我冇記性,不過唔影響我記仇!

當日離開Headhunt公司,係因為原有嘅department「被解散」,冇選擇之下被編入一條國內Team。

「被調Team」嘅初期抱觀望態度,一直想自己做自己嘢,後來發覺根本唔work,首先我係全Team唯一一個外人,另外幾位同事嘅關係都千絲萬縷,呢個係唔知邊個嘅邊個,嗰個又原來一早已經識呢個,諗諗下都好正常嘅,上面做嘢方式一向睇關係,佢哋只係將呢套移植過嚟香港office,可以想像到未來嘅香港會愈嚟愈多呢種情況。

其次,佢哋掟出嚟畀我跟嘅job都係死job,成年都搵唔到人做嗰種,一係2萬蚊要你做千手觀音,一係個客根本冇心用headhunt但又要耍你嗰隻。另外仲有一啲內定嘅job,有次個同事要搵校長,係一個國內金主要嚟香港開學校,我搵咗幾個好好嘅candidate之後,發現全部只係陪跑,原來同事本身同個金主相熟,無論我搵到邊個都好,最後一樣係請佢嗰啲candidate。咁點解要叫埋我搵?上司同埋同事都要做啲嘢畀老細睇㗎嘛,嗱~~~隻job有預你㗎,你自己唔中咋!

隔離Team同事唔知頭唔知路仲好羨慕我:「你就好啦,入咗最好數嗰條Team。」然後就會見佢哋走去巴結我Team Head,「R」啲job返嚟,呢啲時候我真係笑而不語,佢哋有job會唔益自己人走去醒你?

過多兩至三個星期之後,「R」到job嘅隔離team同事例牌走嚟呻:「你阿head畀我隻job流嘅,得個搵字,啲candidate見都冇得見。」呢種情況出現過無數次,咁都未學精?

因為我哋都係香港人囉!其實佢哋並冇當過我哋係自己人。香港呢個地方又好,香港人又好,只係佢哋嘅搵食工具,你有冇利益畀佢先?冇吖嘛,咁佢又點會唔益同鄉呢?

我睇波就更加清楚,好多球星因為貪錢去中國搵食,爛尾冇糧出嘅例子大有人在,我哋headhunt公司大把job係來自國企但收唔到錢,或者拖一年半載要出晒律師信。成日覺得團結啲可以踢佢哋出局,唔prepay就唔做囉!不過總有人同埋公司好唔爭氣,明知畀國企拖數都照做,我問過呢啲人:「呢間嘢唔找數㗎喎,次次都拖成年。」

「拖一年都好吖,都係錢,到時追得返嘅。」

如是者,你唔團結,咪坐大佢哋嘅氣焰囉!佢找畀你係因為有另一單嘢要用你,最後梗有一單係爛尾。

相信好多藝人上去搵食都有遇過荒誕嘅事同埋無理要求,被拖數被賴帳一定有發生過,問題係藝人未必會公開講出嚟。其實呢個係國內文化同埋做嘢方式,而且你都唔好當上面啲人係傻,邊個係自己人,邊個係為錢先走去巴結,佢哋心入面好清楚,咪以為拎住張卡寫「愛國愛黨」影張相,就真係會當你自己人啦!

所以有時見到啲公司同埋藝人全力攻打中國市場,諗住北望神州可以大富大貴,完全放棄香港人,甚至捨棄當初造就佢哋上位嘅香港fans,我都會笑而不語,因為一定有好多陷阱同埋地雷等緊佢哋去踩。

我冇記性,不過唔影響我記仇,嗰啲口口聲聲叫香港人丟咗佢哋隻CD都唔會稀罕嘅藝人,我會好好記住。

error: