大家都係work from home，我同細妹嘅體驗可謂天淵之別，如果有得揀我寧願返office，起碼有lunch hour同收工時間，喺屋企反而有種日月無光，無限OT嘅感覺，而細妹就啱啱相反，hea到你唔信。
農曆新年前細妹間公司已經宣布所有同事work from home，佢話入咗去做半年，真心覺得間公司冇乜嘢做，其他部門係咁，佢個營業部就更加明顯，因為Sales嘅職責主要係搵客見客，而疫情下好多客唔歡迎人哋去拜訪，有時佢公司要返，人哋公司又work from home，所以根本冇咩客可以去見。
細妹話當老細下令wfh之後，佢大佬（上司）就叫下屬每朝9點鐘，準時喺公司個WhatsApp group講句早晨或者say個hi，目的係要同其他人講已經ready好坐定定喺電腦面前，聽到嗰陣我真係笑咗，say個hi即係當打卡咁呀？跟住佢全日就冇嘢做㗎喇，偶爾會有同事問一兩句嘢，幾秒鐘就覆完嗰種。
Netflix套《金魚妻》先出咗幾日，細妹用一日時間已經煲晒，仲要喺我做嘢做到頭都暈嘅時候走嚟推介：「正呀家姐，呢套由第一秒開始已經搞緊嘢，幾好睇喎！」大家都係work from home啫，點解我啲嘢做極都做唔完，你可以咁快睇晒成套《金魚妻》㗎？
細妹：「嚴格嚟講都有少少嘢做嘅，因為營業部每個星期五要交一份weekly report，excel形式，裡面列出你今個禮拜接觸過邊啲客、contact邊位、傾緊乜，同埋去到乜嘢進度，但我想講呢份嘢不嬲都好流，未實施work from home之前已經係hea做，填一堆客名，打幾句英文咁就係，班膠層應該冇打開份excel嚟睇。」
我：「你點知呀？認真啲做好喎。」
細妹：「曾經有同事唔小心重複send咗上星期嘅weekly report，最後冇人發現，一啲事都冇，其實班膠層仲hea過我哋班細啦！今個星期我都諗住copy返啲內容，換一堆公司名，再調下啲次序，之前都係咁㗎喇，放心！」
細妹每朝9點就郁一郁隻mouse開著電腦mon，講句good morning之後繼續瞓，有時會出街食lunch，有時直情去行街，佢仲話而家行街最舒服，因為少咗好多人，係差在冇得睇戲同唱K啫。
唔係唔抵得細妹，佢份工舒服我都好開心，但就有啲擔心，咁樣WFH法，佢間公司點解可以唔執？細妹話老細本身好多生意，而且呢間公司有一堆客已經好穩定，唉！總之人哋公司永遠係最好，講講下有衝動問下細妹嗰邊請唔請人，我都想睇《金魚妻》呀！