓄莫講話冇晒，仲要反欠一筆卡數，我覺得生活完全冇希望，而家咁講好似好輕鬆，但當時真係有自殺嘅念頭，最痛苦係個男朋友不斷威脅我，要我透支埋另一張卡，要我幫佢去借財仔，有時真係會唞唔到氣，夜晚返到屋企好怕面對父母，食完飯嗱嗱聲返房，驚講嘢會露出馬腳，每晚瞓得唔好，試過幾晚眼光光等天光。

爛賭男朋友從來冇放過我，佢嘅目標仍然係我另一張信用卡，有一晚佢又話：「你撳唔撳出嚟呀？唔撳我即刻打電話去你屋企，同你老母講你日日扮返工。」可能係谷得太耐，真係忍無可忍，我豁咗出去：「爆吖，我真係冇晒辦法，反正都係死，借錢畀你又死，畀我屋企人知又死，你爆吖，你而家即刻打畀我媽咪講晒出嚟啦！」

佢最後冇爆，不過我決定返屋企向父母坦白，因為我講咗一個大話，每日都要受到折磨，包括被威脅同埋良心責備，我已經頂唔順，情緒要爆煲喇，我唔想再咁樣過日子。

某一日朝早，我決定唔再扮返工，直接同媽咪講自己失業，仲要係失業咗一段時間，不過怕畀佢哋鬧所以一直扮有工返。

媽咪同我講：「唔緊要啦，再搵過囉，下次搵間大公司喇，冇咁易執笠。」

嗲地就話：「你都痴痴地，日日出去扮返工，留喺屋企慢慢搵工仲好啦，上個月仲要畀家用，你真係好大膽，搵到工之前唔使畀家用住喇。」

我忍住冇喊出嚟，原來成件事冇我諗得咁嚴重，我知道錯喇。

自從嗰次之後，我答應過自己唔可以再講大話，唔要再畀人威脅，唔要再有痛腳畀人捉住。上個月我公司因為疫情而裁員，今次我選擇直接同屋企人講，因為失業真係冇人想，呢個唔係我嘅錯，但若然我選擇再講大話，咁就會一錯再錯。

我已經受到教訓，當時借畀爛賭男朋友嘅錢一蚊都收唔返，呢個人亦好似人間蒸發一樣，如果可以時光倒流，我真係好想返去摑當時嘅自己一巴。

疫情下好多人嘅工作都受到影響，希望失業嘅朋友可以振作，相反地，遇到身邊有人失業，請記得畀多啲鼓勵佢哋。