其實每個人，每樣專業，都有佢嘅價值，當然會有人質疑，但你一定要相信同埋堅守自己嘅價值。
我有個做media認識嘅舊同事係幫人拍片，收得唔貴，甚至公認係平，我都叫過佢加價幾次。噚日有人搵佢拍嘢，報完價之後，對方第一句就話：「咁貴？呀邊個仲有名氣過你，拍得好過你喎！」
舊同事：「唔緊要嘅，第日有機會再合作吖！」
點知對方死唔斷氣，不斷又彈又踩，原來結論係呢一句：「收平一半得唔得呀？」
呢個社會好奇怪，見工已經係咁，價錢唔係冇得傾，但點解要否定同埋踩個candidate，然後達至壓價嘅目的呢？
好多公司搵人接Job又係咁，你覺得人哋唔掂，咪出錢搵個掂囉，點解要踩完人哋啲嘢，跟住就叫人收平啲呢？
商業世界討價還價係好常見嘅事，但係將別人踩到一文不值，試圖摧毀人哋嘅信心，再走去壓價呢招已經過時㗎喇！
講件真人真事畀大家聽，我有個friend嘅女朋友之前讀化妝，一直好想做化妝師，又戰戰競競唔係好敢，唔多夠信心，而其實佢女友手勢係唔錯㗎！我成功介紹過一位要結婚嘅朋友畀佢，feedback相當好。
不過後來有一次，有間婚禮服務公司搵佢女友去化新娘同伴娘妝，想影啲相做reference擺上公司網頁，傾好咗唔知幾百蚊酬勞咁上下，佢女友好開心，當日去到studio都好畀心機去化，化完之後對方個老闆仲話滿意，點知間公司第二日就搵個職員打嚟壓價，一路狂踩啲妝唔得、出嚟效果唔好、個頭set得唔靚，總之幾百蚊就太貴。
我唔識行情都知道，幾百蚊化幾個妝已經收平咗好多，幾年前Annual Dinner聽女同事講，佢哋當日下午去搵化妝師化妝set頭都要幾百，更何況呢個Job唔係一早傾好咗價錢咩？現場仲收貨㗎，點解最後會咁呢？
個職員話，老闆唔會畀嗰幾百蚊喇，係咁易畀返50蚊車馬費就算。
我friend個女友聽到對方質疑自己嘅技術同專業，意志消沉咗一排，好灰咁講咗句：「唉，可能化妝真係唔啱我。」有幾晚我朋友話見到女友瞓唔著，半夜一個人坐喺梳化，望住窗外發呆。
重點嚟喇～～～～～嗰間公司用咗佢女友幫人化妝嘅reference相擺落網頁，咁即係點？你話佢啲嘢唔得，但又用佢啲嘢？如果比你壓到只值50蚊車馬費，你又用嚟放喺網站做生意？
幸運嘅係，嗰間公司過咗兩年就執咗，而不幸嘅係，我friend個女友真係冇再做化妝搵食，目前做緊文職，個問題唔係邊份工作穩定啲，而係佢否定咗自己。
其實我哋日常生活經常會遇到呢啲人同埋事，我嘅工作一樣會畀人質疑，希望你都可以相信同埋堅守自己嘅價值。
唔怕話你知，我連唔買老翻，堅持要買正版，咁都可以畀表弟個老婆質疑，仲畀人串我買唔到樓，咁可以點呀？唔通我又否定自己，自降身價同佢一般見識呀？
久違了嘅YouTube片，買唔買老翻都睇下啦喂！