投稿嘅朋友話可以直接出公司名，因為佢想同其他menclub同事打打氣💪🏻💪🏻💪🏻
我都祝你哋快啲揾到新工作，展開下一段旅程❤️
＝＝＝＝＝＝＝＝
投稿人：前menclub員工
我前公司係menclub，反送中運動之後，公司其實裁咗超過5成嘅員工，因為我哋成兩個月冇廣告，社會氣氛影響，大家都唔想。
我阿媽本身已經係藍絲，見我畀人裁咗，又借題發揮日日鬧示威者，早兩日佢執房搵到個豬嘴，而家再鬧多兩錢重，話我失業都係自己攞嚟，因為我都有份做暴徒，唔抵可憐。我心諗暴咩徒吖，有次見到人掟汽油彈，暗暗叫好之際，後來先知係警察扮嘅。
呢兩日嘈得更加犀利，我阿媽睇咗手足圍知專嘅片，係咁話暴徒圍院長王麗蓮好野蠻，有時真心唔明藍絲把尺係點，個院長見暈你就心痛，但一個小妹妹死得不明不白，佢哋就覺得冇問題，唔使查。
好在，我有個朋友喺屋企附近嘅商場開舖賣手機殼，我而家日日落去佢鋪頭打躉，唔使畀阿媽轟炸。
我冇嬲過任何手足，亦冇後悔過上前線，係呀，因為呢場運動，我間接冇咗份工，但我深信公司呢啲嘢一雞死一雞鳴，總有地方可以容納我，而家接住freelance幫人砌相先。
工冇咗一定搵得返，如果香港冇咗，畀個極權政府任意妄為，咁就真係冇得救，希望大家諗清楚，唔好咁短視。
祝各位menclub同事盡快重整旗鼓，快啲搵返份fulltime。